21. කණිකාරපුප්ඵියවග්ගො

1. කණිකාරපුප්ඵියත්ථෙරඅපදානං

1. ‘‘කණිකාරං පුප්ඵිතං දිස්වා, ඔචිනිත්වානහං තදා;

තිස්සස්ස අභිරොපෙසිං, ඔඝතිණ්ණස්ස තාදිනො.

2. ‘‘ද්වෙනවුතෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

3. ‘‘පඤ්චත්තිංසෙ ඉතො කප්පෙ, අරුණපාණීති විස්සුතො;

සත්තරතනසම්පන්නො, චක්කවත්තී මහබ්බලො.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා කණිකාරපුප්ඵියො ථෙරො ඉමා ගාථායො අභාසිත්ථාති.

කණිකාරපුප්ඵියත්ථෙරස්සාපදානං පඨමං.

2. මිනෙලපුප්ඵියත්ථෙරඅපදානං

5. ‘‘සුවණ්ණවණ්ණො භගවා, සතරංසී පතාපවා;

චඞ්කමනං සමාරූළ්හො, මෙත්තචිත්තො සිඛීසභො.

6. ‘‘පසන්නචිත්තො සුමනො, වන්දිත්වා [ථොමෙත්වා (ස්‍යා.)] ඤාණමුත්තමං;

මිනෙලපුප්ඵං පග්ගය්හ, බුද්ධස්ස අභිරොපයිං.

7. ‘‘එකත්තිංසෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

8. ‘‘එකූනතිංසකප්පම්හි, සුමෙඝඝනනාමකො;

සත්තරතනසම්පන්නො, චක්කවත්තී මහබ්බලො.

9. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මිනෙලපුප්ඵියො ථෙරො ඉමා ගාථායො අභාසිත්ථාති.

මිනෙලපුප්ඵියත්ථෙරස්සාපදානං දුතියං.

3. කිඞ්කණිපුප්ඵියත්ථෙරඅපදානං

10. ‘‘කඤ්චනග්ඝියසඞ්කාසො, සබ්බඤ්ඤූ ලොකනායකො;

ඔදකං දහමොග්ගය්හ, සිනායි ලොකනායකො.

11. ‘‘පග්ගය්හ කිඞ්කණිං [කිඞ්කිණිං (සී.)] පුප්ඵං, විපස්සිස්සාභිරොපයිං;

උදග්ගචිත්තො සුමනො, ද්විපදින්දස්ස තාදිනො.

12. ‘‘එකනවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

13. ‘‘සත්තවීසතිකප්පම්හි, රාජා භීමරථො අහු;

සත්තරතනසම්පන්නො, චක්කවත්තී මහබ්බලො.

14. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිඞ්කණිපුප්ඵියො [කිඞ්කිණිකපුප්ඵියො (සී.)] ථෙරො ඉමා ගාථායො අභාසිත්ථාති.

කිඞ්කණිපුප්ඵියත්ථෙරස්සාපදානං තතියං.

4. තරණියත්ථෙරඅපදානං

15. ‘‘අත්ථදස්සී තු භගවා, ද්විපදින්දො නරාසභො;

පුරක්ඛතො සාවකෙහි, ගඞ්ගාතීරමුපාගමි.

16. ‘‘සමතිත්ති කාකපෙය්‍යා, ගඞ්ගා ආසි දුරුත්තරා;

උත්තාරයිං භික්ඛුසඞ්ඝං, බුද්ධඤ්ච ද්විපදුත්තමං.

17. ‘‘අට්ඨාරසෙ කප්පසතෙ, යං කම්මමකරිං තදා;

දුග්ගතිං නාභිජානාමි, තරණාය ඉදං ඵලං.

18. ‘‘තෙරසෙතො කප්පසතෙ, පඤ්ච සබ්බොභවා [සබ්භොගවා (සී.)] අහුං;

සත්තරතනසම්පන්නා, චක්කවත්තී මහබ්බලා.

19. ‘‘පච්ඡිමෙ ච භවෙ අස්මිං, ජාතොහං බ්‍රාහ්මණෙ කුලෙ;

සද්ධිං තීහි සහායෙහි, පබ්බජිං සත්ථු සාසනෙ.

20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තරණියො ථෙරො ඉමා ගාථායො අභාසිත්ථාති;

තරණියත්ථෙරස්සාපදානං චතුත්ථං.

5. නිග්ගුණ්ඩිපුප්ඵියත්ථෙරඅපදානං

21. ‘‘විපස්සිස්ස භගවතො, ආසිමාරාමිකො අහං;

නිග්ගුණ්ඩිපුප්ඵං පග්ගය්හ, බුද්ධස්ස අභිරොපයිං.

22. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

23. ‘‘පඤ්චවීසෙ [පඤ්චතිංසෙ (සී. ස්‍යා.)] ඉතො කප්පෙ, එකො ආසිං ජනාධිපො;

මහාපතාපනාමෙන, චක්කවත්තී මහබ්බලො.

24. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නිග්ගුණ්ඩිපුප්ඵියො ථෙරො ඉමා ගාථායො අභාසිත්ථාති.

නිග්ගුණ්ඩිපුප්ඵියත්ථෙරස්සාපදානං පඤ්චමං.

6. උදකදායකත්ථෙරඅපදානං

25. ‘‘භුඤ්ජන්තං සමණං දිස්වා, විප්පසන්නමනාවිලං;

ඝටෙනොදකමාදාය, සිද්ධත්ථස්ස අදාසහං.

26. ‘‘නිම්මලො හොමහං අජ්ජ, විමලො ඛීණසංසයො;

භවෙ නිබ්බත්තමානම්හි, ඵලං නිබ්බත්තතෙ මම [සුභං (සී.)].

27. ‘‘චතුන්නවුතිතො කප්පෙ, උදකං යමදාසහං [යං තදා අදං (සී.), අදදිං තදා (ස්‍යා.)];

දුග්ගතිං නාභිජානාමි, දකදානස්සිදං ඵලං.

28. ‘‘එකසට්ඨිම්හිතො කප්පෙ, එකොව විමලො අහු;

සත්තරතනසම්පන්නො, චක්කවත්තී මහබ්බලො.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උදකදායකො ථෙරො ඉමා ගාථායො අභාසිත්ථාති.

උදකදායකත්ථෙරස්සාපදානං ඡට්ඨං.

7. සලලමාලියත්ථෙරඅපදානං

30. ‘‘කණිකාරංව ජොතන්තං, නිසින්නං පබ්බතන්තරෙ;

ඔභාසෙන්තං දිසා සබ්බා, සිද්ධත්ථං නරසාරථිං.

31. ‘‘ධනුං අද්වෙජ්ඣං කත්වාන, උසුං සන්නය්හහං තදා;

පුප්ඵං සවණ්ටං ඡෙත්වාන, බුද්ධස්ස අභිරොපයිං.

32. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

33. ‘‘එකපඤ්ඤාසිතො කප්පෙ, එකො ආසිං ජුතින්ධරො;

සත්තරතනසම්පන්නො, චක්කවත්තී මහබ්බලො.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සලලමාලියො ථෙරො ඉමා ගාථායො අභාසිත්ථාති.

සලලමාලියත්ථෙරස්සාපදානං සත්තමං.

8. කොරණ්ඩපුප්ඵියත්ථෙරඅපදානං

35. ‘‘අක්කන්තඤ්ච පදං දිස්වා, චක්කාලඞ්කාරභූසිතං;

පදෙනානුපදං යන්තො, විපස්සිස්ස මහෙසිනො.

36. ‘‘කොරණ්ඩං පුප්ඵිතං දිස්වා, සමූලං පූජිතං මයා;

හට්ඨො හට්ඨෙන චිත්තෙන, අවන්දිං පදමුත්තමං.

37. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

38. ‘‘සත්තපඤ්ඤාසකප්පම්හි, එකො වීතමලො අහුං;

සත්තරතනසම්පන්නො, චක්කවත්තී මහබ්බලො.

39. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කොරණ්ඩපුප්ඵියො ථෙරො ඉමා ගාථායො අභාසිත්ථාති.

කොරණ්ඩපුප්ඵියත්ථෙරස්සාපදානං අට්ඨමං.

9. ආධාරදායකත්ථෙරඅපදානං

40. ‘‘ආධාරකං මයා දින්නං, සිඛිනො ලොකබන්ධුනො;

ධාරෙමි පථවිං සබ්බං, කෙවලං වසුධං ඉමං.

41. ‘‘කිලෙසා ඣාපිතා මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

42. ‘‘සත්තවීසෙ ඉතො කප්පෙ, අහෙසුං චතුරො ජනා;

සමන්තවරණා නාම, චක්කවත්තී මහබ්බලා.

43. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ආධාරදායකො [පරියාදානියො (ක.)] ථෙරො ඉමා ගාථායො අභාසිත්ථාති.

ආධාරදායකත්ථෙරස්සාපදානං නවමං.

10. පාපනිවාරියත්ථෙරඅපදානං

44. ‘‘තිස්සස්ස තු භගවතො, දෙවදෙවස්ස තාදිනො;

එකච්ඡත්තං මයා දින්නං, විප්පසන්නෙන චෙතසා.

45. ‘‘නිවුතං හොති මෙ පාපං, කුසලස්සුපසම්පදා;

ආකාසෙ ඡත්තං ධාරෙන්ති, පුබ්බකම්මස්සිදං ඵලං.

46. ‘‘චරිමං වත්තතෙ මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

47. ‘‘ද්වෙනවුතෙ ඉතො කප්පෙ, යං ඡත්තමදදිං තදා;

දුග්ගතිං නාභිජානාමි, ඡත්තදානස්සිදං ඵලං.

48. ‘‘ද්වෙසත්තතිම්හිතො කප්පෙ, අට්ඨාසිංසු ජනාධිපා;

මහානිදානනාමෙන, රාජානො චක්කවත්තිනො.

49. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාපනිවාරියො [වාතාතපනිවාරියො (සී.)] ථෙරො ඉමා ගාථායො අභාසිත්ථාති;

පාපනිවාරියත්ථෙරස්සාපදානං දසමං.

කණිකාරපුප්ඵියවග්ගො එකවීසතිමො.