10. පාපනිවාරියත්ථෙරඅපදානං

44. ‘‘තිස්සස්ස තු භගවතො, දෙවදෙවස්ස තාදිනො;

එකච්ඡත්තං මයා දින්නං, විප්පසන්නෙන චෙතසා.

45. ‘‘නිවුතං හොති මෙ පාපං, කුසලස්සුපසම්පදා;

ආකාසෙ ඡත්තං ධාරෙන්ති, පුබ්බකම්මස්සිදං ඵලං.

46. ‘‘චරිමං වත්තතෙ මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

47. ‘‘ද්වෙනවුතෙ ඉතො කප්පෙ, යං ඡත්තමදදිං තදා;

දුග්ගතිං නාභිජානාමි, ඡත්තදානස්සිදං ඵලං.

48. ‘‘ද්වෙසත්තතිම්හිතො කප්පෙ, අට්ඨාසිංසු ජනාධිපා;

මහානිදානනාමෙන, රාජානො චක්කවත්තිනො.

49. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාපනිවාරියො [වාතාතපනිවාරියො (සී.)] ථෙරො ඉමා ගාථායො අභාසිත්ථාති;

පාපනිවාරියත්ථෙරස්සාපදානං දසමං.

කණිකාරපුප්ඵියවග්ගො එකවීසතිමො.