1. තමාලපුප්ඵියත්ථෙරඅපදානං

1. ‘‘චුල්ලාසීතිසහස්සානි, ථම්භා සොවණ්ණයා අහූ;

දෙවලට්ඨිපටිභාගං, විමානං මෙ සුනිම්මිතං.

2. ‘‘තමාලපුප්ඵං පග්ගය්හ, විප්පසන්නෙන චෙතසා;

බුද්ධස්ස අභිරොපයිං, සිඛිනො ලොකබන්ධුනො.

3. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

4. ‘‘ඉතො වීසතිමෙ කප්පෙ, චන්දතිත්තොති එකකො;

සත්තරතනසම්පන්නො, චක්කවත්තී මහබ්බලො.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා තමාලපුප්ඵියො ථෙරො ඉමා ගාථායො අභාසිත්ථාති.

තමාලපුප්ඵියත්ථෙරස්සාපදානං පඨමං.