20. තමාලපුප්ඵියවග්ගො

1. තමාලපුප්ඵියත්ථෙරඅපදානං

1. ‘‘චුල්ලාසීතිසහස්සානි, ථම්භා සොවණ්ණයා අහූ;

දෙවලට්ඨිපටිභාගං, විමානං මෙ සුනිම්මිතං.

2. ‘‘තමාලපුප්ඵං පග්ගය්හ, විප්පසන්නෙන චෙතසා;

බුද්ධස්ස අභිරොපයිං, සිඛිනො ලොකබන්ධුනො.

3. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

4. ‘‘ඉතො වීසතිමෙ කප්පෙ, චන්දතිත්තොති එකකො;

සත්තරතනසම්පන්නො, චක්කවත්තී මහබ්බලො.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා තමාලපුප්ඵියො ථෙරො ඉමා ගාථායො අභාසිත්ථාති.

තමාලපුප්ඵියත්ථෙරස්සාපදානං පඨමං.

2. තිණසන්ථාරකත්ථෙරඅපදානං

6. ‘‘යදා වනවාසී [යං දායවාසිකො (සී.)] ඉසි, තිණං ලායති සත්ථුනො;

සබ්බෙ පදක්ඛිණාවට්ටා [පදක්ඛිණාවත්තා (සී. ස්‍යා.)], පථබ්‍යා [පුථව්‍යා (සී.)] නිපතිංසු තෙ.

7. ‘‘තමහං තිණමාදාය, සන්ථරිං ධරණුත්තමෙ;

තීණෙව තාලපත්තානි, ආහරිත්වානහං තදා.

8. ‘‘තිණෙන ඡදනං කත්වා, සිද්ධත්ථස්ස අදාසහං;

සත්තාහං ධාරයුං තස්ස [තත්ථ (ස්‍යා.)], දෙවමානුසසත්ථුනො.

9. ‘‘චතුන්නවුතිතො කප්පෙ, යං තිණං අදදිං තදා;

දුග්ගතිං නාභිජානාමි, තිණදානස්සිදං ඵලං.

10. ‘‘පඤ්චසට්ඨිම්හිතො කප්පෙ, චත්තාරොසුං මහද්ධනා;

සත්තරතනසම්පන්නා, චක්කවත්තී මහබ්බලා.

11. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිණසන්ථාරකො ථෙරො ඉමා ගාථායො අභාසිත්ථාති.

තිණසන්ථාරකත්ථෙරස්සාපදානං දුතියං.

3. ඛණ්ඩපුල්ලියත්ථෙරඅපදානං

12. ‘‘ඵුස්සස්ස ඛො භගවතො, ථූපො ආසි මහාවනෙ;

කුඤ්ජරෙහි තදා භින්නො, පරූළ්හො පාදපො [පරූළ්හපාදපො (සී.), සංරූළ්හො පාදපො (ස්‍යා.)] තහිං.

13. ‘‘විසමඤ්ච සමං කත්වා, සුධාපිණ්ඩං අදාසහං;

තිලොකගරුනො තස්ස, ගුණෙහි පරිතොසිතො [පරිතො සුතො (ක.)].

14. ‘‘ද්වෙනවුතෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, සුධාපිණ්ඩස්සිදං ඵලං.

15. ‘‘සත්තසත්තතිකප්පම්හි, ජිතසෙනාසුං සොළස;

සත්තරතනසම්පන්නා, චක්කවත්තී මහබ්බලා.

16. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඛණ්ඩඵුල්ලියො ථෙරො ඉමා ගාථායො අභාසිත්ථාති.

ඛණ්ඩපුල්ලියත්ථෙරස්සාපදානං තතියං.

4. අසොකපූජකත්ථෙරඅපදානං

17. ‘‘තිවරායං [තිපුරායං (ස්‍යා.)] පුරෙ රම්මෙ, රාජුය්‍යානං අහු තදා;

උය්‍යානපාලො තත්ථාසිං, රඤ්ඤො බද්ධචරො අහං.

18. ‘‘පදුමො නාම නාමෙන, සයම්භූ සප්පභො අහු;

නිසින්නං [නිසින්නො (ක.)] පුණ්ඩරීකම්හි, ඡායා න ජහි තං මුනිං.

19. ‘‘අසොකං පුප්ඵිතං දිස්වා, පිණ්ඩිභාරං සුදස්සනං;

බුද්ධස්ස අභිරොපෙසිං, ජලජුත්තමනාමිනො.

20. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

21. ‘‘සත්තතිංසම්හිතො කප්පෙ, සොළස අරණඤ්ජහා [අරුණඤ්ජහා (සී.)];

සත්තරතනසම්පන්නා, චක්කවත්තී මහබ්බලා.

22. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අසොකපූජකො ථෙරො ඉමා ගාථායො අභාසිත්ථාති.

අසොකපූජකත්ථෙරස්සාපදානං චතුත්ථං.

5. අඞ්කොලකත්ථෙරඅපදානං

23. ‘‘අඞ්කොලං පුප්ඵිතං දිස්වා, මාලාවරං සකොසකං [සමොගධං (ස්‍යා.)];

ඔචිනිත්වාන තං පුප්ඵං, අගමං බුද්ධසන්තිකං.

24. ‘‘සිද්ධත්ථො තම්හි සමයෙ, පතිලීනො මහාමුනි;

මුහුත්තං පටිමානෙත්වා, ගුහායං පුප්ඵමොකිරිං.

25. ‘‘චතුන්නවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, පුප්ඵදානස්සිදං [බුද්ධපූජායිදං (සී. ස්‍යා.)] ඵලං.

26. ‘‘ඡත්තිංසම්හි ඉතො කප්පෙ, ආසෙකො දෙවගජ්ජිතො;

සත්තරතනසම්පන්නො, චක්කවත්තී මහබ්බලො.

27. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අඞ්කොලකො ථෙරො ඉමා ගාථායො අභාසිත්ථාති.

අඞ්කොලකත්ථෙරස්සාපදානං පඤ්චමං.

6. කිසලයපූජකත්ථෙරඅපදානං

28. ‘‘නගරෙ ද්වාරවතියා, මාලාවච්ඡො මමං අහු;

උදපානො ච තත්ථෙව, පාදපානං විරොහනො.

29. ‘‘සබලෙන උපත්ථද්ධො, සිද්ධත්ථො අපරාජිතො;

මමානුකම්පමානො සො, ගච්ඡතෙ අනිලඤ්ජසෙ.

30. ‘‘අඤ්ඤං කිඤ්චි න පස්සාමි, පූජායොග්ගං මහෙසිනො;

අසොකං පල්ලවං දිස්වා, ආකාසෙ උක්ඛිපිං අහං.

31. ‘‘බුද්ධස්ස තෙ කිසලයා, ගච්ඡතො යන්ති පච්ඡතො;

තාහං දිස්වාන සංවිජිං [සොහං දිස්වාන තං ඉද්ධිං (සී. ස්‍යා.)], අහො බුද්ධස්සුළාරතා.

32. ‘‘චතුන්නවුතිතො කප්පෙ, පල්ලවං අභිරොපයිං;

දුග්ගතිං නාභිජානාමි, බුද්ධපූජායිදං ඵලං.

33. ‘‘සත්තතිංසෙ [සත්තවීසෙ (සී. ස්‍යා.)] ඉතො කප්පෙ, එකො එකිස්සරො අහු;

සත්තරතනසම්පන්නො, චක්කවත්තී මහබ්බලො.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිසලයපූජකො ථෙරො ඉමා ගාථායො අභාසිත්ථාති.

කිසලයපූජකත්ථෙරස්සාපදානං ඡට්ඨං.

7. තින්දුකදායකත්ථෙරඅපදානං

35. ‘‘ගිරිදුග්ගචරො ආසිං, මක්කටො ථාමවෙගිකො;

ඵලිනං තින්දුකං දිස්වා, බුද්ධසෙට්ඨං අනුස්සරිං.

36. ‘‘නික්ඛමිත්වා කතිපාහං, විචිනිං ලොකනායකං;

පසන්නචිත්තො සුමනො, සිද්ධත්ථං තිභවන්තගුං.

37. ‘‘මම සඞ්කප්පමඤ්ඤාය, සත්ථා ලොකෙ අනුත්තරො;

ඛීණාසවසහස්සෙහි, ආගච්ඡි මම සන්තිකං.

38. ‘‘පාමොජ්ජං ජනයිත්වාන, ඵලහත්ථො උපාගමිං;

පටිග්ගහෙසි භගවා, සබ්බඤ්ඤූ වදතං වරො.

39. ‘‘චතුන්නවුතිතො කප්පෙ, යං ඵලං අදදිං තදා;

දුග්ගතිං නාභිජානාමි, ඵලදානස්සිදං ඵලං.

40. ‘‘සත්තපඤ්ඤාසකප්පම්හි, උපනන්දසනාමකො;

සත්තරතනසම්පන්නො, චක්කවත්තී මහබ්බලො.

41. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තින්දුකදායකො ථෙරො ඉමා ගාථායො අභාසිත්ථාති.

තින්දුකදායකත්ථෙරස්සාපදානං සත්තමං.

8. මුට්ඨිපූජකත්ථෙරඅපදානං

42. ‘‘සුමෙධො නාම භගවා, ලොකජෙට්ඨො නරාසභො;

පච්ඡිමෙ අනුකම්පාය, පධානං පදහී ජිනො.

43. ‘‘තස්ස චඞ්කමමානස්ස, ද්විපදින්දස්ස තාදිනො;

ගිරිනෙලස්ස පුප්ඵානං, මුට්ඨිං බුද්ධස්ස රොපයිං.

44. ‘‘තෙන චිත්තප්පසාදෙන, සුක්කමූලෙන චොදිතො;

තිංසකප්පසහස්සානි, දුග්ගතිං නුපපජ්ජහං.

45. ‘‘තෙවීසතිකප්පසතෙ, සුනෙලො නාම ඛත්තියො;

සත්තරතනසම්පන්නො, එකො ආසිං මහබ්බලො.

46. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මුට්ඨිපූජකො ථෙරො ඉමා ගාථායො අභාසිත්ථාති.

මුට්ඨිපූජකත්ථෙරස්සාපදානං අට්ඨමං.

9. කිංකණිකපුප්ඵියත්ථෙරඅපදානං

47. ‘‘සුමඞ්ගලොති නාමෙන, සයම්භූ අපරාජිතො;

පවනා නික්ඛමිත්වාන, නගරං පාවිසී ජිනො.

48. ‘‘පිණ්ඩචාරං චරිත්වාන, නික්ඛම්ම නගරා මුනි;

කතකිච්චොව සම්බුද්ධො, සො වසී වනමන්තරෙ.

49. ‘‘කිංකණිපුප්ඵං පග්ගය්හ, බුද්ධස්ස අභිරොපයිං;

පසන්නචිත්තො සුමනො, සයම්භුස්ස මහෙසිනො.

50. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

51. ‘‘ඡළාසීතිම්හිතො කප්පෙ, අපිලාසිසනාමකො;

සත්තරතනසම්පන්නො, චක්කවත්තී මහබ්බලො.

52. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිංකණිකපුප්ඵියො ථෙරො ඉමා ගාථායො අභාසිත්ථාති.

කිංකණිකපුප්ඵියත්ථෙරස්සාපදානං නවමං.

10. යූථිකපුප්ඵියත්ථෙරඅපදානං

53. ‘‘පදුමුත්තරො නාම ජිනො, ආහුතීනං පටිග්ගහො;

පවනා නික්ඛමිත්වාන, විහාරං යාති චක්ඛුමා.

54. ‘‘උභො හත්ථෙහි පග්ගය්හ, යූථිකං පුප්ඵමුත්තමං;

බුද්ධස්ස අභිරොපයිං, මෙත්තචිත්තස්ස තාදිනො.

55. ‘‘තෙන චිත්තප්පසාදෙන, අනුභොත්වාන සම්පදා;

කප්පානං සතසහස්සං, දුග්ගතිං නුපපජ්ජහං.

56. ‘‘ඉතො පඤ්ඤාසකප්පෙසු, එකො ආසිං ජනාධිපො;

සමිත්තනන්දනො නාම, චක්කවත්තී මහබ්බලො.

57. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා යූථිකපුප්ඵියො ථෙරො ඉමා ගාථායො අභාසිත්ථාති;

යූථිකපුප්ඵියත්ථෙරස්සාපදානං දසමං.

තමාලපුප්ඵියවග්ගො වීසතිමො.

තස්සුද්දානං –

තමාලතිණසන්ථාරො, ඛණ්ඩඵුල්ලි අසොකියො;

අඞ්කොලකී කිසලයො, තින්දුකො නෙලපුප්ඵියො;

කිංකණිකො යූථිකො ච, ගාථා පඤ්ඤාස අට්ඨ චාති.

අථ වග්ගුද්දානං –

භික්ඛාදායී පරිවාරො, සෙරෙය්‍යො සොභිතො තථා;

ඡත්තඤ්ච බන්ධුජීවී ච, සුපාරිචරියොපි ච.

කුමුදො කුටජො චෙව, තමාලි දසමො කතො;

ඡසතානි ච ගාථානි, ඡසට්ඨි ච තතුත්තරි.

භික්ඛාවග්ගදසකං.