9. සොපාකත්ථෙරඅපදානං

112. ‘‘පබ්භාරං සොධයන්තස්ස [සෙවයන්තස්ස (සී. ක.)], විපිනෙ පබ්බතුත්තමෙ;

සිද්ධත්ථො නාම භගවා, ආගච්ඡි මම සන්තිකං.

113. ‘‘බුද්ධං උපගතං දිස්වා, ලොකජෙට්ඨස්ස තාදිනො;

සන්ථරං සන්ථරිත්වාන [පඤ්ඤපෙත්වාන (ස්‍යා. අට්ඨ)], පුප්ඵාසනමදාසහං.

114. ‘‘පුප්ඵාසනෙ නිසීදිත්වා, සිද්ධත්ථො ලොකනායකො;

මමඤ්ච ගතිමඤ්ඤාය, අනිච්චතමුදාහරි.

115. ‘‘‘අනිච්චා වත සඞ්ඛාරා, උප්පාදවයධම්මිනො;

උප්පජ්ජිත්වා නිරුජ්ඣන්ති, තෙසං වූපසමො සුඛො’.

116. ‘‘ඉදං වත්වාන සබ්බඤ්ඤූ, ලොකජෙට්ඨො නරාසභො;

නභං අබ්භුග්ගමි වීරො, හංසරාජාව අම්බරෙ.

117. ‘‘සකං දිට්ඨිං ජහිත්වාන, භාවයානිච්චසඤ්ඤහං;

එකාහං භාවයිත්වාන, තත්ථ කාලං කතො අහං.

118. ‘‘ද්වෙ සම්පත්තී අනුභොත්වා, සුක්කමූලෙන චොදිතො;

පච්ඡිමෙ භවෙ සම්පත්තෙ, සපාකයොනුපාගමිං.

119. ‘‘අගාරා අභිනික්ඛම්ම, පබ්බජිං අනගාරියං;

ජාතියා සත්තවස්සොහං, අරහත්තමපාපුණිං.

120. ‘‘ආරද්ධවීරියො පහිතත්තො, සීලෙසු සුසමාහිතො;

තොසෙත්වාන මහානාගං, අලත්ථං උපසම්පදං.

121. ‘‘චතුන්නවුතිතො කප්පෙ, යං කම්මමකරිං තදා;

දුග්ගතිං නාභිජානාමි, පුප්ඵදානස්සිදං ඵලං.

122. ‘‘චතුන්නවුතිතො කප්පෙ, යං සඤ්ඤං භාවයිං තදා;

තං සඤ්ඤං භාවයන්තස්ස, පත්තො මෙ ආසවක්ඛයො.

123. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා සොපාකො ථෙරො ඉමා ගාථායො අභාසිත්ථාති.

සොපාකත්ථෙරස්සාපදානං නවමං.