2. සීහාසනියවග්ගො

1. සීහාසනදායකත්ථෙරඅපදානං

1. ‘‘නිබ්බුතෙ ලොකනාථම්හි, සිද්ධත්ථෙ ද්විපදුත්තමෙ [දිපදුත්තමෙ (සී. ස්‍යා.)];

විත්ථාරිකෙ පාවචනෙ, බාහුජඤ්ඤම්හි සාසනෙ.

2. ‘‘පසන්නචිත්තො සුමනො, සීහාසනමකාසහං;

සීහාසනං කරිත්වාන, පාදපීඨමකාසහං.

3. ‘‘සීහාසනෙ ච වස්සන්තෙ, ඝරං තත්ථ අකාසහං;

තෙන චිත්තප්පසාදෙන, තුසිතං උපපජ්ජහං.

4. ‘‘ආයාමෙන චතුබ්බීස, යොජනං ආසි [යොජනාසිංසු (ස්‍යා. ක.)] තාවදෙ;

විමානං සුකතං මය්හං, විත්ථාරෙන චතුද්දස.

5. ‘‘සතං [සත්ත (ස්‍යා.)] කඤ්ඤාසහස්සානි, පරිවාරෙන්ති මං සදා;

සොණ්ණමයඤ්ච පල්ලඞ්කං, බ්‍යම්හෙ ආසි සුනිම්මිතං.

6. ‘‘හත්ථියානං අස්සයානං, දිබ්බයානං උපට්ඨිතං;

පාසාදා සිවිකා චෙව, නිබ්බත්තන්ති යදිච්ඡකං.

7. ‘‘මණිමයා ච පල්ලඞ්කා, අඤ්ඤෙ සාරමයා බහූ;

නිබ්බත්තන්ති මමං සබ්බෙ, සීහාසනස්සිදං ඵලං.

8. ‘‘සොණ්ණමයා රූපිමයා, ඵලිකාවෙළුරියාමයා;

පාදුකා අභිරූහාමි, පාදපීඨස්සිදං ඵලං.

9. ‘‘චතුන්නවුතිතො [චතුනවුතෙ ඉතො (සී. ස්‍යා.)] කප්පෙ, යං කම්මමකරිං තදා;

දුග්ගතිං නාභිජානාමි, පුඤ්ඤකම්මස්සිදං ඵලං.

10. ‘‘තෙසත්තතිම්හිතො කප්පෙ, ඉන්දනාමා තයො ජනා;

ද්වෙසත්තතිම්හිතො කප්පෙ, තයො සුමනනාමකා.

11. ‘‘සමසත්තතිතො කප්පෙ, තයො වරුණනාමකා;

සත්තරතනසම්පන්නා, චතුදීපම්හි ඉස්සරා.

12. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා සීහාසනදායකො ථෙරො ඉමා ගාථායො අභාසිත්ථාති.

සීහාසනදායකත්ථෙරස්සාපදානං පඨමං.

2. එකත්ථම්භිකත්ථෙරඅපදානං

13. ‘‘සිද්ධත්ථස්ස භගවතො, මහාපූගගණො අහු;

සරණං ගතා ච තෙ බුද්ධං, සද්දහන්ති තථාගතං.

14. ‘‘සබ්බෙ සඞ්ගම්ම මන්තෙත්වා, මාළං කුබ්බන්ති සත්ථුනො;

එකත්ථම්භං අලභන්තා, විචිනන්ති බ්‍රහාවනෙ.

15. ‘‘තෙහං අරඤ්ඤෙ දිස්වාන, උපගම්ම ගණං තදා;

අඤ්ජලිං පග්ගහෙත්වාන, පරිපුච්ඡිං ගණං අහං.

16. ‘‘තෙ මෙ පුට්ඨා වියාකංසු, සීලවන්තො උපාසකා;

මාළං මයං කත්තුකාමා, එකත්ථම්භො න ලබ්භති.

17. ‘‘එකත්ථම්භං මමං දෙථ, අහං දස්සාමි සත්ථුනො;

ආහරිස්සාමහං ථම්භං, අප්පොස්සුක්කා භවන්තු තෙ [භවන්තු වො (සී.), භවාථ වො (?)].

18. ‘‘තෙ මෙ ථම්භං පවෙච්ඡිංසු, පසන්නා තුට්ඨමානසා;

තතො පටිනිවත්තිත්වා, අගමංසු සකං ඝරං.

19. ‘‘අචිරං ගතෙ පූගගණෙ, ථම්භං අහාසහං තදා;

හට්ඨො හට්ඨෙන චිත්තෙන, පඨමං උස්සපෙසහං.

20. ‘‘තෙන චිත්තප්පසාදෙන, විමානං උපපජ්ජහං;

උබ්බිද්ධං භවනං මය්හං, සත්තභූමං [සතභූමං (සී. ක.)] සමුග්ගතං.

21. ‘‘වජ්ජමානාසු භෙරීසු, පරිචාරෙමහං සදා;

පඤ්චපඤ්ඤාසකප්පම්හි, රාජා ආසිං යසොධරො.

22. ‘‘තත්ථාපි භවනං මය්හං, සත්තභූමං සමුග්ගතං;

කූටාගාරවරූපෙතං, එකත්ථම්භං මනොරමං.

23. ‘‘එකවීසතිකප්පම්හි, උදෙනො නාම ඛත්තියො;

තත්‍රාපි භවනං මය්හං, සත්තභූමං සමුග්ගතං.

24. ‘‘යං යං යොනුපපජ්ජාමි, දෙවත්තං අථ මානුසං;

අනුභොමි සුඛං සබ්බං [සබ්බමෙතං (ස්‍යා.)], එකත්ථම්භස්සිදං ඵලං.

25. ‘‘චතුන්නවුතිතො කප්පෙ, යං ථම්භමදදං තදා;

දුග්ගතිං නාභිජානාමි, එකත්ථම්භස්සිදං ඵලං.

26. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා එකත්ථම්භිකො ථෙරො ඉමා ගාථායො අභාසිත්ථාති.

එකත්ථම්භිකත්ථෙරස්සාපදානං දුතියං.

3. නන්දත්ථෙරඅපදානං

27. ‘‘පදුමුත්තරස්ස භගවතො, ලොකජෙට්ඨස්ස තාදිනො;

වත්ථං ඛොමං මයා දින්නං, සයම්භුස්ස මහෙසිනො.

28. ‘‘තං මෙ බුද්ධො වියාකාසි, ජලජුත්තරනාමකො;

‘ඉමිනා වත්ථදානෙන, හෙමවණ්ණො භවිස්සසි.

29. ‘‘‘ද්වෙ සම්පත්තී අනුභොත්වා, කුසලමූලෙහි චොදිතො;

ගොතමස්ස භගවතො, කනිට්ඨො ත්වං භවිස්සසි.

30. ‘‘‘රාගරත්තො සුඛසීලො, කාමෙසු ගෙධමායුතො;

බුද්ධෙන චොදිතො සන්තො, තදා [තතො (ස්‍යා.)] ත්වං පබ්බජිස්සසි.

31. ‘‘‘පබ්බජිත්වාන ත්වං තත්ථ, කුසලමූලෙන චොදිතො;

සබ්බාසවෙ පරිඤ්ඤාය, නිබ්බායිස්සසිනාසවො’.

32. ‘‘සත්ත [සත (ස්‍යා.)] කප්පසහස්සම්හි, චතුරො චෙළනාමකා;

සට්ඨි කප්පසහස්සම්හි, උපචෙලා චතුජ්ජනා.

33. ‘‘පඤ්ච කප්පසහස්සම්හි, චෙළාව චතුරො ජනා;

සත්තරතනසම්පන්නා, චතුදීපම්හි ඉස්සරා.

34. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා නන්දො ථෙරො ඉමා ගාථායො අභාසිත්ථාති.

නන්දත්ථෙරස්සාපදානං තතියං.

4. චූළපන්ථකත්ථෙරඅපදානං

35. ‘‘පදුමුත්තරො නාම ජිනො, ආහුතීනං පටිග්ගහො;

ගණම්හා වූපකට්ඨො සො, හිමවන්තෙ වසී තදා.

36. ‘‘අහම්පි හිමවන්තම්හි, වසාමි අස්සමෙ තදා;

අචිරාගතං මහාවීරං, උපෙසිං ලොකනායකං.

37. ‘‘පුප්ඵච්ඡත්තං ගහෙත්වාන, උපගච්ඡිං නරාසභං;

සමාධිං සමාපජ්ජන්තං, අන්තරායමකාසහං.

38. ‘‘උභො හත්ථෙහි පග්ගය්හ, පුප්ඵච්ඡත්තං අදාසහං;

පටිග්ගහෙසි භගවා, පදුමුත්තරො මහාමුනි.

39. ‘‘සබ්බෙ දෙවා අත්තමනා, හිමවන්තං උපෙන්ති තෙ;

සාධුකාරං පවත්තෙසුං, අනුමොදිස්සති චක්ඛුමා.

40. ‘‘ඉදං වත්වාන තෙ දෙවා, උපගච්ඡුං නරුත්තමං;

ආකාසෙ ධාරයන්තස්ස [ධාරයන්තං මෙ (ක), ධාරයතො මෙ (?)], පදුමච්ඡත්තමුත්තමං.

41. ‘‘සතපත්තඡත්තං පග්ගය්හ, අදාසි තාපසො මම;

‘තමහං කිත්තයිස්සාමි, සුණාථ මම භාසතො.

42. ‘‘‘පඤ්චවීසතිකප්පානි, දෙවරජ්ජං කරිස්සති;

චතුත්තිංසතික්ඛත්තුඤ්ච, චක්කවත්තී භවිස්සති.

43. ‘‘‘යං යං යොනිං සංසරති, දෙවත්තං අථ මානුසං;

අබ්භොකාසෙ පතිට්ඨන්තං, පදුමං ධාරයිස්සති’.

44. ‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන [නාමෙන (සී. ක.)], සත්ථා ලොකෙ භවිස්සති.

45. ‘‘‘පකාසිතෙ පාවචනෙ, මනුස්සත්තං ලභිස්සති;

මනොමයම්හි කායම්හි, උත්තමො සො භවිස්සති.

46. ‘‘‘ද්වෙ භාතරො භවිස්සන්ති, උභොපි පන්ථකව්හයා;

අනුභොත්වා උත්තමත්ථං, ජොතයිස්සන්ති සාසනං’.

47. ‘‘සොහං අට්ඨාරසවස්සො [සො අට්ඨාරසවස්සොහං (ස්‍යා.)], පබ්බජිං අනගාරියං;

විසෙසාහං න වින්දාමි, සක්‍යපුත්තස්ස සාසනෙ.

48. ‘‘දන්ධා මය්හං ගතී ආසි, පරිභූතො පුරෙ අහුං [අහං (ස්‍යා.)];

භාතා ච මං පණාමෙසි, ගච්ඡ දානි සකං ඝරං.

49. ‘‘සොහං පණාමිතො සන්තො, සඞ්ඝාරාමස්ස කොට්ඨකෙ;

දුම්මනො තත්ථ අට්ඨාසිං, සාමඤ්ඤස්මිං අපෙක්ඛවා.

50. ‘‘භගවා තත්ථ [අථෙත්ථ සත්ථා (සී. ස්‍යා.)] ආගච්ඡි, සීසං මය්හං පරාමසි;

බාහාය මං ගහෙත්වාන, සඞ්ඝාරාමං පවෙසයි.

51. ‘‘අනුකම්පාය මෙ සත්ථා, අදාසි පාදපුඤ්ඡනිං;

එවං සුද්ධං අධිට්ඨෙහි, එකමන්තමධිට්ඨහං.

52. ‘‘හත්ථෙහි තමහං ගය්හ, සරිං කොකනදං අහං;

තත්ථ චිත්තං විමුච්චි මෙ, අරහත්තං අපාපුණිං.

53. ‘‘මනොමයෙසු කායෙසු, සබ්බත්ථ පාරමිං ගතො;

සබ්බාසවෙ පරිඤ්ඤාය, විහරාමි අනාසවො.

54. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා චූළපන්ථකො [චුල්ලපන්ථකො (සී. ස්‍යා.)] ථෙරො ඉමා ගාථායො අභාසිත්ථාති.

චූළපන්ථකත්ථෙරස්සාපදානං චතුත්ථං.

5. පිලින්දවච්ඡත්ථෙරඅපදානං

55. ‘‘නිබ්බුතෙ ලොකනාථම්හි, සුමෙධෙ අග්ගපුග්ගලෙ;

පසන්නචිත්තො සුමනො, ථූපපූජං අකාසහං.

56. ‘‘යෙ ච ඛීණාසවා තත්ථ, ඡළභිඤ්ඤා මහිද්ධිකා;

තෙහං තත්ථ සමානෙත්වා, සඞ්ඝභත්තං අකාසහං.

57. ‘‘සුමෙධස්ස භගවතො, උපට්ඨාකො තදා අහු;

සුමෙධො නාම නාමෙන, අනුමොදිත්ථ සො තදා.

58. ‘‘තෙන චිත්තප්පසාදෙන, විමානං උපපජ්ජහං;

ඡළාසීතිසහස්සානි, අච්ඡරායො රමිංසු මෙ.

59. ‘‘මමෙව අනුවත්තන්ති, සබ්බකාමෙහි තා සදා;

අඤ්ඤෙ දෙවෙ අභිභොමි, පුඤ්ඤකම්මස්සිදං ඵලං.

60. ‘‘පඤ්චවීසතිකප්පම්හි, වරුණො නාම ඛත්තියො;

විසුද්ධභොජනො [සුසුද්ධභොජනො (සී.)] ආසිං, චක්කවත්තී අහං තදා.

61. ‘‘න තෙ බීජං පවපන්ති, නපි නීයන්ති නඞ්ගලා;

අකට්ඨපාකිමං සාලිං, පරිභුඤ්ජන්ති මානුසා.

62. ‘‘තත්ථ රජ්ජං කරිත්වාන, දෙවත්තං පුන ගච්ඡහං;

තදාපි එදිසා මය්හං, නිබ්බත්තා භොගසම්පදා.

63. ‘‘න මං මිත්තා අමිත්තා වා, හිංසන්ති සබ්බපාණිනො;

සබ්බෙසම්පි පියො හොමි, පුඤ්ඤකම්මස්සිදං ඵලං.

64. ‘‘තිංසකප්පසහස්සම්හි, යං දානමදදිං තදා;

දුග්ගතිං නාභිජානාමි, ගන්ධාලෙපස්සිදං ඵලං.

65. ‘‘ඉමස්මිං භද්දකෙ කප්පෙ, එකො ආසිං ජනාධිපො;

මහානුභාවො රාජාහං [රාජීසි (ස්‍යා. ක.)], චක්කවත්තී මහබ්බලො.

66. ‘‘සොහං පඤ්චසු සීලෙසු, ඨපෙත්වා ජනතං බහුං;

පාපෙත්වා සුගතිංයෙව, දෙවතානං පියො අහුං.

67. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පිලින්දවච්ඡො [පිලින්දිවච්ඡො (සී.)] ථෙරො ඉමා ගාථායො අභාසිත්ථාති.

පිලින්දවච්ඡත්ථෙරස්සාපදානං පඤ්චමං.