7. සොවණ්ණවටංසකියත්ථෙරඅපදානං

34. ‘‘උය්‍යානභූමිං නිය්‍යන්තො, අද්දසං ලොකනායකං;

වටංසකං ගහෙත්වාන, සොවණ්ණං සාධුනිම්මිතං.

35. ‘‘සීඝං තතො සමාරුය්හ, හත්ථික්ඛන්ධගතො අහං;

බුද්ධස්ස අභිරොපෙසිං, සිඛිනො ලොකබන්ධුනො.

36. ‘‘එකත්තිංසෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, පුප්ඵපූජායිදං ඵලං.

37. ‘‘සත්තවීසෙ ඉතො කප්පෙ, එකො ආසිං ජනාධිපො;

මහාපතාපනාමෙන, චක්කවත්තී මහබ්බලො.

38. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සොවණ්ණවටංසකියො ථෙරො ඉමා ගාථායො අභාසිත්ථාති.

සොවණ්ණවටංසකියත්ථෙරස්සාපදානං සත්තමං.