6. අඞ්කොලපුප්ඵියත්ථෙරඅපදානං

29. ‘‘නාරදො [වරදො (ක.)] ඉති මෙ නාමං, කස්සපො ඉති මං විදූ;

අද්දසං සමණානග්ගං, විපස්සිං දෙවසක්කතං.

30. ‘‘අනුබ්‍යඤ්ජනධරං බුද්ධං, ආහුතීනං පටිග්ගහං;

අඞ්කොලපුප්ඵං [වකුලපුප්ඵං (ස්‍යා.), බකොලපුප්ඵං (ක.)] පග්ගය්හ, බුද්ධස්ස අභිරොපයිං.

31. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

32. ‘‘චතුසත්තතිතො කප්පෙ, රොමසො නාම ඛත්තියො;

ආමුක්කමාලාභරණො, සයොග්ගබලවාහනො.

33. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අඞ්කොලපුප්ඵියො [වකුලපුප්ඵියො (ස්‍යා.), බකොලපුප්ඵියො (ක.)] ථෙරො ඉමා ගාථායො අභාසිත්ථාති.

අඞ්කොලපුප්ඵියත්ථෙරස්සාපදානං ඡට්ඨං.