3. ද්වෙරතනියත්ථෙරඅපදානං

12. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

අද්දසං විරජං බුද්ධං, ආහුතීනං පටිග්ගහං.

13. ‘‘මංසපෙසි මයා දින්නා, විපස්සිස්ස මහෙසිනො;

සදෙවකස්මිං ලොකස්මිං, ඉස්සරං කාරයාමහං.

14. ‘‘ඉමිනා මංසදානෙන, රතනං නිබ්බත්තතෙ මම;

දුවෙමෙ රතනා ලොකෙ, දිට්ඨධම්මස්ස පත්තියා.

15. ‘‘තෙහං සබ්බෙ අනුභොමි, මංසදානස්ස සත්තියා;

ගත්තඤ්ච මුදුකං මය්හං, පඤ්ඤා නිපුණවෙදනී.

16. ‘‘එකනවුතිතො කප්පෙ, යං මංසමදදිං තදා;

දුග්ගතිං නාභිජානාමි, මංසදානස්සිදං ඵලං.

17. ‘‘ඉතො චතුත්ථකෙ කප්පෙ, එකො ආසිං ජනාධිපො;

මහාරොහිතනාමො සො, චක්කවත්තී මහබ්බලො.

18. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ද්වෙරතනියො [ද්විරතනියො (සී.)] ථෙරො ඉමා ගාථායො අභාසිත්ථාති.

ද්වෙරතනියත්ථෙරස්සාපදානං තතියං.

දසමං භාණවාරං.