10. තිවණ්ටිපුප්ඵියත්ථෙරඅපදානං

57. ‘‘අභිභූතං පනිජ්ඣන්ති [අභිභූතොපනිජ්ඣන්ති (සී.)], සබ්බෙ සඞ්ගම්ම තෙ මමං [අභිභුං ථෙරං පනිජ්ඣාම, සබ්බෙ සඞ්ගම්ම තෙ මයං (ස්‍යා.)];

තෙසං නිජ්ඣායමානානං, පරිළාහො අජායථ.

58. ‘‘සුනන්දො නාම නාමෙන, බුද්ධස්ස සාවකො තදා;

ධම්මදස්සිස්ස මුනිනො, ආගච්ඡි මම සන්තිකං.

59. ‘‘යෙ මෙ බද්ධචරා ආසුං, තෙ මෙ පුප්ඵං අදුං තදා;

තාහං පුප්ඵං ගහෙත්වාන, සාවකෙ අභිරොපයිං.

60. ‘‘සොහං කාලංකතො තත්ථ, පුනාපි උපපජ්ජහං;

අට්ඨාරසෙ කප්පසතෙ, විනිපාතං න ගච්ඡහං.

61. ‘‘තෙරසෙතො කප්පසතෙ, අට්ඨාසුං ධූමකෙතුනො;

සත්තරතනසම්පන්නා, චක්කවත්තී මහබ්බලා.

62. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිවණ්ටිපුප්ඵියො ථෙරො ඉමා ගාථායො අභාසිත්ථාති;

තිවණ්ටිපුප්ඵියත්ථෙරස්සාපදානං දසමං.

කුටජපුප්ඵියවග්ගො එකූනවීසතිමො.