19. කුටජපුප්ඵියවග්ගො

1. කුටජපුප්ඵියත්ථෙරඅපදානං

1. ‘‘සුවණ්ණවණ්ණං සම්බුද්ධං, සතරංසිංව උග්ගතං;

දිසං අනුවිලොකෙන්තං, ගච්ඡන්තං අනිලඤ්ජසෙ.

2. ‘‘කුටජං පුප්ඵිතං දිස්වා, සංවිත්ථතසමොත්ථතං;

රුක්ඛතො ඔචිනිත්වාන, ඵුස්සස්ස අභිරොපයිං.

3. ‘‘ද්වෙනවුතෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

4. ‘‘ඉතො සත්තරසෙ කප්පෙ, තයො ආසුං සුපුප්ඵිතා;

සත්තරතනසම්පන්නා, චක්කවත්තී මහබ්බලා.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා කුටජපුප්ඵියො ථෙරො ඉමා ගාථායො අභාසිත්ථාති.

කුටජපුප්ඵියත්ථෙරස්සාපදානං පඨමං.

2. බන්ධුජීවකත්ථෙරඅපදානං

6. ‘‘සිද්ධත්ථො නාම සම්බුද්ධො, සයම්භූ සබ්භි වණ්ණිතො;

සමාධිං සො සමාපන්නො, නිසීදි පබ්බතන්තරෙ.

7. ‘‘ජාතස්සරෙ ගවෙසන්තො, දකජං පුප්ඵමුත්තමං;

බන්ධුජීවකපුප්ඵානි, අද්දසං සමනන්තරං.

8. ‘‘උභො හත්ථෙහි පග්ගය්හ, උපාගච්ඡිං මහාමුනිං;

පසන්නචිත්තො සුමනො, සිද්ධත්ථස්සාභිරොපයිං.

9. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

10. ‘‘ඉතො චාතුද්දසෙ කප්පෙ, එකො ආසිං ජනාධිපො;

සමුද්දකප්පො නාමෙන, චක්කවත්තී මහබ්බලො.

11. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා බන්ධුජීවකො ථෙරො ඉමා ගාථායො අභාසිත්ථාති.

බන්ධුජීවකත්ථෙරස්සාපදානං දුතියං.

3. කොටුම්බරියත්ථෙරඅපදානං

12. ‘‘කණිකාරංව ජොතන්තං, නිසින්නං පබ්බතන්තරෙ;

අප්පමෙය්‍යංව උදධිං, විත්ථතං ධරණිං යථා.

13. ‘‘පූජිතං [පරෙතං (සී.)] දෙවසඞ්ඝෙන, නිසභාජානියං යථා;

හට්ඨො හට්ඨෙන චිත්තෙන, උපාගච්ඡිං නරුත්තමං.

14. ‘‘සත්තපුප්ඵානි පග්ගය්හ, කොටුම්බරසමාකුලං;

බුද්ධස්ස අභිරොපෙසිං, සිඛිනො ලොකබන්ධුනො.

15. ‘‘එකත්තිංසෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

16. ‘‘ඉතො වීසතිකප්පම්හි, මහානෙලසනාමකො;

එකො ආසි මහාතෙජො, චක්කවත්තී මහබ්බලො.

17. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කොටුම්බරියො ථෙරො ඉමා ගාථායො අභාසිත්ථාති.

කොටුම්බරියත්ථෙරස්සාපදානං තතියං.

4. පඤ්චහත්ථියත්ථෙරඅපදානං

18. ‘‘තිස්සො නාමාසි භගවා, ලොකජෙට්ඨො නරාසභො;

පුරක්ඛතො සාවකෙහි, රථියං පටිපජ්ජථ.

19. ‘‘පඤ්ච උප්පලහත්ථා ච, චාතුරා ඨපිතා මයා;

ආහුතිං දාතුකාමොහං, පග්ගණ්හිං වතසිද්ධියා [පුත්තොම්හි හිතසිද්ධියා (ස්‍යා.)].

20. ‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;

බුද්ධරංසීහි ඵුට්ඨොස්මි [බුද්ධරංස්‍යාභිඵුට්ඨොම්හි (සී.), බුද්ධරංසාභිඝුට්ඨොස්මි (ක.)], පූජෙසිං ද්විපදුත්තමං.

21. ‘‘ද්වෙනවුතෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

22. ‘‘ඉතො තෙරසකප්පම්හි, පඤ්ච සුසභසම්මතා;

සත්තරතනසම්පන්නා, චක්කවත්තී මහබ්බලා.

23. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පඤ්චහත්ථියො ථෙරො ඉමා ගාථායො අභාසිත්ථාති.

පඤ්චහත්ථියත්ථෙරස්සාපදානං චතුත්ථං.

5. ඉසිමුග්ගදායකත්ථෙරඅපදානං

24. ‘‘උදෙන්තං සතරංසිංව, පීතරංසිංව [සිතරංසිංව (සී.)] භාණුමං;

කකුධං විලසන්තංව, පදුමුත්තරනායකං.

25. ‘‘ඉසිමුග්ගානි පිසිත්වා [ඉසිසුග්ගානි පිංසෙත්වා (සී.), ඉසිමුග්ගං නිමන්තෙත්වා (ස්‍යා.)], මධුඛුද්දෙ අනීළකෙ;

පාසාදෙව ඨිතො සන්තො, අදාසිං ලොකබන්ධුනො.

26. ‘‘අට්ඨසතසහස්සානි, අහෙසුං බුද්ධසාවකා;

සබ්බෙසං පත්තපූරෙන්තං [පත්තපූරං තං (සී.)], තතො චාපි බහුත්තරං.

27. ‘‘තෙන චිත්තප්පසාදෙන, සුක්කමූලෙන චොදිතො;

කප්පානං සතසහස්සං, දුග්ගතිං නුපපජ්ජහං.

28. ‘‘චත්තාලීසම්හි සහස්සෙ, කප්පානං අට්ඨතිංස තෙ;

ඉසිමුග්ගසනාමා [මහිසමන්තනාමා (ස්‍යා.)] තෙ, චක්කවත්තී මහබ්බලා.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඉසිමුග්ගදායකො ථෙරො ඉමා ගාථායො අභාසිත්ථාති.

ඉසිමුග්ගදායකත්ථෙරස්සාපදානං පඤ්චමං.

6. බොධිඋපට්ඨාකත්ථෙරඅපදානං

30. ‘‘නගරෙ රම්මවතියා, ආසිං මුරජවාදකො;

නිච්චුපට්ඨානයුත්තොම්හි, ගතොහං බොධිමුත්තමං.

31. ‘‘සායං පාතං උපට්ඨිත්වා, සුක්කමූලෙන චොදිතො;

අට්ඨාරසකප්පසතෙ, දුග්ගතිං නුපපජ්ජහං.

32. ‘‘පන්නරසෙ කප්පසතෙ, ඉතො ආසිං ජනාධිපො;

මුරජො [දමථො (ස්‍යා.)] නාම නාමෙන, චක්කවත්තී මහබ්බලො.

33. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා බොධිඋපට්ඨාකො ථෙරො ඉමා ගාථායො අභාසිත්ථාති.

බොධිඋපට්ඨාකත්ථෙරස්සාපදානං ඡට්ඨං.

7. එකචින්තිකත්ථෙරඅපදානං

34. ‘‘යදා දෙවො [දෙවා (ක.)] දෙවකායා, චවතෙ [චවන්ති (ක.)] ආයුසඞ්ඛයා;

තයො සද්දා නිච්ඡරන්ති, දෙවානං අනුමොදතං.

35. ‘ඉතො භො සුගතිං ගච්ඡ, මනුස්සානං සහබ්‍යතං;

මනුස්සභූතො සද්ධම්මෙ, ලභ සද්ධං අනුත්තරං.

36. ‘‘‘සා තෙ සද්ධා නිවිට්ඨාස්ස, මූලජාතා පතිට්ඨිතා;

යාවජීවං අසංහීරා, සද්ධම්මෙ සුප්පවෙදිතෙ.

37. ‘‘‘කායෙන කුසලං කත්වා, වාචාය කුසලං බහුං;

මනසා කුසලං කත්වා, අබ්‍යාපජ්ජං [අබ්‍යාපජ්ඣං (ස්‍යා.), අප්පමාණං (ඉතිවුත්තකෙ 83)] නිරූපධිං.

38. ‘‘‘තතො ඔපධිකං පුඤ්ඤං, කත්වා දානෙන තං බහුං;

අඤ්ඤෙපි මච්චෙ සද්ධම්මෙ, බ්‍රහ්මචරියෙ නිවෙසය’.

39. ‘‘ඉමාය අනුකම්පාය, දෙවා දෙවං යදා විදූ;

චවන්තං අනුමොදන්ති, එහි දෙව පුනප්පුනං [දෙවපුරං පුන (ස්‍යා.)].

40. ‘‘සංවෙගො මෙ [සංවිග්ගොහං (ස්‍යා.)] තදා ආසි, දෙවසඞ්ඝෙ සමාගතෙ;

කංසු නාම අහං යොනිං, ගමිස්සාමි ඉතො චුතො.

41. ‘‘මම සංවෙගමඤ්ඤාය, සමණො භාවිතින්ද්‍රියො;

මමුද්ධරිතුකාමො සො, ආගච්ඡි මම සන්තිකං.

42. ‘‘සුමනො නාම නාමෙන, පදුමුත්තරසාවකො;

අත්ථධම්මානුසාසිත්වා, සංවෙජෙසි මමං තදා.

43. ‘‘තස්සාහං වචනං සුත්වා, බුද්ධෙ චිත්තං පසාදයිං;

තං ධීරං අභිවාදෙත්වා, තත්ථ කාලංකතො අහං.

44. ‘‘උපපජ්ජිං ස [උපපජ්ජිස්සං (සී.)] තත්ථෙව, සුක්කමූලෙන චොදිතො;

කප්පානං සතසහස්සං, දුග්ගතිං නුපපජ්ජහං.

45. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකචින්තිකො ථෙරො ඉමා ගාථායො අභාසිත්ථාති.

එකචින්තිකත්ථෙරස්සාපදානං සත්තමං.

8. තිකණ්ණිපුප්ඵියත්ථෙරඅපදානං

46. ‘‘දෙවභූතො අහං සන්තො, අච්ඡරාහි පුරක්ඛතො;

පුබ්බකම්මං සරිත්වාන, බුද්ධසෙට්ඨං අනුස්සරිං.

47. ‘‘තිකණ්ණිපුප්ඵං [කිංකණිපුප්ඵං (ක.)] පග්ගය්හ, සකං චිත්තං පසාදයිං;

බුද්ධම්හි අභිරොපෙසිං, විපස්සිම්හි නරාසභෙ.

48. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

49. ‘‘තෙසත්තතිම්හිතො කප්පෙ, චතුරාසුං රමුත්තමා;

සත්තරතනසම්පන්නා, චක්කවත්තී මහබ්බලා.

50. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිකණ්ණිපුප්ඵියො [කිංකණිකපුප්ඵියො (ක.)] ථෙරො ඉමා ගාථායො අභාසිත්ථාති.

තිකණ්ණිපුප්ඵියත්ථෙරස්සාපදානං අට්ඨමං.

9. එකචාරියත්ථෙරඅපදානං

51. ‘‘තාවතිංසෙසු දෙවෙසු, මහාඝොසො තදා අහු;

බුද්ධො ච ලොකෙ නිබ්බාති, මයඤ්චම්හ සරාගිනො.

52. ‘‘තෙසං සංවෙගජාතානං, සොකසල්ලසමඞ්ගිනං;

සබලෙන උපත්ථද්ධො, අගමං බුද්ධසන්තිකං.

53. ‘‘මන්දාරවං ගහෙත්වාන, සඞ්ගීති [සණ්හිතං (සී.), සඞ්ගිතං (ස්‍යා.)] අභිනිම්මිතං;

පරිනිබ්බුතකාලම්හි, බුද්ධස්ස අභිරොපයිං.

54. ‘‘සබ්බෙ දෙවානුමොදිංසු, අච්ඡරායො ච මෙ තදා;

කප්පානං සතසහස්සං, දුග්ගතිං නුපපජ්ජහං.

55. ‘‘සට්ඨිකප්පසහස්සම්හි, ඉතො සොළස තෙ ජනා;

මහාමල්ලජනා නාම, චක්කවත්තී මහබ්බලා.

56. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකචාරියො ථෙරො ඉමා ගාථායො අභාසිත්ථාති.

එකචාරියත්ථෙරස්සාපදානං නවමං.

10. තිවණ්ටිපුප්ඵියත්ථෙරඅපදානං

57. ‘‘අභිභූතං පනිජ්ඣන්ති [අභිභූතොපනිජ්ඣන්ති (සී.)], සබ්බෙ සඞ්ගම්ම තෙ මමං [අභිභුං ථෙරං පනිජ්ඣාම, සබ්බෙ සඞ්ගම්ම තෙ මයං (ස්‍යා.)];

තෙසං නිජ්ඣායමානානං, පරිළාහො අජායථ.

58. ‘‘සුනන්දො නාම නාමෙන, බුද්ධස්ස සාවකො තදා;

ධම්මදස්සිස්ස මුනිනො, ආගච්ඡි මම සන්තිකං.

59. ‘‘යෙ මෙ බද්ධචරා ආසුං, තෙ මෙ පුප්ඵං අදුං තදා;

තාහං පුප්ඵං ගහෙත්වාන, සාවකෙ අභිරොපයිං.

60. ‘‘සොහං කාලංකතො තත්ථ, පුනාපි උපපජ්ජහං;

අට්ඨාරසෙ කප්පසතෙ, විනිපාතං න ගච්ඡහං.

61. ‘‘තෙරසෙතො කප්පසතෙ, අට්ඨාසුං ධූමකෙතුනො;

සත්තරතනසම්පන්නා, චක්කවත්තී මහබ්බලා.

62. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිවණ්ටිපුප්ඵියො ථෙරො ඉමා ගාථායො අභාසිත්ථාති;

තිවණ්ටිපුප්ඵියත්ථෙරස්සාපදානං දසමං.

කුටජපුප්ඵියවග්ගො එකූනවීසතිමො.