1. කුටජපුප්ඵියත්ථෙරඅපදානං

1. ‘‘සුවණ්ණවණ්ණං සම්බුද්ධං, සතරංසිංව උග්ගතං;

දිසං අනුවිලොකෙන්තං, ගච්ඡන්තං අනිලඤ්ජසෙ.

2. ‘‘කුටජං පුප්ඵිතං දිස්වා, සංවිත්ථතසමොත්ථතං;

රුක්ඛතො ඔචිනිත්වාන, ඵුස්සස්ස අභිරොපයිං.

3. ‘‘ද්වෙනවුතෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

4. ‘‘ඉතො සත්තරසෙ කප්පෙ, තයො ආසුං සුපුප්ඵිතා;

සත්තරතනසම්පන්නා, චක්කවත්තී මහබ්බලා.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා කුටජපුප්ඵියො ථෙරො ඉමා ගාථායො අභාසිත්ථාති.

කුටජපුප්ඵියත්ථෙරස්සාපදානං පඨමං.