2. බන්ධුජීවකත්ථෙරඅපදානං

6. ‘‘සිද්ධත්ථො නාම සම්බුද්ධො, සයම්භූ සබ්භි වණ්ණිතො;

සමාධිං සො සමාපන්නො, නිසීදි පබ්බතන්තරෙ.

7. ‘‘ජාතස්සරෙ ගවෙසන්තො, දකජං පුප්ඵමුත්තමං;

බන්ධුජීවකපුප්ඵානි, අද්දසං සමනන්තරං.

8. ‘‘උභො හත්ථෙහි පග්ගය්හ, උපාගච්ඡිං මහාමුනිං;

පසන්නචිත්තො සුමනො, සිද්ධත්ථස්සාභිරොපයිං.

9. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

10. ‘‘ඉතො චාතුද්දසෙ කප්පෙ, එකො ආසිං ජනාධිපො;

සමුද්දකප්පො නාමෙන, චක්කවත්තී මහබ්බලො.

11. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා බන්ධුජීවකො ථෙරො ඉමා ගාථායො අභාසිත්ථාති.

බන්ධුජීවකත්ථෙරස්සාපදානං දුතියං.