9. වෙය්‍යාවච්චකත්ථෙරඅපදානං
51. ‘‘විපස්සිස්ස භගවතො, මහාපූගගණො අහු;
වෙය්‍යාවච්චකරො ආසිං, සබ්බකිච්චෙසු වාවටො [බ්‍යාවටො (සී. ස්‍යා.)].
52. ‘‘දෙය්‍යධම්මො ච මෙ නත්ථි, සුගතස්ස මහෙසිනො;
අවන්දිං සත්ථුනො පාදෙ, විප්පසන්නෙන චෙතසා.
53. ‘‘එකනවුතිතො කප්පෙ, වෙය්‍යාවච්චං අකාසහං;
දුග්ගතිං නාභිජානාමි, වෙය්‍යාවච්චස්සිදං ඵලං.
54. ‘‘ඉතො ච අට්ඨමෙ කප්පෙ, රාජා ආසිං සුචින්තිතො;
සත්තරතනසම්පන්නො, චක්කවත්තී මහබ්බලො.
55. ‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා වෙය්‍යාවච්චකො ථෙරො ඉමා ගාථායො අභාසිත්ථාති.
වෙය්‍යාවච්චකත්ථෙරස්සාපදානං නවමං.