3. අඩ්ඪචෙළකත්ථෙරඅපදානං

14. ‘‘තිස්සස්සාහං භගවතො, උපඩ්ඪදුස්සමදාසහං;

පරමකාපඤ්ඤපත්තොම්හි [පරමකාරුඤ්ඤපත්තොම්හි (ස්‍යා. ක.)], දුග්ගතෙන [දුග්ගන්ධෙන (සී.)] සමප්පිතො.

15. ‘‘උපඩ්ඪදුස්සං දත්වාන, කප්පං සග්ගම්හි මොදහං;

අවසෙසෙසු කප්පෙසු, කුසලං කාරිතං මයා.

16. ‘‘ද්වෙනවුතෙ ඉතො කප්පෙ, යං දුස්සමදදිං තදා;

දුග්ගතිං නාභිජානාමි, දුස්සදානස්සිදං ඵලං.

17. ‘‘එකූනපඤ්ඤාසකප්පම්හි [එකපඤ්ඤාසකප්පම්හි (ස්‍යා.)], රාජානො චක්කවත්තිනො;

සමන්තච්ඡදනා නාම, බාත්තිංසාසුං [ඛත්තියාසුං (ස්‍යා. ක.)] ජනාධිපා.

18. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අඩ්ඪචෙළකො ථෙරො ඉමා ගාථායො අභාසිත්ථාති.

අඩ්ඪචෙළකත්ථෙරස්සාපදානං තතියං.