4. සූචිදායකත්ථෙරඅපදානං

19. ‘‘කම්මාරොහං පුරෙ ආසිං, බන්ධුමායං පුරුත්තමෙ;

සූචිදානං මයා දින්නං, විපස්සිස්ස මහෙසිනො.

20. ‘‘වජිරග්ගසමං ඤාණං, හොති කම්මෙන තාදිසං;

විරාගොම්හි විමුත්තොම්හි [විභවොම්හි විභත්තොම්හි (ක.)], පත්තොම්හි ආසවක්ඛයං.

21. ‘‘අතීතෙ ච භවෙ සබ්බෙ, වත්තමානෙ චනාගතෙ [අතීතා ච භවා සබ්බෙ, වත්තමානා ච’නාගතා (ස්‍යා. ක.)];

ඤාණෙන විචිනිං සබ්බං, සූචිදානස්සිදං ඵලං.

22. ‘‘එකනවුතිතො කප්පෙ, සත්තාසුං වජිරව්හයා;

සත්තරතනසම්පන්නා, චක්කවත්තී මහබ්බලා.

23. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සූචිදායකො ථෙරො ඉමා ගාථායො අභාසිත්ථාති.

සූචිදායකත්ථෙරස්සාපදානං චතුත්ථං.