(2) උප්පාදුප්පන්නවාරො

85. (ක) යං චිත්තං උප්පජ්ජති තං චිත්තං උප්පන්නන්ති? ආමන්තා.

(ඛ) යං වා පන චිත්තං උප්පන්නං තං චිත්තං උප්පජ්ජතීති?

භඞ්ගක්ඛණෙ චිත්තං උප්පන්නං, නො ච තං චිත්තං උප්පජ්ජති. උප්පාදක්ඛණෙ චිත්තං උප්පන්නඤ්චෙව උප්පජ්ජති ච.

(ක) යං චිත්තං න උප්පජ්ජති තං චිත්තං න උප්පන්නන්ති?

භඞ්ගක්ඛණෙ චිත්තං න උප්පජ්ජති, නො ච තං චිත්තං න උප්පන්නං. අතීතානාගතං චිත්තං න චෙව උප්පජ්ජති න ච උප්පන්නං.

(ඛ) යං වා පන චිත්තං න උප්පන්නං තං චිත්තං න උප්පජ්ජතීති? ආමන්තා.