(3) නිරොධුප්පන්නවාරො

86. (ක) යං චිත්තං නිරුජ්ඣති තං චිත්තං උප්පන්නන්ති? ආමන්තා.

(ඛ) යං වා පන චිත්තං උප්පන්නං තං චිත්තං නිරුජ්ඣතීති?

උප්පාදක්ඛණෙ චිත්තං උප්පන්නං, නො ච තං චිත්තං නිරුජ්ඣති. භඞ්ගක්ඛණෙ චිත්තං උප්පන්නඤ්චෙව නිරුජ්ඣති ච.

(ක) යං චිත්තං න නිරුජ්ඣති තං චිත්තං න උප්පන්නන්ති?

උප්පාදක්ඛණෙ චිත්තං න නිරුජ්ඣති, නො ච තං චිත්තං න උප්පන්නං. අතීතානාගතං චිත්තං න චෙව නිරුජ්ඣති න ච උප්පන්නං.

(ඛ) යං වා පන චිත්තං න උප්පන්නං තං චිත්තං න නිරුජ්ඣතීති? ආමන්තා.