(35. ක) අයොනිසො මනසිකාරො

936. තත්ථ කතමො අයොනිසො මනසිකාරො? අනිච්චෙ ‘‘නිච්ච’’න්ති අයොනිසො මනසිකාරො, දුක්ඛෙ ‘‘සුඛ’’න්ති අයොනිසො මනසිකාරො, අනත්තනි ‘‘අත්තා’’ති අයොනිසො මනසිකාරො, අසුභෙ ‘‘සුභ’’න්ති අයොනිසො මනසිකාරො, සච්චවිප්පටිකුලෙන වා චිත්තස්ස ආවට්ටනා අනාවට්ටනා ආභොගො සමන්නාහාරො මනසිකාරො – අයං වුච්චති ‘‘අයොනිසො මනසිකාරො’’.

(ඛ) කුම්මග්ගසෙවනා

තත්ථ කතමා කුම්මග්ගසෙවනා? තත්ථ කතමො කුම්මග්ගො? මිච්ඡාදිට්ඨි, මිච්ඡාසඞ්කප්පො, මිච්ඡාවාචා, මිච්ඡාකම්මන්තො, මිච්ඡාආජීවො, මිච්ඡාවායාමො, මිච්ඡාසති, මිච්ඡාසමාධි – අයං වුච්චති ‘‘කුම්මග්ගො’’. යා ඉමස්ස කුම්මග්ගස්ස සෙවනා නිසෙවනා සංසෙවනා භජනා සම්භජනා භත්ති සම්භත්ති තංසම්පවඞ්කතා – අයං වුච්චති ‘‘කුම්මග්ගසෙවනා’’.

(ග) චෙතසො ච ලීනත්තං

තත්ථ කතමං චෙතසො ච ලීනත්තං? යා චිත්තස්ස අකල්‍යතා අකම්මඤ්ඤතා ඔලීයනා සල්ලීයනා ලීනං ලීයනා ලීයිතත්තං ථිනං ථියනා ථියිතත්තං චිත්තස්ස – ඉදං වුච්චති ‘‘චෙතසො ච ලීනත්තං’’.

තිකං.