(3) තිස්සො අකුසලසඤ්ඤා
911. තත්ථ කතමා තිස්සො අකුසලසඤ්ඤා? කාමසඤ්ඤා, බ්‍යාපාදසඤ්ඤා, විහිංසාසඤ්ඤා.
(ක) තත්ථ කතමා කාමසඤ්ඤා? කාමපටිසංයුත්තා සඤ්ඤා සඤ්ජානනා සඤ්ජානිතත්තං – අයං වුච්චති ‘‘කාමසඤ්ඤා’’.
(ඛ) තත්ථ කතමා බ්‍යාපාදසඤ්ඤා? බ්‍යාපාදපටිසංයුත්තා සඤ්ඤා සඤ්ජානනා සඤ්ජානිතත්තං – අයං වුච්චති ‘‘බ්‍යාපාදසඤ්ඤා’’.
(ග) තත්ථ කතමා විහිංසාසඤ්ඤා? විහිංසාපටිසංයුත්තා සඤ්ඤා සඤ්ජානනා සඤ්ජානිතත්තං – අයං වුච්චති ‘‘විහිංසාසඤ්ඤා’’. ඉමා තිස්සො අකුසලසඤ්ඤා.