1-6. පටිච්චවාරාදි
පච්චයචතුක්කං
හෙතුපච්චයාදි
44. හෙතුං අබ්‍යාකතං ධම්මං පටිච්ච හෙතු අබ්‍යාකතො ධම්මො උප්පජ්ජති හෙතුපච්චයා. හෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති හෙතුපච්චයා. හෙතුං අබ්‍යාකතං ධම්මං පටිච්ච හෙතු අබ්‍යාකතො ච නහෙතු අබ්‍යාකතො ච ධම්මා උප්පජ්ජන්ති හෙතුපච්චයා. (3)
45. නහෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති හෙතුපච්චයා… තීණි.
හෙතුං අබ්‍යාකතඤ්ච නහෙතුං අබ්‍යාකතඤ්ච ධම්මං පටිච්ච හෙතු අබ්‍යාකතො ධම්මො උප්පජ්ජති හෙතුපච්චයා… තීණි.
46. හෙතුං අබ්‍යාකතං ධම්මං පටිච්ච හෙතු අබ්‍යාකතො ධම්මො උප්පජ්ජති ආරම්මණපච්චයා (සංඛිත්තං).
47. හෙතුයා නව, ආරම්මණෙ නව, අධිපතියා නව, අනන්තරෙ නව, සමනන්තරෙ නව, සහජාතෙ නව, අඤ්ඤමඤ්ඤෙ නව, නිස්සයෙ නව, උපනිස්සයෙ නව, පුරෙජාතෙ නව, ආසෙවනෙ නව, කම්මෙ නව, විපාකෙ නව, ආහාරෙ නව, ඉන්ද්‍රියෙ නව, ඣානෙ නව, මග්ගෙ නව, සම්පයුත්තෙ නව, විප්පයුත්තෙ නව, අත්ථියා නව, නත්ථියා නව, විගතෙ නව, අවිගතෙ නව (අනුලොමං).
නහෙතු-නආරම්මණපච්චයා
48. නහෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නහෙතුපච්චයා. (1)
49. හෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නආරම්මණපච්චයා. (1)
නහෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නආරම්මණපච්චයා. (1)
හෙතුං අබ්‍යාකතඤ්ච නහෙතුං අබ්‍යාකතඤ්ච ධම්මං පටිච්ච නහෙතු අබ්‍යාකතො ධම්මො උප්පජ්ජති නආරම්මණපච්චයා. (1)
නඅධිපතිපච්චයාදි
50. හෙතුං අබ්‍යාකතං ධම්මං පටිච්ච හෙතු අබ්‍යාකතො ධම්මො උප්පජ්ජති නඅධිපතිපච්චයා… නව…පෙ….
51. හෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නකම්මපච්චයා. (1)
නහෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නකම්මපච්චයා. (1)
හෙතුං අබ්‍යාකතඤ්ච නහෙතුං අබ්‍යාකතඤ්ච ධම්මං පටිච්ච නහෙතු අබ්‍යාකතො ධම්මො උප්පජ්ජති නකම්මපච්චයා. (1)
52. නහෙතුං අබ්‍යාකතං ධම්මං පටිච්ච නහෙතු අබ්‍යාකතො ධම්මො උප්පජ්ජති නආහාරපච්චයා… නඉන්ද්‍රියපච්චයා… නඣානපච්චයා (සංඛිත්තං).
53. නහෙතුයා එකං, නආරම්මණෙ තීණි, නඅධිපතියා නව, නඅනන්තරෙ තීණි, නසමනන්තරෙ තීණි, නඅඤ්ඤමඤ්ඤෙ තීණි, නඋපනිස්සයෙ තීණි, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ නව, නොනත්ථියා තීණි, නොවිගතෙ තීණි (පච්චනීයං).
හෙතුපච්චයා නආරම්මණෙ තීණි, නඅධිපතියා නව (සංඛිත්තං, අනුලොමපච්චනීයං).
නහෙතුපච්චයා ආරම්මණෙ එකං (සංඛිත්තං, පච්චනීයානුලොමං).
(සහජාතවාරොපි පච්චයවාරොපි නිස්සයවාරොපි සංසට්ඨවාරොපි සම්පයුත්තවාරොපි පටිච්චවාරසදිසා විත්ථාරෙතබ්බා.)