7. පඤ්හාවාරො
පච්චයචතුක්කං
හෙතුපච්චයො
54. හෙතු අබ්‍යාකතො ධම්මො හෙතුස්ස අබ්‍යාකතස්ස ධම්මස්ස හෙතුපච්චයෙන පච්චයො. හෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස හෙතුපච්චයෙන පච්චයො. හෙතු අබ්‍යාකතො ධම්මො හෙතුස්ස අබ්‍යාකතස්ස ච නහෙතුස්ස අබ්‍යාකතස්ස ච ධම්මස්ස හෙතුපච්චයෙන පච්චයො. (3)
ආරම්මණපච්චයාදි
55. හෙතු අබ්‍යාකතො ධම්මො හෙතුස්ස අබ්‍යාකතස්ස ධම්මස්ස ආරම්මණපච්චයෙන පච්චයො… නව.
56. හෙතු අබ්‍යාකතො ධම්මො හෙතුස්ස අබ්‍යාකතස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි.
නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි.
හෙතු අබ්‍යාකතො ච නහෙතු අබ්‍යාකතො ච ධම්මා හෙතුස්ස අබ්‍යාකතස්ස ධම්මස්ස අධිපතිපච්චයෙන පච්චයො – ආරම්මණාධිපති… තීණි…පෙ….
පුරෙජාතපච්චයාදි
57. නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස පුරෙජාතපච්චයෙන පච්චයො… තීණි.
58. හෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස පච්ඡාජාතපච්චයෙන පච්චයො. (1)
නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස පච්ඡාජාතපච්චයෙන පච්චයො. (1)
හෙතු අබ්‍යාකතො ච නහෙතු අබ්‍යාකතො ච ධම්මා නහෙතුස්ස අබ්‍යාකතස්ස ධම්මස්ස පච්ඡාජාතපච්චයෙන පච්චයො. (1)
59. නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස කම්මපච්චයෙන පච්චයො… තීණි.
60. හෙතු අබ්‍යාකතො ධම්මො හෙතුස්ස අබ්‍යාකතස්ස ධම්මස්ස විපාකපච්චයෙන පච්චයො… නව.
61. නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස ආහාරපච්චයෙන පච්චයො… ඉන්ද්‍රියපච්චයෙන පච්චයො… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො.
විප්පයුත්තපච්චයො
62. හෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස විප්පයුත්තපච්චයෙන පච්චයො. (1)
නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස විප්පයුත්තපච්චයෙන පච්චයො… තීණි.
හෙතු අබ්‍යාකතො ච නහෙතු අබ්‍යාකතො ච ධම්මා නහෙතුස්ස අබ්‍යාකතස්ස ධම්මස්ස විප්පයුත්තපච්චයෙන පච්චයො. (1) (සංඛිත්තං.)
63. හෙතුයා තීණි, ආරම්මණෙ නව, අධිපතියා නව, අනන්තරෙ නව, සමනන්තරෙ නව, සහජාතෙ නව, අඤ්ඤමඤ්ඤෙ නව, නිස්සයෙ නව, උපනිස්සයෙ නව, පුරෙජාතෙ තීණි, පච්ඡාජාතෙ තීණි, ආසෙවනෙ නව, කම්මෙ තීණි, විපාකෙ නව, ආහාරෙ තීණි, ඉන්ද්‍රියෙ නව, ඣානෙ තීණි, මග්ගෙ නව, සම්පයුත්තෙ නව, විප්පයුත්තෙ පඤ්ච, අත්ථියා නව, නත්ථියා නව, විගතෙ නව, අවිගතෙ නව.
පච්චනීයුද්ධාරො
64. හෙතු අබ්‍යාකතො ධම්මො හෙතුස්ස අබ්‍යාකතස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො. හෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පච්ඡාජාතපච්චයෙන පච්චයො. හෙතු අබ්‍යාකතො ධම්මො හෙතුස්ස අබ්‍යාකතස්ස ච නහෙතුස්ස අබ්‍යාකතස්ස ච ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො. (3)
65. නහෙතු අබ්‍යාකතො ධම්මො නහෙතුස්ස අබ්‍යාකතස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පුරෙජාතපච්චයෙන පච්චයො… පච්ඡාජාතපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො.
66. නහෙතුයා නව, නආරම්මණෙ නව, නඅධිපතියා නව (සංඛිත්තං, පච්චනීයං).
හෙතුපච්චයා නආරම්මණෙ තීණි (සංඛිත්තං, අනුලොමපච්චනීයං).
නහෙතුපච්චයා ආරම්මණෙ නව (සංඛිත්තං, පච්චනීයානුලොමං).
(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)
හෙතුදුකකුසලත්තිකං නිට්ඨිතං.