၈. သဟဓမ္မိကဝဂ္ဂေါ

၁၇၂. ဘိက္ခူဟိ သဟဓမ္မိကံ ဝုစ္စမာနော – ‘‘န တာဝါဟံ၊ အာဝုသော၊ ဧတသ္မိံ သိက္ခာပဒေ သိက္ခိဿာမိ ယာဝ န အညံ ဘိက္ခုံ ဗျတ္တံ ဝိနယဓရံ ပရိပုစ္ဆိဿာမီ’’တိ ဘဏန္တော ဒွေ အာပတ္တိယော အာပဇ္ဇတိ. ဘဏတိ၊ ပယောဂေ ဒုက္ကဋံ၊ ဘဏိတေ အာပတ္တိ ပါစိတ္တိယဿ.

ဝိနယံ ဝိဝဏ္ဏေန္တော ဒွေ အာပတ္တိယော အာပဇ္ဇတိ. ဝိဝဏ္ဏေတိ၊ ပယောဂေ ဒုက္ကဋံ၊ ဝိဝဏ္ဏိတေ အာပတ္တိ ပါစိတ္တိယဿ.

မောဟေန္တော ဒွေ အာပတ္တိယော အာပဇ္ဇတိ. အနာရောပိတေ မောဟေ မောဟေတိ၊ အာပတ္တိ ဒုက္ကဋဿ၊ အာရောပိတေ မောဟေ မောဟေတိ၊ အာပတ္တိ ပါစိတ္တိယဿ.

ဘိက္ခုဿ ကုပိတော အနတ္တမနော ပဟာရံ ဒေန္တော ဒွေ အာပတ္တိယော အာပဇ္ဇတိ. ပဟရတိ၊ ပယောဂေ ဒုက္ကဋံ၊ ပဟတေ အာပတ္တိ ပါစိတ္တိယဿ.

ဘိက္ခုဿ ကုပိတော အနတ္တမနော တလသတ္တိကံ ဥဂ္ဂိရန္တော ဒွေ အာပတ္တိယော အာပဇ္ဇတိ. ဥဂ္ဂိရတိ၊ ပယောဂေ ဒုက္ကဋံ၊ ဥဂ္ဂိရိတေ အာပတ္တိ ပါစိတ္တိယဿ.

ဘိက္ခုံ အမူလကေန သံဃာဒိသေသေန အနုဒ္ဓံသေန္တော ဒွေ အာပတ္တိယော အာပဇ္ဇတိ. အနုဒ္ဓံသေတိ၊ ပယောဂေ ဒုက္ကဋံ၊ အနုဒ္ဓံသိတေ အာပတ္တိ ပါစိတ္တိယဿ.

ဘိက္ခုဿ သဉ္စိစ္စ ကုက္ကုစ္စံ ဥပဒဟန္တော ဒွေ အာပတ္တိယော အာပဇ္ဇတိ. ဥပဒဟတိ၊ ပယောဂေ ဒုက္ကဋံ၊ ဥပဒဟိတေ အာပတ္တိ ပါစိတ္တိယဿ.

ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝါဒါပန္နာနံ ဥပဿုတိံ တိဋ္ဌန္တော ဒွေ အာပတ္တိယော အာပဇ္ဇတိ. ‘‘သောဿာမီ’’တိ ဂစ္ဆတိ၊ အာပတ္တိ ဒုက္ကဋဿ၊ ယတ္ထ ဌိတော သုဏာတိ၊ အာပတ္တိ ပါစိတ္တိယဿ.

ဓမ္မိကာနံ ကမ္မာနံ ဆန္ဒံ ဒတွာ ပစ္ဆာ ခီယနဓမ္မံ အာပဇ္ဇန္တော ဒွေ အာပတ္တိယော အာပဇ္ဇတိ. ခိယျတိ၊ ပယောဂေ ဒုက္ကဋံ၊ ခိယျိတေ အာပတ္တိ ပါစိတ္တိယဿ.

သံဃေ ဝိနိစ္ဆယကထာယ ဝတ္တမာနာယ ဆန္ဒံ အဒတွာ ဥဋ္ဌာယာသနာ ပက္ကမန္တော ဒွေ အာပတ္တိယော အာပဇ္ဇတိ. ပရိသာယ ဟတ္ထပါသံ ဝိဇဟန္တဿ အာပတ္တိ ဒုက္ကဋဿ၊ ဝိဇဟိတေ အာပတ္တိ ပါစိတ္တိယဿ.

သမဂ္ဂေန သံဃေန စီဝရံ ဒတွာ ပစ္ဆာ ခီယနဓမ္မံ အာပဇ္ဇန္တော ဒွေ အာပတ္တိယော အာပဇ္ဇတိ. ခိယျတိ၊ ပယောဂေ ဒုက္ကဋံ၊ ခိယျိတေ အာပတ္တိ ပါစိတ္တိယဿ.

ဇာနံ သံဃိကံ လာဘံ ပရိဏတံ ပုဂ္ဂလဿ ပရိဏာမေန္တော ဒွေ အာပတ္တိယော အာပဇ္ဇတိ. ပရိဏာမေတိ၊ ပယောဂေ ဒုက္ကဋံ၊ ပရိဏာမိတေ အာပတ္တိ ပါစိတ္တိယဿ.

သဟဓမ္မိကဝဂ္ဂေါ အဋ္ဌမော.