၂. ကတာပတ္တိဝါရော
၁. ပါရာဇိကကဏ္ဍံ
၁၅၇. မေထုနံ ဓမ္မံ ပဋိသေဝန္တော ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝန္တော တိဿော အာပတ္တိယော အာပဇ္ဇတိ. အက္ခာယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ပါရာဇိကဿ၊ ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ထုလ္လစ္စယဿ၊ ဝဋ္ဋကတေ [ဝိဝဋကတေ (သျာ.)] မုခေ အစ္ဆုပန္တံ အင်္ဂဇာတံ ပဝေသေတိ၊ အာပတ္တိ ဒုက္ကဋဿ – မေထုနံ ဓမ္မံ ပဋိသေဝန္တော ဣမာ တိဿော အာပတ္တိယော အာပဇ္ဇတိ.
၁၅၈. အဒိန္နံ အာဒိယန္တော ကတိ အာပတ္တိယော အာပဇ္ဇတိ? အဒိန္နံ အာဒိယန္တော တိဿော အာပတ္တိယော အာပဇ္ဇတိ. ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ပါရာဇိကဿ၊ အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ထုလ္လစ္စယဿ၊ မာသကံ ဝါ ဦနမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ဒုက္ကဋဿ – အဒိန္နံ အာဒိယန္တော ဣမာ တိဿော အာပတ္တိယော အာပဇ္ဇတိ.
၁၅၉. သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော ကတိ အာပတ္တိယော အာပဇ္ဇတိ? သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော တိဿော အာပတ္တိယော အာပဇ္ဇတိ. မနုဿံ ဩဒိဿ ဩပါတံ ခဏတိ ‘‘ပပတိတွာ မရိဿတီ’’တိ၊ အာပတ္တိ ဒုက္ကဋဿ၊ ပပတိတေ ဒုက္ခာ ဝေဒနာ ဥပ္ပဇ္ဇတိ၊ အာပတ္တိ ထုလ္လစ္စယဿ၊ မရတိ၊ အာပတ္တိ ပါရာဇိကဿ – သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော ဣမာ တိဿော အာပတ္တိယော အာပဇ္ဇတိ.
၁၆၀. အသန္တံ အဘူတံ ဥတ္တရိမနုဿဓမ္မံ ဥလ္လပန္တော ကတိ အာပတ္တိယော အာပဇ္ဇတိ? အသန္တံ အဘူတံ ဥတ္တရိမနုဿဓမ္မံ ဥလ္လပန္တော တိဿော အာပတ္တိယော အာပဇ္ဇတိ. ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာပတ္တိ ပါရာဇိကဿ၊ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိ ဘဏတိ၊ ပဋိဝိဇာနန္တဿ အာပတ္တိ ထုလ္လစ္စယဿ၊ န ပဋိဝိဇာနန္တဿ အာပတ္တိ ဒုက္ကဋဿ – အသန္တံ အဘူတံ ဥတ္တရိမနုဿဓမ္မံ ဥလ္လပန္တော ဣမာ တိဿော အာပတ္တိယော အာပဇ္ဇတိ.
စတ္တာရော ပါရာဇိကာ နိဋ္ဌိတာ.
၂. သံဃာဒိသေသကဏ္ဍံ
၁၆၁. ဥပက္ကမိတွာ အသုစိံ မောစေန္တော တိဿော အာပတ္တိယော အာပဇ္ဇတိ. စေတေတိ ဥပက္ကမတိ မုစ္စတိ၊ အာပတ္တိ သံဃာဒိသေသဿ၊ စေတေတိ ဥပက္ကမတိ န မုစ္စတိ၊ အာပတ္တိ ထုလ္လစ္စယဿ၊ ပယောဂေ ဒုက္ကဋံ.
မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော တိဿော အာပတ္တိယော အာပဇ္ဇတိ. ကာယေန ကာယံ အာမသတိ၊ အာပတ္တိ သံဃာဒိသေသဿ၊ ကာယေန ကာယပဋိဗဒ္ဓံ အာမသတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓေန ကာယပဋိဗဒ္ဓံ အာမသတိ၊ အာပတ္တိ ဒုက္ကဋဿ.
မာတုဂါမံ ဒုဋ္ဌုလ္လာဟိ ဝါစာဟိ ဩဘာသေန္တော တိဿော အာပတ္တိယော အာပဇ္ဇတိ. ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ၊ အဝဏ္ဏမ္ပိ ဘဏတိ၊ အာပတ္တိ သံဃာဒိသေသဿ၊ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ၊ အာပတ္တိ ဒုက္ကဋဿ.
အတ္တကာမပါရိစရိယာ ဝဏ္ဏံ ဘာသန္တော တိဿော အာပတ္တိယော အာပဇ္ဇတိ. မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ သံဃာဒိသေသဿ၊ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ထုလ္လစ္စယဿ၊ တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ဒုက္ကဋဿ.
သဉ္စရိတ္တံ သမာပဇ္ဇန္တော တိဿော အာပတ္တိယော အာပဇ္ဇတိ. ပဋိဂ္ဂဏှာတိ ဝီမံသတိ ပစ္စာဟရတိ၊ အာပတ္တိ သံဃာဒိသေသဿ၊ ပဋိဂ္ဂဏှာတိ ဝီမံသတိ န ပစ္စာဟရတိ၊ အာပတ္တိ ထုလ္လစ္စယဿ၊ ပဋိဂ္ဂဏှာတိ န ဝီမံသတိ န ပစ္စာဟရတိ၊ အာပတ္တိ ဒုက္ကဋဿ.
သညာစိကာယ ကုဋိံ ကာရာပေန္တော တိဿော အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ၊ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ၊ အာပတ္တိ သံဃာဒိသေသဿ.
မဟလ္လကံ ဝိဟာရံ ကာရာပေန္တော တိဿော အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ၊ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ၊ အာပတ္တိ သံဃာဒိသေသဿ.
ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တော တိဿော အာပတ္တိယော အာပဇ္ဇတိ. အနောကာသံ ကာရာပေတွာ စာဝနာဓိပ္ပါယော ဝဒေတိ၊ အာပတ္တိ သံဃာဒိသေသေန ဒုက္ကဋဿ၊ ဩကာသံ ကာရာပေတွာ အက္ကောသာဓိပ္ပါယော ဝဒေတိ၊ အာပတ္တိ ဩမသဝါဒဿ.
ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တော တိဿော အာပတ္တိယော အာပဇ္ဇတိ. အနောကာသံ ကာရာပေတွာ စာဝနာဓိပ္ပါယော ဝဒေတိ၊ အာပတ္တိ သံဃာဒိသေသေန ဒုက္ကဋဿ၊ ဩကာသံ ကာရာပေတွာ အက္ကောသာဓိပ္ပါယော ဝဒေတိ၊ အာပတ္တိ ဩမသဝါဒဿ.
သံဃဘေဒကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇန္တော တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.
ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ [သမနုဘာသိယမာနာ (သျာ.)] န ပဋိနိဿဇ္ဇန္တာ တိဿော အာပတ္တိယော အာပဇ္ဇန္တိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.
ဒုဗ္ဗစော ဘိက္ခု ယာဝတတိယံ သမနုဘာသနာယ [သမနုဘာသိယမာနော (သျာ.)] န ပဋိနိဿဇ္ဇန္တော တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.
ကုလဒူသကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇန္တော တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.
တေရသ သံဃာဒိသေသာ နိဋ္ဌိတာ.
၃. နိဿဂ္ဂိယကဏ္ဍံ
၁. ကထိနဝဂ္ဂေါ
၁၆၂. အတိရေကစီဝရံ ဒသာဟံ အတိက္ကာမေန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
ဧကရတ္တံ တိစီဝရေန ဝိပ္ပဝသန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
အကာလစီဝရံ ပဋိဂ္ဂဟေတွာ မာသံ အတိက္ကာမေန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
အညာတိကာယ ဘိက္ခုနိယာ ပုရာဏစီဝရံ ဓောဝါပေန္တော ဒွေ အာပတ္တိယော အာပဇ္ဇတိ. ဓောဝါပေတိ၊ ပယောဂေ ဒုက္ကဋံ၊ ဓောဝါပိတေ နိဿဂ္ဂိယံ ပါစိတ္တိယံ.
အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဏှန္တော ဒွေ အာပတ္တိယော အာပဇ္ဇတိ. ဂဏှာတိ၊ ပယောဂေ ဒုက္ကဋံ၊ ဂဟိတေ နိဿဂ္ဂိယံ ပါစိတ္တိယံ.
အညာတကံ ဂဟပတိံ ဝါ ဂဟပတာနိံ ဝါ စီဝရံ ဝိညာပေန္တော ဒွေ အာပတ္တိယော အာပဇ္ဇတိ. ဝိညာပေတိ၊ ပယောဂေ ဒုက္ကဋံ၊ ဝိညာပိတေ နိဿဂ္ဂိယံ ပါစိတ္တိယံ.
အညာတကံ ဂဟပတိံ ဝါ ဂဟပတာနိံ ဝါ တတုတ္တရိ စီဝရံ ဝိညာပေန္တော ဒွေ အာပတ္တိယော အာပဇ္ဇတိ. ဝိညာပေတိ၊ ပယောဂေ ဒုက္ကဋံ၊ ဝိညာပိတေ နိဿဂ္ဂိယံ ပါစိတ္တိယံ.
ပုဗ္ဗေ အပ္ပဝါရိတော အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ. ဝိကပ္ပံ အာပဇ္ဇတိ၊ ပယောဂေ ဒုက္ကဋံ၊ ဝိကပ္ပံ အာပန္နေ နိဿဂ္ဂိယံ ပါစိတ္တိယံ.
ပုဗ္ဗေ အပ္ပဝါရိတော အညာတကေ ဂဟပတိကေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ. ဝိကပ္ပံ အာပဇ္ဇတိ၊ ပယောဂေ ဒုက္ကဋံ၊ ဝိကပ္ပံ အာပန္နေ နိဿဂ္ဂိယံ ပါစိတ္တိယံ.
အတိရေကတိက္ခတ္တုံ စောဒနာယ အတိရေကဆက္ခတ္တုံ ဌာနေန စီဝရံ အဘိနိပ္ဖါဒေန္တော ဒွေ အာပတ္တိယော အာပဇ္ဇတိ. အဘိနိပ္ဖါဒေတိ၊ ပယောဂေ ဒုက္ကဋံ၊ အဘိနိပ္ဖါဒိတေ နိဿဂ္ဂိယံ ပါစိတ္တိယံ.
ကထိနဝဂ္ဂေါ ပဌမော.
၂. ကောသိယဝဂ္ဂေါ
၁၆၃. ကောသိယမိဿကံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ နိဿဂ္ဂိယံ ပါစိတ္တိယံ.
သုဒ္ဓကာဠကာနံ ဧဠကလောမာနံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ နိဿဂ္ဂိယံ ပါစိတ္တိယံ.
အနာဒိယိတွာ တုလံ ဩဒါတာနံ တုလံ ဂေါစရိယာနံ နဝံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ နိဿဂ္ဂိယံ ပါစိတ္တိယံ.
အနုဝဿံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ နိဿဂ္ဂိယံ ပါစိတ္တိယံ.
အနာဒိယိတွာ ပုရာဏသန္ထတဿ သာမန္တာ သုဂတဝိဒတ္ထိံ နဝံ နိသီဒနသန္ထတံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ နိဿဂ္ဂိယံ ပါစိတ္တိယံ.
ဧဠကလောမာနိ ပဋိဂ္ဂဟေတွာ တိယောဇနံ အတိက္ကာမေန္တော ဒွေ အာပတ္တိယော အာပဇ္ဇတိ. ပဌမံ ပါဒံ တိယောဇနံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ နိဿဂ္ဂိယံ ပါစိတ္တိယံ.
အညာတိကာယ ဘိက္ခုနိယာ ဧဠကလောမာနိ ဓောဝါပေန္တော ဒွေ အာပတ္တိယော အာပဇ္ဇတိ. ဓောဝါပေတိ၊ ပယောဂေ ဒုက္ကဋံ၊ ဓောဝါပိတေ နိဿဂ္ဂိယံ ပါစိတ္တိယံ.
ရူပိယံ ပဋိဂ္ဂဏှန္တော ဒွေ အာပတ္တိယော အာပဇ္ဇတိ. ဂဏှာတိ၊ ပယောဂေ ဒုက္ကဋံ၊ ဂဟိတေ နိဿဂ္ဂိယံ ပါစိတ္တိယံ.
နာနပ္ပကာရကံ ရူပိယသံဝေါဟာရံ သမာပဇ္ဇန္တော ဒွေ အာပတ္တိယော အာပဇ္ဇတိ. သမာပဇ္ဇတိ၊ ပယောဂေ ဒုက္ကဋံ၊ သမာပန္နေ နိဿဂ္ဂိယံ ပါစိတ္တိယံ.
နာနပ္ပကာရကံ ကယဝိက္ကယံ သမာပဇ္ဇန္တော ဒွေ အာပတ္တိယော အာပဇ္ဇတိ. သမာပဇ္ဇတိ၊ ပယောဂေ ဒုက္ကဋံ၊ သမာပန္နေ နိဿဂ္ဂိယံ ပါစိတ္တိယံ.
ကောသိယဝဂ္ဂေါ ဒုတိယော.
၃. ပတ္တဝဂ္ဂေါ
၁၆၄. အတိရေကပတ္တံ ဒသာဟံ အတိက္ကာမေန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေန္တော ဒွေ အာပတ္တိယော အာပဇ္ဇတိ. စေတာပေတိ၊ ပယောဂေ ဒုက္ကဋံ၊ စေတာပိတေ နိဿဂ္ဂိယံ ပါစိတ္တိယံ.
ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသန္တော ဒွေ အာပတ္တိယော အာပဇ္ဇတိ. ပရိယေသတိ၊ ပယောဂေ ဒုက္ကဋံ၊ ပရိယိဋ္ဌေ နိဿဂ္ဂိယံ ပါစိတ္တိယံ.
ဘိက္ခုဿ သာမံ စီဝရံ ဒတွာ ကုပိတော အနတ္တမနော အစ္ဆိန္ဒန္တော ဒွေ အာပတ္တိယော အာပဇ္ဇတိ. အစ္ဆိန္ဒတိ၊ ပယောဂေ ဒုက္ကဋံ၊ အစ္ဆိန္နေ နိဿဂ္ဂိယံ ပါစိတ္တိယံ.
သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေန္တော ဒွေ အာပတ္တိယော အာပဇ္ဇတိ. ဝါယာပေတိ၊ ပယောဂေ ဒုက္ကဋံ၊ ဝါယာပိတေ နိဿဂ္ဂိယံ ပါစိတ္တိယံ.
ပုဗ္ဗေ အပ္ပဝါရိတော အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ. ဝိကပ္ပံ အာပဇ္ဇတိ၊ ပယောဂေ ဒုက္ကဋံ၊ ဝိကပ္ပံ အာပန္နေ နိဿဂ္ဂိယံ ပါစိတ္တိယံ.
အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသန္တော ဧကံ အာပတ္တိံ အာပဇ္ဇတိ. နိဿဂ္ဂိယံ ပါစိတ္တိယံ.
ဇာနံ သံဃိကံ လာဘံ ပရိဏတံ အတ္တနော ပရိဏာမေန္တော ဒွေ အာပတ္တိယော အာပဇ္ဇတိ. ပရိဏာမေတိ၊ ပယောဂေ ဒုက္ကဋံ၊ ပရိဏာမိတေ နိဿဂ္ဂိယံ ပါစိတ္တိယံ.
ပတ္တဝဂ္ဂေါ တတိယော.
တိံသ နိဿဂ္ဂိယာ ပါစိတ္တိယာ နိဋ္ဌိတာ.
၄. ပါစိတ္တိယကဏ္ဍံ
၁. မုသာဝါဒဝဂ္ဂေါ
၁၆၅. သမ္ပဇာနမုသာဝါဒံ ဘာသန္တော ကတိ အာပတ္တိယော အာပဇ္ဇတိ? သမ္ပဇာနမုသာဝါဒံ ဘာသန္တော ပဉ္စ အာပတ္တိယော အာပဇ္ဇတိ. ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာပတ္တိ ပါရာဇိကဿ၊ ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေတိ၊ အာပတ္တိ သံဃာဒိသေသဿ၊ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိ ဘဏတိ၊ ပဋိဝိဇာနန္တဿ အာပတ္တိ ထုလ္လစ္စယဿ၊ န ပဋိဝိဇာနန္တဿ အာပတ္တိ ဒုက္ကဋဿ၊ သမ္ပဇာနမုသာဝါဒေ ပါစိတ္တိယံ – သမ္ပဇာနမုသာဝါဒံ ဘာသန္တော ဣမာ ပဉ္စ အာပတ္တိယော အာပဇ္ဇတိ.
ဩမသန္တော ဒွေ အာပတ္တိယော အာပဇ္ဇတိ. ဥပသမ္ပန္နံ ဩမသတိ၊ အာပတ္တိ ပါစိတ္တိယဿ၊ အနုပသမ္ပန္နံ ဩမသတိ၊ အာပတ္တိ ဒုက္ကဋဿ.
ပေသုညံ ဥပသံဟရန္တော ဒွေ အာပတ္တိယော အာပဇ္ဇတိ. ဥပသမ္ပန္နဿ ပေသုညံ ဥပသံဟရတိ၊ အာပတ္တိ ပါစိတ္တိယဿ၊ အနုပသမ္ပန္နဿ ပေသုညံ ဥပသံဟရတိ၊ အာပတ္တိ ဒုက္ကဋဿ.
အနုပသမ္ပန္နံ ပဒသော ဓမ္မံ ဝါစေန္တော ဒွေ အာပတ္တိယော အာပဇ္ဇတိ. ဝါစေတိ၊ ပယောဂေ ဒုက္ကဋံ၊ ပဒေ ပဒေ အာပတ္တိ ပါစိတ္တိယဿ.
အနုပသမ္ပန္နေန ဥတ္တရိဒိရတ္တတိရတ္တံ သဟသေယျံ ကပ္ပေန္တော ဒွေ အာပတ္တိယော အာပဇ္ဇတိ. နိပဇ္ဇတိ၊ ပယောဂေ ဒုက္ကဋံ၊ နိပန္နေ အာပတ္တိ ပါစိတ္တိယဿ.
မာတုဂါမေန သဟသေယျံ ကပ္ပေန္တော ဒွေ အာပတ္တိယော အာပဇ္ဇတိ. နိပဇ္ဇတိ၊ ပယောဂေ ဒုက္ကဋံ၊ နိပန္နေ အာပတ္တိ ပါစိတ္တိယဿ.
မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေန္တော ဒွေ အာပတ္တိယော အာပဇ္ဇတိ. ဒေသေတိ၊ ပယောဂေ ဒုက္ကဋံ၊ ပဒေ ပဒေ အာပတ္တိ ပါစိတ္တိယဿ.
အနုပသမ္ပန္နဿ ဥတ္တရိမနုဿဓမ္မံ ဘူတံ အာရောစေန္တော ဒွေ အာပတ္တိယော အာပဇ္ဇတိ. အာရောစေတိ၊ ပယောဂေ ဒုက္ကဋံ၊ အာရောစိတေ အာပတ္တိ ပါစိတ္တိယဿ.
ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေန္တော ဒွေ အာပတ္တိယော အာပဇ္ဇတိ. အာရောစေတိ၊ ပယောဂေ ဒုက္ကဋံ၊ အာရောစိတေ အာပတ္တိ ပါစိတ္တိယဿ.
ပထဝိံ ခဏန္တော ဒွေ အာပတ္တိယော အာပဇ္ဇတိ. ခဏတိ၊ ပယောဂေ ဒုက္ကဋံ၊ ပဟာရေ ပဟာရေ အာပတ္တိ ပါစိတ္တိယဿ.
မုသာဝါဒဝဂ္ဂေါ ပဌမော.
၂. ဘူတဂါမဝဂ္ဂေါ
၁၆၆. ဘူတဂါမံ ပါတေန္တော ဒွေ အာပတ္တိယော အာပဇ္ဇတိ. ပါတေတိ၊ ပယောဂေ ဒုက္ကဋံ၊ ပဟာရေ ပဟာရေ အာပတ္တိ ပါစိတ္တိယဿ.
အညေနညံ ပဋိစရန္တော ဒွေ အာပတ္တိယော အာပဇ္ဇတိ. အနာရောပိတေ အညဝါဒကေ အညေနညံ ပဋိစရတိ၊ အာပတ္တိ ဒုက္ကဋဿ၊ အာရောပိတေ အညဝါဒကေ အညေနညံ ပဋိစရတိ၊ အာပတ္တိ ပါစိတ္တိယဿ.
ဘိက္ခုံ ဥဇ္ဈာပေန္တော ဒွေ အာပတ္တိယော အာပဇ္ဇတိ. ဥဇ္ဈာပေတိ၊ ပယောဂေ ဒုက္ကဋံ၊ ဥဇ္ဈာပိတေ အာပတ္တိ ပါစိတ္တိယဿ.
သံဃိကံ မဉ္စံ ဝါ ပီဌံ ဝါ ဘိသိံ ဝါ ကောစ္ဆံ ဝါ အဇ္ဈောကာသေ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တော ဒွေ အာပတ္တိယော အာပဇ္ဇတိ. ပဌမံ ပါဒံ လေဍ္ဍုပါတံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.
သံဃိကေ ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တော ဒွေ အာပတ္တိယော အာပဇ္ဇတိ. ပဌမံ ပါဒံ ပရိက္ခေပံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.
သံဃိကေ ဝိဟာရေ ဇာနံ ပုဗ္ဗုပဂတံ ဘိက္ခုံ အနုပခဇ္ဇ သေယျံ ကပ္ပေန္တော ဒွေ အာပတ္တိယော အာပဇ္ဇတိ. နိပဇ္ဇတိ၊ ပယောဂေ ဒုက္ကဋံ၊ နိပန္နေ အာပတ္တိ ပါစိတ္တိယဿ.
ဘိက္ခုံ ကုပိတော အနတ္တမနော သံဃိကာ ဝိဟာရာ နိက္ကဍ္ဎေန္တော ဒွေ အာပတ္တိယော အာပဇ္ဇတိ. နိက္ကဍ္ဎတိ၊ ပယောဂေ ဒုက္ကဋံ၊ နိက္ကဍ္ဎိတေ အာပတ္တိ ပါစိတ္တိယဿ.
သံဃိကေ ဝိဟာရေ ဥပရိဝေဟာသကုဋိယာ အာဟစ္စပါဒကံ မဉ္စံ ဝါ ပီဌံ ဝါ အဘိနိသီဒန္တော ဒွေ အာပတ္တိယော အာပဇ္ဇတိ. အဘိနိသီဒတိ၊ ပယောဂေ ဒုက္ကဋံ၊ အဘိနိသိန္နေ အာပတ္တိ ပါစိတ္တိယဿ.
ဒွတ္တိပရိယာယေ အဓိဋ္ဌဟိတွာ တတုတ္တရိ အဓိဋ္ဌဟန္တော ဒွေ အာပတ္တိယော အာပဇ္ဇတိ. အဓိဋ္ဌေတိ၊ ပယောဂေ ဒုက္ကဋံ၊ အဓိဋ္ဌိတေ အာပတ္တိ ပါစိတ္တိယဿ.
ဇာနံ သပ္ပါဏကံ ဥဒကံ တိဏံ ဝါ မတ္တိကံ ဝါ သိဉ္စန္တော ဒွေ အာပတ္တိယော အာပဇ္ဇတိ. သိဉ္စတိ၊ ပယောဂေ ဒုက္ကဋံ၊ သိဉ္စိတေ အာပတ္တိ ပါစိတ္တိယဿ.
ဘူတဂါမဝဂ္ဂေါ ဒုတိယော.
၃. ဩဝါဒဝဂ္ဂေါ
၁၆၇. အသမ္မတော ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ. ဩဝဒတိ၊ ပယောဂေ ဒုက္ကဋံ၊ ဩဝဒိတေ အာပတ္တိ ပါစိတ္တိယဿ.
အတ္ထင်္ဂတေ သူရိယေ ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ. ဩဝဒတိ၊ ပယောဂေ ဒုက္ကဋံ၊ ဩဝဒိတေ အာပတ္တိ ပါစိတ္တိယဿ.
ဘိက္ခုနုပဿယံ ဥပသင်္ကမိတွာ ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ. ဩဝဒတိ၊ ပယောဂေ ဒုက္ကဋံ၊ ဩဝဒိတေ အာပတ္တိ ပါစိတ္တိယဿ.
‘‘အာမိသဟေတု ဘိက္ခူ ဘိက္ခုနိယော ဩဝဒန္တီ’’တိ ဘဏန္တော ဒွေ အာပတ္တိယော အာပဇ္ဇတိ. ဘဏတိ၊ ပယောဂေ ဒုက္ကဋံ၊ ဘဏိတေ အာပတ္တိ ပါစိတ္တိယဿ.
အညာတိကာယ ဘိက္ခုနိယာ စီဝရံ ဒေန္တော ဒွေ အာပတ္တိယော အာပဇ္ဇတိ. ဒေတိ၊ ပယောဂေ ဒုက္ကဋံ၊ ဒိန္နေ အာပတ္တိ ပါစိတ္တိယဿ.
အညာတိကာ ဘိက္ခုနိယာ စီဝရံ သိဗ္ဗေန္တော ဒွေ အာပတ္တိယော အာပဇ္ဇတိ. သိဗ္ဗေတိ၊ ပယောဂေ ဒုက္ကဋံ၊ အာရာပထေ အာရာပထေ အာပတ္တိ ပါစိတ္တိယဿ.
ဘိက္ခုနိယာ သဒ္ဓိံ သံဝိဓာယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ အာပတ္တိ ပါစိတ္တိယဿ.
ဘိက္ခုနိယာ သဒ္ဓိံ သံဝိဓာယ ဧကံ နာဝံ အဘိရုဟန္တော ဒွေ အာပတ္တိယော အာပဇ္ဇတိ. အဘိရုဟတိ၊ ပယောဂေ ဒုက္ကဋံ၊ အဘိရုဠှေ အာပတ္တိ ပါစိတ္တိယဿ.
ဇာနံ ဘိက္ခုနိပရိပါစိတံ ပိဏ္ဍပါတံ ဘုဉ္ဇန္တော ဒွေ အာပတ္တိယော အာပဇ္ဇတိ. ‘‘ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဘိက္ခုနိယာ သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ. နိသီဒတိ၊ ပယောဂေ ဒုက္ကဋံ၊ နိသိန္နေ အာပတ္တိ ပါစိတ္တိယဿ.
ဩဝါဒဝဂ္ဂေါ တတိယော.
၄. ဘောဇနဝဂ္ဂေါ
၁၆၈. တတုတ္တရိ အာဝသထပိဏ္ဍံ ဘုဉ္ဇန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဂဏဘောဇနံ ဘုဉ္ဇန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ပရမ္ပရဘောဇနံ ဘုဉ္ဇန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဒွတ္တိပတ္တပူရေ ပူဝေ ပဋိဂ္ဂဟေတွာ တတုတ္တရိ ပဋိဂ္ဂဏှန္တော ဒွေ အာပတ္တိယော အာပဇ္ဇတိ. ဂဏှာတိ၊ ပယောဂေ ဒုက္ကဋံ၊ ဂဟိတေ အာပတ္တိ ပါစိတ္တိယဿ.
ဘုတ္တာဝီ ပဝါရိတော အနတိရိတ္တံ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဘိက္ခုံ ဘုတ္တာဝိံ ပဝါရိတံ အနတိရိတ္တေန ခါဒနီယေန ဝါ ဘောဇနီယေန ဝါ အဘိဟဋ္ဌုံ ပဝါရေန္တော ဒွေ အာပတ္တိယော အာပဇ္ဇတိ. တဿ ဝစနေန ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ ဘောဇနပရိယောသာနေ အာပတ္တိ ပါစိတ္တိယဿ.
ဝိကာလေ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ. ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
သန္နိဓိကာရကံ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ. ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
အဒိန္နံ မုခဒွါရံ အာဟာရံ အာဟရန္တော ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဘောဇနဝဂ္ဂေါ စတုတ္ထော.
၅. အစေလကဝဂ္ဂေါ
၁၆၉. အစေလကဿ၊ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တော ဒွေ အာပတ္တိယော အာပဇ္ဇတိ. ဒေတိ၊ ပယောဂေ ဒုက္ကဋံ၊ ဒိန္နေ အာပတ္တိ ပါစိတ္တိယဿ.
ဘိက္ခုံ – ‘‘ဧဟာဝုသော၊ ဂါမံ ဝါ နိဂမံ ဝါ ပိဏ္ဍာယ ပဝိသိဿာမာ’’တိ တဿ ဒါပေတွာ ဝါ အဒါပေတွာ ဝါ ဥယျောဇေန္တော ဒွေ အာပတ္တိယော အာပဇ္ဇတိ. ဥယျောဇေတိ၊ ပယောဂေ ဒုက္ကဋံ၊ ဥယျောဇိတေ အာပတ္တိ ပါစိတ္တိယဿ.
သဘောဇနေ ကုလေ အနုပခဇ္ဇ နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ. နိသီဒတိ၊ ပယောဂေ ဒုက္ကဋံ၊ နိသိန္နေ အာပတ္တိ ပါစိတ္တိယဿ.
မာတုဂါမေန သဒ္ဓိံ ရဟော ပဋိစ္ဆန္နေ အာသနေ နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ. နိသီဒတိ၊ ပယောဂေ ဒုက္ကဋံ၊ နိသိန္နေ အာပတ္တိ ပါစိတ္တိယဿ.
မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ. နိသီဒတိ၊ ပယောဂေ ဒုက္ကဋံ၊ နိသိန္နေ အာပတ္တိ ပါစိတ္တိယဿ.
နိမန္တိတော သဘတ္တော သမာနော ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇန္တော ဒွေ အာပတ္တိယော အာပဇ္ဇတိ. ပဌမံ ပါဒံ ဥမ္မာရံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.
တတုတ္တရိ ဘေသဇ္ဇံ ဝိညာပေန္တော ဒွေ အာပတ္တိယော အာပဇ္ဇတိ. ဝိညာပေတိ၊ ပယောဂေ ဒုက္ကဋံ၊ ဝိညာပိတေ အာပတ္တိ ပါစိတ္တိယဿ.
ဥယျုတ္တံ သေနံ ဒဿနာယ ဂစ္ဆန္တော ဒွေ အာပတ္တိယော အာပဇ္ဇတိ. ဂစ္ဆတိ၊ အာပတ္တိ ဒုက္ကဋဿ၊ ယတ္ထ ဌိတော ပဿတိ၊ အာပတ္တိ ပါစိတ္တိယဿ.
အတိရေကတိရတ္တံ သေနာယ ဝသန္တော ဒွေ အာပတ္တိယော အာပဇ္ဇတိ. ဝသတိ၊ ပယောဂေ ဒုက္ကဋံ၊ ဝသိတေ အာပတ္တိ ပါစိတ္တိယဿ.
ဥယျောဓိကံ ဂစ္ဆန္တော ဒွေ အာပတ္တိယော အာပဇ္ဇတိ. ဂစ္ဆတိ၊ အာပတ္တိ ဒုက္ကဋဿ၊ ယတ္ထ ဌိတော ပဿတိ၊ အာပတ္တိ ပါစိတ္တိယဿ.
အစေလကဝဂ္ဂေါ ပဉ္စမော.
၆. သုရာမေရယဝဂ္ဂေါ
၁၇၀. မဇ္ဇံ ပိဝန္တော ဒွေ အာပတ္တိယော အာပဇ္ဇတိ. ‘‘ပိဝိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.
ဘိက္ခုံ အင်္ဂုလိပတောဒကေန ဟာသေန္တော ဒွေ အာပတ္တိယော အာပဇ္ဇတိ. ဟာသေတိ၊ ပယောဂေ ဒုက္ကဋံ၊ ဟသိတေ အာပတ္တိ ပါစိတ္တိယဿ.
ဥဒကေ ကီဠန္တော ဒွေ အာပတ္တိယော အာပဇ္ဇတိ. ဟေဋ္ဌာဂေါပ္ဖကေ ဥဒကေ ကီဠတိ၊ အာပတ္တိ ဒုက္ကဋဿ၊ ဥပရိဂေါပ္ဖကေ ကီဠတိ၊ အာပတ္တိ ပါစိတ္တိယဿ.
အနာဒရိယံ ကရောန္တော ဒွေ အာပတ္တိယော အာပဇ္ဇတိ. ကရောတိ၊ ပယောဂေ ဒုက္ကဋံ၊ ကတေ အာပတ္တိ ပါစိတ္တိယဿ.
ဘိက္ခုံ ဘိံသာပေန္တော ဒွေ အာပတ္တိယော အာပဇ္ဇတိ. ဘိံသာပေတိ၊ ပယောဂေ ဒုက္ကဋံ၊ ဘိံသာပိတေ အာပတ္တိ ပါစိတ္တိယဿ.
ဇောတိံ သမာဒဟိတွာ ဝိသိဗ္ဗေန္တော ဒွေ အာပတ္တိယော အာပဇ္ဇတိ. သမာဒဟတိ၊ ပယောဂေ ဒုက္ကဋံ၊ သမာဒဟိတေ အာပတ္တိ ပါစိတ္တိယဿ.
ဩရေနဒ္ဓမာသံ နဟာယန္တော ဒွေ အာပတ္တိယော အာပဇ္ဇတိ. နဟာယတိ၊ ပယောဂေ ဒုက္ကဋံ၊ နဟာနပရိယောသာနေ အာပတ္တိ ပါစိတ္တိယဿ.
အနာဒိယိတွာ တိဏ္ဏံ ဒုဗ္ဗဏ္ဏကရဏာနံ အညတရံ ဒုဗ္ဗဏ္ဏကရဏံ နဝံ စီဝရံ ပရိဘုဉ္ဇန္တော ဒွေ အာပတ္တိယော အာပဇ္ဇတိ. ပရိဘုဉ္ဇတိ၊ ပယောဂေ ဒုက္ကဋံ၊ ပရိဘုတ္တေ အာပတ္တိ ပါစိတ္တိယဿ.
ဘိက္ခုဿ ဝါ ဘိက္ခုနိယာ ဝါ သိက္ခမာနာယ ဝါ သာမဏေရဿ ဝါ သာမဏေရိယာ ဝါ သာမံ စီဝရံ ဝိကပ္ပေတွာ အပ္ပစ္စုဒ္ဓါရဏံ ပရိဘုဉ္ဇန္တော ဒွေ အာပတ္တိယော အာပဇ္ဇတိ. ပရိဘုဉ္ဇတိ၊ ပယောဂေ ဒုက္ကဋံ၊ ပရိဘုတ္တေ အာပတ္တိ ပါစိတ္တိယဿ.
ဘိက္ခုဿ ပတ္တံ ဝါ စီဝရံ ဝါ နိသီဒနံ ဝါ သူစိဃရံ ဝါ ကာယဗန္ဓနံ ဝါ အပနိဓေန္တော ဒွေ အာပတ္တိယော အာပဇ္ဇတိ. အပနိဓေတိ၊ ပယောဂေ ဒုက္ကဋံ၊ အပနိဓိတေ အာပတ္တိ ပါစိတ္တိယဿ.
သုရာမေရယဝဂ္ဂေါ ဆဋ္ဌော.
၇. သပ္ပါဏကဝဂ္ဂေါ
၁၇၁. သဉ္စိစ္စ ပါဏံ ဇီဝိတာ ဝေါရောပေန္တော ကတိ အာပတ္တိယော အာပဇ္ဇတိ? သဉ္စိစ္စ ပါဏံ ဇီဝိတာ ဝေါရောပေန္တော စတဿော အာပတ္တိယော အာပဇ္ဇတိ. အနောဒိဿ ဩပါတံ ခဏတိ – ‘‘ယော ကောစိ ပပတိတွာ မရိဿတီ’’တိ၊ အာပတ္တိ ဒုက္ကဋဿ၊ မနုဿော တသ္မိံ ပပတိတွာ မရတိ၊ အာပတ္တိ ပါရာဇိကဿ၊ ယက္ခော ဝါ ပေတော ဝါ တိရစ္ဆာနဂတမနုဿဝိဂ္ဂဟော ဝါ တသ္မိံ ပပတိတွာ မရတိ၊ အာပတ္တိ ထုလ္လစ္စယဿ၊ တိရစ္ဆာနဂတော တသ္မိံ ပပတိတွာ မရတိ၊ အာပတ္တိ ပါစိတ္တိယဿ – သဉ္စိစ္စ ပါဏံ ဇီဝိတာ ဝေါရောပေန္တော ဣမာ စတဿော အာပတ္တိယော အာပဇ္ဇတိ.
ဇာနံ သပ္ပါဏကံ ဥဒကံ ပရိဘုဉ္ဇန္တော ဒွေ အာပတ္တိယော အာပဇ္ဇတိ. ပရိဘုဉ္ဇတိ၊ ပယောဂေ ဒုက္ကဋံ၊ ပရိဘုတ္တေ အာပတ္တိ ပါစိတ္တိယဿ.
ဇာနံ ယထာဓမ္မံ နိဟတာဓိကရဏံ ပုနကမ္မာယ ဥက္ကောဋေန္တော ဒွေ အာပတ္တိယော အာပဇ္ဇတိ. ဥက္ကောဋေတိ၊ ပယောဂေ ဒုက္ကဋံ၊ ဥက္ကောဋိတေ အာပတ္တိ ပါစိတ္တိယဿ.
ဘိက္ခုဿ ဇာနံ ဒုဋ္ဌုလ္လံ အာပတ္တိံ ပဋိစ္ဆာဒေန္တော ဧကံ အာပတ္တိံ အာပဇ္ဇတိ. ပါစိတ္တိယံ.
ဇာနံ ဦနဝီသတိဝဿံ ပုဂ္ဂလံ ဥပသမ္ပာဒေန္တော ဒွေ အာပတ္တိယော အာပဇ္ဇတိ. ဥပသမ္ပာဒေတိ၊ ပယောဂေ ဒုက္ကဋံ၊ ဥပသမ္ပာဒိတေ အာပတ္တိ ပါစိတ္တိယဿ.
ဇာနံ ထေယျသတ္ထေန သဒ္ဓိံ သံဝိဓာယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ အာပတ္တိ ပါစိတ္တိယဿ.
မာတုဂါမေန သဒ္ဓိံ သံဝိဓာယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ အာပတ္တိ ပါစိတ္တိယဿ.
ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇန္တော ဒွေ အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ကမ္မဝါစာပရိယောသာနေ အာပတ္တိ ပါစိတ္တိယဿ.
ဇာနံ တထာဝါဒိနာ ဘိက္ခုနာ အကဋာနုဓမ္မေန တံ ဒိဋ္ဌိံ အပ္ပဋိနိဿဋ္ဌေန သဒ္ဓိံ သမ္ဘုဉ္ဇန္တော ဒွေ အာပတ္တိယော အာပဇ္ဇတိ. သမ္ဘုဉ္ဇတိ၊ ပယောဂေ ဒုက္ကဋံ၊ သမ္ဘုတ္တေ အာပတ္တိ ပါစိတ္တိယဿ.
ဇာနံ တထာနာသိတံ သမဏုဒ္ဒေသံ ဥပလာပေန္တော ဒွေ အာပတ္တိယော အာပဇ္ဇတိ. ဥပလာပေတိ၊ ပယောဂေ ဒုက္ကဋံ၊ ဥပလာပိတေ အာပတ္တိ ပါစိတ္တိယဿ.
သပ္ပါဏကဝဂ္ဂေါ သတ္တမော.
၈. သဟဓမ္မိကဝဂ္ဂေါ
၁၇၂. ဘိက္ခူဟိ သဟဓမ္မိကံ ဝုစ္စမာနော – ‘‘န တာဝါဟံ၊ အာဝုသော၊ ဧတသ္မိံ သိက္ခာပဒေ သိက္ခိဿာမိ ယာဝ န အညံ ဘိက္ခုံ ဗျတ္တံ ဝိနယဓရံ ပရိပုစ္ဆိဿာမီ’’တိ ဘဏန္တော ဒွေ အာပတ္တိယော အာပဇ္ဇတိ. ဘဏတိ၊ ပယောဂေ ဒုက္ကဋံ၊ ဘဏိတေ အာပတ္တိ ပါစိတ္တိယဿ.
ဝိနယံ ဝိဝဏ္ဏေန္တော ဒွေ အာပတ္တိယော အာပဇ္ဇတိ. ဝိဝဏ္ဏေတိ၊ ပယောဂေ ဒုက္ကဋံ၊ ဝိဝဏ္ဏိတေ အာပတ္တိ ပါစိတ္တိယဿ.
မောဟေန္တော ဒွေ အာပတ္တိယော အာပဇ္ဇတိ. အနာရောပိတေ မောဟေ မောဟေတိ၊ အာပတ္တိ ဒုက္ကဋဿ၊ အာရောပိတေ မောဟေ မောဟေတိ၊ အာပတ္တိ ပါစိတ္တိယဿ.
ဘိက္ခုဿ ကုပိတော အနတ္တမနော ပဟာရံ ဒေန္တော ဒွေ အာပတ္တိယော အာပဇ္ဇတိ. ပဟရတိ၊ ပယောဂေ ဒုက္ကဋံ၊ ပဟတေ အာပတ္တိ ပါစိတ္တိယဿ.