၉. ရာဇဝဂ္ဂေါ

၁၇၃. ပုဗ္ဗေ အပ္ပဋိသံဝိဒိတော ရညော အန္တေပုရံ ပဝိသန္တော ဒွေ အာပတ္တိယော အာပဇ္ဇတိ. ပဌမံ ပါဒံ ဥမ္မာရံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.

ရတနံ ဥဂ္ဂဏှန္တော ဒွေ အာပတ္တိယော အာပဇ္ဇတိ. ဂဏှာတိ၊ ပယောဂေ ဒုက္ကဋံ၊ ဂဟိတေ အာပတ္တိ ပါစိတ္တိယဿ.

သန္တံ ဘိက္ခုံ အနာပုစ္ဆာ ဝိကာလေ ဂါမံ ပဝိသန္တော ဒွေ အာပတ္တိယော အာပဇ္ဇတိ. ပဌမံ ပါဒံ ပရိက္ခေပံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.

အဋ္ဌိမယံ ဝါ ဒန္တမယံ ဝါ ဝိသာဏမယံ ဝါ သူစိဃရံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

ပမာဏာတိက္ကန္တံ မဉ္စံ ဝါ ပီဌံ ဝါ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

မဉ္စံ ဝါ ပီဌံ ဝါ တူလောနဒ္ဓံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

ပမာဏာတိက္ကန္တံ နိသီဒနံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

ပမာဏာတိက္ကန္တံ ကဏ္ဍုပ္ပဋိစ္ဆာဒိံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

ပမာဏာတိက္ကန္တံ ဝဿိကသာဋိကံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ.

စီဝရံ ကာရာပေန္တော ကတိ အာပတ္တိယော အာပဇ္ဇတိ? သုဂတစီဝရပ္ပမာဏံ စီဝရံ ကာရာပေန္တော ဒွေ အာပတ္တိယော အာပဇ္ဇတိ. ကာရာပေတိ၊ ပယောဂေ ဒုက္ကဋံ၊ ကာရာပိတေ အာပတ္တိ ပါစိတ္တိယဿ – သုဂတစီဝရပ္ပမာဏံ စီဝရံ ကာရာပေန္တော ဣမာ ဒွေ အာပတ္တိယော အာပဇ္ဇတိ.

ရာဇဝဂ္ဂေါ နဝမော. ခုဒ္ဒကာ နိဋ္ဌိတာ.