၁၀. ကယဝိက္ကယသိက္ခာပဒဝဏ္ဏနာ

၅၉၃. ကယဝိက္ကယသိက္ခာပဒေ ပါဠိယံ ဇာနာဟီတိ ဧတ္ထ ဥပဓာရေဟီတိ အတ္ထော၊ သုဋ္ဌု ဥပဓာရေတွာ ဂဏှ၊ ဣဒံ န မနာပန္တိ ပုန ဒါတုံ န သက္ခိဿသီတိ အဓိပ္ပါယော.

၅၉၄-၅၉၅. ကယန္တိ ပရဘဏ္ဍဿ ဂဟဏံ. ဝိက္ကယန္တိ အတ္တနော ဘဏ္ဍဿ ဒါနံ. တေနာဟ ‘‘ဣမိနာ ဣမံ ဒေဟီ’’တိအာဒိ. ယသ္မာ ကယိတံ နာမ ပရဿ ဟတ္ထတော ဂဟိတံ ဝုစ္စတိ၊ ဝိက္ကီတဉ္စ ပရဿ ဟတ္ထေ ဒိန္နံ၊ တသ္မာ ‘‘ကယိတဉ္စ ဟောတိ ပရဘဏ္ဍံ အတ္တနော ဟတ္ထဂတံ ကရောန္တေန၊ ဝိက္ကီတဉ္စ အတ္တနော ဘဏ္ဍံ ပရဟတ္ထဂတံ ကရောန္တေနာ’’တိ ဝုတ္တံ. ယဒိ ဧဝံ ပါဠိယံ ပရတော ‘‘ကယိတဉ္စ ဟောတိ ဝိက္ကယိတဉ္စာ’’တိ ဝတွာ ‘‘အတ္တနော ဘဏ္ဍံ ပရဟတ္ထဂတံ ပရဘဏ္ဍံ အတ္တနော ဟတ္ထဂတ’’န္တိ ကသ္မာ ဝုတ္တန္တိ အာဟ ‘‘ဣမိနာ ဣမန္တိအာဒိဝစနာနုရူပတော ပနာ’’တိအာဒိ. ဣမိနာတိ ဟိ သကသန္တကံ ဝုတ္တံ. တဒနုရူပတော ပါဠိယံ ပဌမံ အတ္တနော ဘဏ္ဍံ ဒဿိတံ၊ န ကယဝိက္ကယပဒါနုရူပတော. တဉှိ ဝိပရီတတော ပရသန္တကဂ္ဂဟဏံ ပုရက္ခတွာ ဌိတံ.

ကာမံ သေသဉာတကေပိ ‘‘ဣမံ ဒေဟီ’’တိ ဝဒတော ဝိညတ္တိ န ဟောတိ၊ သဒ္ဓါဒေယျဝိနိပါတနဿပိ ပန အဘာဝံ ဒဿေတုကာမော ‘‘မာတရံ ပန ပိတရံ ဝါ’’တိ အာဟ. ဝိညတ္တိ န ဟောတီတိ ဣဒံ ဝိသုံ ဝိညာပနံ သန္ဓာယ ဝုတ္တံ. အညံ ကိဉ္စိ အဝတွာ ဧဝံ ဝဒန္တော အညာတကံ ဝိညာပေတိ နာမာတိ အာဟ – ‘‘အညာတကံ ‘ဣမံ ဒေဟီ’တိ ဝဒတော ဝိညတ္တီ’’တိ. အညံ ကိဉ္စိ အဝတွာ ‘‘ဣမံ ဂဏှာဟီ’’တိ ဒိန္နံ အညာတကဿ ဒိန္နံ နာမ ဟောတီတိ ဝုတ္တံ ‘‘သဒ္ဓါဒေယျဝိနိပါတန’’န္တိ. တိဿော အာပတ္တိယောတိ အညာတကဝိညတ္တိသဒ္ဓါဒေယျဝိနိပါတနကယဝိက္ကယာပတ္တိသင်္ခါတာ တိဿော အာပတ္တိယော.

ဣမံ နာမ ကရောဟီတိ ဝဒတိ၊ ဝဋ္ဋတီတိ ဧတ္ထ ဘုတ္တောသိ၊ ဣဒါနိ ကသ္မာ န ကရောသီတိ ဝတ္ထုမ္ပိ ဝဋ္ဋတိ. ‘‘နိဿဂ္ဂိယံ ပါစိတ္တိယ’’န္တိ ကိဉ္စာပိ သတိယေဝ နိဿဂ္ဂိယဝတ္ထုမှိ ပါစိတ္တိယံ ဝုတ္တံ၊ အသတိပိ ပန တသ္မိံ ပါစိတ္တိယန္တိ ဣဒံ အဋ္ဌကထာပမာဏေန ဂဟေတဗ္ဗန္တိ ဒဿေတုံ ‘‘ကိဉ္စာပီ’’တိအာဒိ ဝုတ္တံ. ပရိဘုတ္တေတိ သပ္ပိအာဒိံ သန္ဓာယ ဝုတ္တံ. ယံ အတ္တနော ဓနေန ပရိဝတ္တေတိ၊ ယေန စ ပရိဝတ္တေတိ၊ တေသံ ကပ္ပိယဝတ္ထုတာ၊ အသဟဓမ္မိကတာ၊ ကယဝိက္ကယာပဇ္ဇနဉ္စာတိ ဣမာနေတ္ထ တီဏိ အင်္ဂါနိ.

ကယဝိက္ကယသိက္ခာပဒဝဏ္ဏနာ နိဋ္ဌိတာ.

နိဋ္ဌိတော ကောသိယဝဂ္ဂေါ ဒုတိယော.