၄. အတ္တကာမပါရိစရိယသိက္ခာပဒဝဏ္ဏနာ

၂၉၀. စတုတ္ထေ စီဝရန္တိ နိဝါသနာဒိ ယံ ကိဉ္စိ စီဝရံ. ပိဏ္ဍပါတန္တိ ယော ကောစိ အာဟာရော. သော ဟိ ပိဏ္ဍောလျေန ဘိက္ခုနော ပတ္တေ ပတနတော တတ္ထ တတ္ထ လဒ္ဓဘိက္ခာနံ ပိဏ္ဍာနံ ပါတော သန္နိပါတောတိ ဝါ ပိဏ္ဍပါတောတိ ဝုစ္စတိ. သေနာသနန္တိ သယနဉ္စ အာသနဉ္စ. ယတ္ထ ဟိ ဝိဟာရာဒိကေ သေတိ နိပဇ္ဇတိ အာသတိ နိသီဒတိ၊ တံ သေနာသနံ. ပတိ ဧတိ ဧတသ္မာတိ ပစ္စယောတိ အာဟ ‘‘ပတိကရဏဋ္ဌေန ပစ္စယော’’တိ. ရောဂဿ ပတိအယနဋ္ဌေန ဝါ ပစ္စယော၊ ပစ္စနီကဂမနဋ္ဌေနာတိ အတ္ထော၊ ဝူပသမနတ္ထေနာတိ ဝုတ္တံ ဟောတိ. ဓာတုက္ခောဘလက္ခဏဿ ဟိ တံဟေတုကဒုက္ခဝေဒနာလက္ခဏဿ ဝါ ရောဂဿ ပဋိပက္ခဘာဝေါ ပတိအယနဋ္ဌော. ယဿ ကဿစီတိ သပ္ပိအာဒီသု ယဿ ကဿစိ. သပ္ပါယဿာတိ ဟိတဿ ဝိကာရဝူပသမေနာတိ အဓိပ္ပါယော. ဘိသက္ကဿ ကမ္မံ တေန ဝိဓာတဗ္ဗတော၊ တေနာဟ ‘‘အနုညာတတ္တာ’’တိ. နဂရပရိက္ခာရေဟီတိ နဂရံ ပရိဝါရေတွာ ရက္ခဏကေဟိ. အာဝါဋပရိက္ခေပေါ ပရိခါ ဥဒ္ဒါပေါ ပါကာရော ဧသိကာ ပလိဃော ပါကာရမတ္ထကမဏ္ဍလန္တိ သတ္တ နဂရပရိက္ခာရာတိ ဝဒန္တိ. သေတပရိက္ခာရောတိ သုဝိသုဒ္ဓသီလာလင်္ကာရော. အရိယမဂ္ဂေါ ဟိ ဣဓ ‘‘ရထော’’တိ အဓိပ္ပေတော. တဿ စ သမ္မာဝါစာဒယော အလင်္ကာရဋ္ဌေန ‘‘ပရိက္ခာရော’’တိ ဝုတ္တာ. စက္ကဝီရိယောတိ ဝီရိယစက္ကော. ဇီဝိတပရိက္ခာရာတိ ဇီဝိတဿ ပဝတ္တိကာရဏာနိ. သမုဒါနေတဗ္ဗာတိ သမ္မာ ဥဒ္ဓံ ဥဒ္ဓံ အာနေတဗ္ဗာ ပရိယေသိတဗ္ဗာ. ပရိဝါရောပိ ဟောတိ အန္တရာယာနံ ပရိတော ဝါရဏတော၊ တေနာဟ – ‘‘ဇီဝိတ။ပေ။ ရက္ခဏတော’’တိ. တတ္ထ အန္တရန္တိ ဝိဝရံ၊ ဩကာသောတိ အတ္ထော. ရက္ခဏတောတိ ဝေရိကာနံ အန္တရံ အဒတွာ အတ္တနော သာမီနံ ပရိဝါရေတွာ ဌိတသေဝကာ ဝိယ ရက္ခဏတော. အဿာတိ ဇီဝိတဿ. ကာရဏဘာဝတောတိ စိရပ္ပဝတ္တိယာ ကာရဏဘာဝတော. ရသာယနဘူတဉှိ ဘေသဇ္ဇံ သုစိရမ္ပိ ကာလံ ဇီဝိတံ ပဝတ္တေတိယေဝ.

၂၉၁. ဥပစာရေတိ ယတ္ထ ဌိတော ဝိညာပေတုံ သက္ကောတိ၊ တာဒိသေ. ကာမော စေဝ ဟေတု စ ပါရိစရိယာ စ အတ္ထော. သေသံ ဗျဉ္ဇနန္တိအာဒီသု ပါဠိယံ ‘‘အတ္တကာမ’’န္တိ ပဒံ ဥဒ္ဓရိတွာ အတ္တနော ကာမံ၊ အတ္တနော ဟေတုံ၊ အတ္တနော အဓိပ္ပါယံ၊ အတ္တနော ပါရိစရိယန္တိ စတ္တာရော အတ္ထာ ပဒဘာဇနေ ဝုတ္တာ. တေသု ပဌမေ အတ္ထဝိကပ္ပေ ကာမော စ ဟေတု စ ပါရိစရိယာ စ အတ္ထော၊ သေသံ အဓိပ္ပါယပဒမေကံ ဗျဉ္ဇနံ ပဌမဝိဂ္ဂဟေ တဒတ္ထဿ အသမ္ဘဝဘာဝတော နိရတ္ထကတ္တာ. ဒုတိယေ ပန အတ္ထဝိကပ္ပေ အဓိပ္ပါယော စ ပါရိစရိယာ စ အတ္ထော၊ ကာမော စ ဟေတု စာတိ သေသံ ပဒဒွယံ ဗျဉ္ဇနံ တေသံ တတ္ထ အတ္ထာဘာဝတောတိ ဧဝံ စတ္တာရိ ပဒါနိ ဒွိန္နံ ဝိဂ္ဂဟာနံ ဝသေန ယောဇိတာနီတိ ကေစိ ဝဒန္တိ. ဂဏ္ဌိပဒေ စ အယမေဝတ္ထော ဝုတ္တော. စူဠမဇ္ဈိမမဟာဂဏ္ဌိပဒေသု ပန ‘‘ပဌမသ္မိံ အတ္ထဝိကပ္ပေ ကာမော စ ဟေတု စ ပါရိစရိယာ စ အဓိပ္ပါယတ္ထော၊ သေသံ မေထုနဓမ္မသင်္ခါတေန ကာမေနာတိအာဒိ ဝိဂ္ဂဟဝါကျံ အက္ခရဝိဝရဏမတ္တတော ဗျဉ္ဇနမတ္တံ. ဒုတိယေ အတ္ထဝိကပ္ပေ အဓိပ္ပါယော စ ပါရိစရိယာ စ အဓိပ္ပါယတ္ထော၊ သေသံ အတ္တနာ ကာမိတာ ဣစ္ဆိတာတိအာဒိ ဝိဂ္ဂဟဝါကျံ အက္ခရဝိဝရဏမတ္တတော ဗျဉ္ဇနမတ္တ’’န္တိ ဧဝမတ္ထော ဝုတ္တော. ‘‘ဗျဉ္ဇနေ အာဒရံ အကတွာ’’တိ ဝစနတော အယမေဝတ္ထော ဣဓ ယုတ္တတရောတိ ဝိညာယတိ. ဗျဉ္ဇနေ အာဒရံ အကတွာတိ ဣမိနာ ဟိ အဋ္ဌကထာယံ ဝုတ္တဝိဂ္ဂဟဝသေန ဗျဉ္ဇနေ အာဒရံ အကတွာတိ အယမတ္ထော ဒီပိတော.

ဣဒါနိ ယထာဝုတ္တမေဝတ္ထံ ပဒဘာဇနေန သံသန္ဒိတွာ ဒဿေတုံ ‘‘အတ္တနော ကာမံ အတ္တနော ဟေတုံ အတ္တနော ပါရိစရိယန္တိ ဟိ ဝုတ္တေ ဇာနိဿန္တိ ပဏ္ဍိတာ’’တိအာဒိ အာရဒ္ဓံ. ဣဒံ ဝုတ္တံ ဟောတိ – ‘‘အတ္တနော ဟေတု’’န္တိ ဝုတ္တေ အတ္တနော အတ္ထာယာတိ အယမတ္ထော ဝိညာယတိ. ‘‘အတ္တနော ကာမံ အတ္တနော ပါရိစရိယ’’န္တိ စ ဝုတ္တေ ကာမေန ပါရိစရိယာတိ အယမတ္ထော ဝိညာယတိ. တသ္မာ အတ္တနော ကာမံ အတ္တနော ဟေတုံ အတ္တနော ပါရိစရိယန္တိ ဣမေဟိ တီဟိ ပဒေဟိ အတ္တနော အတ္ထာယ ကာမေန ပါရိစရိယာ အတ္တကာမပါရိစရိယာတိ အယမတ္ထဝိကပ္ပေါ ဝုတ္တောတိ ဝိညူ ဇာနိဿန္တိ. ‘‘အတ္တနော အဓိပ္ပါယ’’န္တိ ဝုတ္တေ ပန အဓိပ္ပါယသဒ္ဒဿ ကာမိတသဒ္ဒေန သမာနတ္ထဘာဝတော အတ္တနော ပါရိစရိယန္တိ ဣမဿ စ ဥဘယဝိဂ္ဂဟသာမညတော အတ္တနော ဣစ္ဆိတကာမိတဋ္ဌေန အတ္တကာမပါရိစရိယာတိ အယမတ္ထဝိကပ္ပေါ ဒွီဟိ ပဒေဟိ ဒဿိတောတိ ဝိညူ ဇာနိဿန္တီတိ.

ဧတဒဂ္ဂန္တိ ဧသာ အဂ္ဂါ. ဒုဋ္ဌုလ္လဝါစာသိက္ခာပဒေ ကိဉ္စာပိ မေထုနယာစနံ အာဂတံ၊ တထာပိ တံ ဒုဋ္ဌုလ္လဝါစဿာဒရာဂဝသေန ဝုတ္တံ၊ ဣဓ ပန အတ္တနော မေထုနဿာဒရာဂဝသေနာတိ အယံ ဝိသေသော. ဝိနီတဝတ္ထူသု ‘‘တေန ဟိ ဘဂိနိ အဂ္ဂဒါနံ ဒေဟီ’’တိ ဣဒံ အတ္တနော အတ္ထာယ ဝုတ္တန္တိ ဝေဒိတဗ္ဗံ. မနုဿိတ္ထီ၊ ဣတ္ထိသညိတာ၊ အတ္တကာမပါရိစရိယာယ ရာဂေါ၊ တေန ရာဂေန ဝဏ္ဏဘဏနံ၊ တင်္ခဏဝိဇာနနန္တိ ဣမာနေတ္ထ ပဉ္စ အင်္ဂါနိ.

အတ္တကာမပါရိစရိယသိက္ခာပဒဝဏ္ဏနာ နိဋ္ဌိတာ.