နတ္ထုကထာ

နတ္ထုကထာယံ ‘‘အနုဇာနာမိ၊ ဘိက္ခဝေ၊ မုဒ္ဓနိ တေလက’’န္တိ (မဟာဝ. ၂၆၆) ဝစနတော သီသာဘိတာပဿ ဘိက္ခုနော မုဒ္ဓနိ တေလံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ နတ္ထုကမ္မ’’န္တိ (မဟာဝ. ၂၆၆) ဝစနတော နက္ခမနီယေ သတိ နတ္ထုကမ္မံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ နတ္ထုကရဏိ’’န္တိ (မဟာဝ. ၂၆၆) ဝစနတော နတ္ထုယာ အဂဠနတ္ထံ နတ္ထုကရဏီ ဝဋ္ဋတိ. ‘‘န၊ ဘိက္ခဝေ၊ ဥစ္စာဝစာ နတ္ထုကရဏီ ဓာရေတဗ္ဗာ၊ ယော ဓာရေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ အဋ္ဌိမယံ။ပေ။ သင်္ခနာဘိမယ’’န္တိ (မဟာဝ. ၂၆၆) ဝစနတော ဧတာယေဝ နတ္ထုကရဏိယော ဝဋ္ဋန္တိ. ‘‘အနုဇာနာမိ၊ ဘိက္ခဝေ၊ ယမကနတ္ထုကရဏိ’’န္တိ (မဟာဝ. ၂၆၆) ဝစနတော နတ္ထု ဝိသမံ အာသိဉ္စယန္တိ စေ၊ ယမကနတ္ထုကရဏိံ ဓာရေတဗ္ဗံ. တတ္ထ ယမကနတ္ထုကရဏိန္တိ သမသော တာဟိ ဒွီဟိ ပနာဠိကာဟိ ဧကံ နတ္ထုကရဏိံ.