ဓူမနေတ္တကထာ

ဓူမနေတ္တကထာယံ ‘‘အနုဇာနာမိ၊ ဘိက္ခဝေ၊ ဓူမံ ပါတု’’န္တိ (မဟာဝ. ၂၆၆) ဝစနတော ယမကနတ္ထုကရဏိယာ နက္ခမနီယေ သတိ ဓူမံ ပါတုံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ ဓူမနေတ္တ’’န္တိ (မဟာဝ. ၂၆၆) ဝစနတော တမေဝ ဝဋ္ဋိံ အာလိမ္ဗေတွာ ပိဝနပစ္စယာ ကဏ္ဌေ ဒဟန္တေန ဓူမနေတ္တဓူမော ပိဝိတဗ္ဗော. ‘‘န၊ ဘိက္ခဝေ၊ ဥစ္စာဝစာနိ ဓူမနေတ္တာနိ ဓာရေတဗ္ဗာနိ၊ ယော ဓာရေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ အဋ္ဌိမယံ။ပေ။ သင်္ခနာဘိမယ’’န္တိ (မဟာဝ. ၂၆၆) ဝစနတော ဧတာနိ ဧဝ ဓူမနေတ္တာနိ ဓာရေတဗ္ဗာနိ. ‘‘အနုဇာနာမိ၊ ဘိက္ခဝေ၊ အပိဓာန’’န္တိ (မဟာဝ. ၂၆၆) ဝစနတော ပါဏကာဒိအပ္ပဝိသနတ္ထံ ဓူမနေတ္တတ္ထဝိကမ္ပိ ဝဋ္ဋတိ. ‘‘အနုဇာနာမိ၊ ဘိက္ခဝေ၊ ယမကတ္ထဝိက’’န္တိ (မဟာဝ. ၂၆၆) ဝစနတော ဧကတော ဃံသိယမာနေ သတိ ယမကတ္ထဝိကံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ အံသဗဒ္ဓကံ ဗန္ဓနသုတ္တက’’န္တိ (မဟာဝ. ၂၆၆) ဝစနတော ဓူမနေတ္တတ္ထဝိကဿ အံသဗဒ္ဓဗန္ဓနသုတ္တံ ဝဋ္ဋတိ.