၃. မောဟနသိက္ခာပဒဝဏ္ဏနာ

၄၄၄. တတိယေ ပါဠိယံ ကော ပန ဝါဒေါ ဘိယျောတိ တေဟိ အညေဟိ ဘိက္ခူဟိ ဒိဋ္ဌဒွတ္တိဝါရတော ဘိယျော ပန ဝိတ္ထာရေန ဥဒ္ဒိသိယမာနေ ပါတိမောက္ခေ နိသိန္နပုဗ္ဗတာ အတ္ထိ စေ၊ တတ္ထ ကိမေဝ ဝတ္တဗ္ဗံ၊ အာပတ္တိမောက္ခော နတ္ထိ ဧဝါတိ အဓိပ္ပါယော. တဉ္စ ယထာဓမ္မော ကာရေတဗ္ဗောတိ တန္တိ ကာရဏတ္ထေ ဥပယောဂဝစနံ၊ တာယာတိ အတ္ထော. ယထာ ဓမ္မော စ ဝိနယော စ ဌိတော၊ တထာ တာယ အာပတ္တိယာ ကာရေတဗ္ဗောတိ ဝုတ္တံ ဟောတိ. မောဟာရောပနံ၊ တိက္ခတ္တုံ သုတဘာဝေါ၊ မောဟေတုကာမဿ မောဟနန္တိ တီဏိ အင်္ဂါနိ.

မောဟနသိက္ခာပဒဝဏ္ဏနာ နိဋ္ဌိတာ.