၄. ဒုတိယသမဏဗြာဟ္မဏသုတ္တဝဏ္ဏနာ

၁၄. ဣမေ ဓမ္မေ ကတမေ ဓမ္မေတိ စ ဧတ္ထ ဣတိ-သဒ္ဒေါ အာဒိအတ္ထော. တေန ‘‘ဣမေသံ ဓမ္မာနံ ကတမေသံ ဓမ္မာန’’န္တိ ဣမေသံ ပဒါနံ သင်္ဂဟော. ဧတာနိ ဟိ ပဒါနိ ဇရာမရဏာဒီနံ သာဓာရဏဘာဝေန ဝုတ္တာနိ ဣမိဿာ ဒေသနာယ ပပဉ္စဘူတာနီတိ အာဟ ‘‘ဧတ္တကံ ပပဉ္စံ ကတွာ ကထိတံ၊ ဒေသနံ။ပေ။ အဇ္ဈာသယေနာ’’တိ. ဣမိနာ တာနေဝ ဇရာမရဏာဒီနိ ဂဟေတွာ ပုဂ္ဂလဇ္ဈာသယဝသေန အာဒိတော ‘‘ဣမေ ဓမ္မေ’’တိအာဒိနာ သဗ္ဗပဒသာဓာရဏတော ဒေသနာ အာရဒ္ဓါ. ယထာနုလောမသာသနဉှိ သုတ္တန္တဒေသနာ၊ န ယထာဓမ္မသာသနန္တိ.

ဒုတိယသမဏဗြာဟ္မဏသုတ္တဝဏ္ဏနာ နိဋ္ဌိတာ.