၃. သမဏဗြာဟ္မဏသုတ္တဝဏ္ဏနာ

၁၃. ယေ ပစ္စယသမဝါယေ တေနတ္တဘာဝေန သစ္စာနိ ပဋိဝိဇ္ဈိတုံ သမတ္ထာ၊ တေ ဗာဟိရကလိင်္ဂေ ဌိတာပိ တေနေဝ တတ္ထ သမတ္ထတာယောဂေန ဘာဝိနံ သမိတဗာဟိတပါပတံ အပေက္ခိတွာ သမဏသမ္မတာယေဝ ဗြာဟ္မဏသမ္မတာယေဝါတိ တေ နိဝတ္တေတုံ ‘‘သစ္စာနိ ပဋိဝိဇ္ဈိတုံ အသမတ္ထာ’’တိ ဝုတ္တံ. ဒုက္ခသစ္စဝသေနာတိ ဒုက္ခအရိယသစ္စဝသေန. အညထာ ကထံ ဗာဟိရကာပိ ဇရာမရဏံ ဒုက္ခန္တိ န ဇာနန္တိ. သစ္စဒေသနာဘာဝတော ‘‘သဟ တဏှာယာ’’တိ ဝုတ္တန္တိ ကေစိ. တံ န သုဋ္ဌု. ယသ္မာ တတ္ထ တတ္ထ ဘဝေ ပဌမာဘိနိဗ္ဗတ္တိ၊ ဣဓ ဇာတီတိ အဓိပ္ပေတာ၊ သာ စ တဏှာ ဧဝ သန္တာနေန၊ တဏှေဝ သာ ဇာတိ. ဇရာမရဏဉ္စေတ္ထ ပါကဋမေဝ အဓိပ္ပေတံ၊ န ခဏိကံ၊ တသ္မာ သတဏှာ ဧဝ ဇာတိဇရာမရဏဿ သမုဒယောတိ ဘူတကထနမေတံ ဒဋ္ဌဗ္ဗံ. သမုဒယသစ္စဝသေန န ဇာနန္တီတိ ယောဇနာ. ဧသ နယော သေသပဒေသုပိ. သဗ္ဗပဒေသူတိ ယတ္ထ တဏှာ ဝိသေသနဘာဝေန ဝတ္တဗ္ဗာ၊ တေသု သဗ္ဗပဒေသု. ယေန သမန္နာဂတတ္တာ ပုဂ္ဂလော ပရမတ္ထတော သမဏော ဗြာဟ္မဏောတိ ဝုစ္စတိ၊ တံ သာမညံ ဗြဟ္မညဉ္စာတိ အာဟ ‘‘အရိယ။ပေ။ ဗြဟ္မညဉ္စာ’’တိ. ယေန ဟိ ပဝတ္တိနိမိတ္တေန သမဏ-သဒ္ဒေါ ဗြာဟ္မဏ-သဒ္ဒေါ စ သကေ အတ္ထေ နိရုဠှော၊ တဿ ဝသေန အဘိန္နောပိ ဝေနေယျဇ္ဈာသယတော ဒွိဓာ ကတွာ ဝတ္တုံ အရဟတီတိ ဝုတ္တံ ‘‘ဥဘယတ္ထာပီ’’တိ. ဧကာဒသသု ဌာနေသု စတ္တာရိ သစ္စာနိ ကထေသိ အဝိဇ္ဇာသမုဒယဿ အနုဒ္ဓဋတ္တာ.

သမဏဗြာဟ္မဏသုတ္တဝဏ္ဏနာ နိဋ္ဌိတာ.