ဥပေါသထာဒိပုစ္ဆာဝိဿဇ္ဇနာ

၃၃၂. ဝိဿဇ္ဇနေ ဧဝမတ္ထော ဝေဒိတဗ္ဗောတိ ယောဇနာ. ကာယသာမဂ္ဂီ အာဒိ နာမာတိ ယောဇနာ. ဩသာရဏကိရိယာတိ ကထနကိရိယာ. ဆန္ဒပဝါရဏံ အာဟရိတွာတိ ဆန္ဒဉ္စ ပဝါရဏဉ္စ အာဟရိတွာ. ပဝါရဏာကထာတိ ‘‘သံဃံ ဘန္တေ ပဝါရေမီ’’တိအာဒိကာ (မဟာဝ. ၂၁၀) ပဝါရဏာကထာ. တဇ္ဇနီယကမ္မာဒီသု ဝတ္ထု နာမ ကိံ? ပုဂ္ဂလော နာမ ကောတိ အာဟ ‘‘ဝတ္ထု နာမာ’’တိအာဒိ. တတ္ထ ယေန ဝတ္ထုနာတိ ဘဏ္ဍနကာရကာဒိနာ ယေန ဝတ္ထုနာ ကရဏဘူတေန၊ ဟေတုဘူတေန ဝါ. ယေနာတိ ပုဂ္ဂလေန ကတ္တုဘူတေန၊ ကတန္တိ သမ္ဗန္ဓော. ‘‘တဿာ တဿာ ကမ္မဝါစာယာ’’တိ ပဒံ ‘‘အဝသာနဝစန’’န္တိ ပဒေ အဝယဝိသမ္ဗန္ဓော. သဗ္ဗတ္ထာတိ သဗ္ဗေသု ဝိဿဇ္ဇနေသု.

ဣတိ ဥပေါသထာဒိပုစ္ဆာဝိဿဇ္ဇနဝဏ္ဏနာယ ယောဇနာ

သမတ္တာ.

အတ္ထဝသပကရဏဝဏ္ဏနာ

၃၃၄. အတ္ထဝသပကရဏေတိ အဝယဝိအာဓာရော. ဒသ အတ္ထဝသေတိအာဒီသူတိ အဝယဝါဓာရော. ယန္တိ ဝစနံ. ဥပရိမံ ဥပရိမံ ပဒန္တိ ‘‘သံဃဖာသုတာယာ’’တိအာဒိကံ ဥတ္တရုတ္တရိ ဝုတ္တံ ပဒံ. ဟေဋ္ဌိမဿ ဟေဋ္ဌိမဿ ပဒဿာတိ ‘‘သံဃသုဋ္ဌုတာယာ’’တိအာဒိကဿ အဓော အဓော ဝုတ္တဿ ပဒဿ.

ယဒေတံ ပဒသတံ ဝုတ္တန္တိ ယောဇနာ. တတ္ထာတိ တသ္မိံ ပဒသတေ၊ နိဒ္ဓါရဏေ ဘုမ္မံ၊ အတ္ထသတန္တိ အဘိဓေယျသတံ. ဓမ္မသတန္တိအဘိဓာနသတံ၊ ပါဠိသတန္တိ အတ္ထော. ‘‘အတ္ထသတံ ဓမ္မသတ’’န္တိ ပဒါနံ အတ္ထန္တရဝိကပ္ပံ ဒဿေန္တော အာဟ ‘‘အထ ဝါ’’တိအာဒိ. တတ္ထ ယေ ဒသ အတ္ထဝသေ ပဋိစ္စ ပညတ္တံ၊ တေသံ ဒသအတ္ထဝသာနန္တိ ယောဇနာ၊ ယေ ဒသ အတ္ထဝသေ ပုဗ္ဗေ ဝဏ္ဏိတာ၊ တေသံ ဒသအတ္ထဝသာနန္တိ ယောဇနာ. ပဌမပါရာဇိကဝဏ္ဏနာယံ (ပါရာ. အဋ္ဌ. ၁.၃၉) ဝဏ္ဏိတာတိ သမ္ဗန္ဓော. တတ္ထာတိ ‘‘သံဃသုဋ္ဌုတာယာ’’တိအာဒိပါဌေ. သုဋ္ဌု ဒေဝါတိ သုဋ္ဌု မဟာရာဇ. ဟိ ယသ္မာ အာဏာဗလဘောဂဗလဣဿရိယဗလေဟိ ဒိဗ္ဗတိ၊ တသ္မာ ဒေဝေါတိ ဝုစ္စတိ. ယော စာတိ ဂဟဋ္ဌော ဝါ ပဗ္ဗဇိတော ဝါ၊ သမ္ပဋိစ္ဆတီတိ သမ္ဗန္ဓော. တသ္မာတိ ယသ္မာ ဟိတာယ သုခါယ ဟောတိ၊ တသ္မာ. အာနိသံသံ ဒဿေတွာ ပညပေဿာမီတိ သမ္ဗန္ဓော. အဘိဘဝိတွာ န ပညပေဿာမီတိ ယောဇနာ. ဣဓာတိ အတ္ထဝသပကရဏေ. တဒတ္ထဇောတကာနန္တိ သောယေဝ အတ္ထော တဒတ္ထော၊ တဿ ဇောတကာ တဒတ္ထဇောတကာ၊ တေသံ. ဣဒါနိ ဝေဒိတဗ္ဗာနီတိ သမ္ဗန္ဓော. အတ္ထံ ဇောတေန္တီတိ အတ္ထဇောတကာ၊ သဒ္ဒါ. နီဟရိတွာ၊ နိယမေတွာ ဝါ အတ္ထော ဝုစ္စတေ ဣမာဟိ သဒ္ဒပညတ္တီဟီတိ နိရုတ္တိယော.

အတ္ထသတန္တိ ဂါထာယံ အတ္ထဝသေ ပကရဏေ အတ္ထသတံ ဝေဒိတဗ္ဗန္တိအာဒိနာ ယောဇနာ ကာတဗ္ဗာ. ဣတိ ဟီတိ ဣတိ ဧဝ. ဟိသဒ္ဒေါ ဟိ ဧဝသဒ္ဒတ္ထော. ဣဒန္တိ ‘‘အတ္ထသတ’’န္တိအာဒိဝစနံ၊ ဝုတ္တန္တိ သမ္ဗန္ဓော. ဧတန္တိ ယထာဝုတ္တံ အတ္ထံ ပဋိစ္စာတိ သမ္ဗန္ဓော.

ဣတိ သမန္တပါသာဒိကာယ ဝိနယသံဝဏ္ဏနာယ

မဟာဝဂ္ဂဝဏ္ဏနာယ

ယောဇနာ သမတ္တာ.