၉. ပါတိမောက္ခဋ္ဌပနက္ခန္ဓကံ

၁. ပါတိမောက္ခုဒ္ဒေသယာစနကထာ

၃၈၃. ပါတိမောက္ခဋ္ဌပနက္ခန္ဓကေ နန္ဒိမုခိယာ ရတ္တိယာတိ ဧတ္ထ နန္ဒိယတိ တုသိယတီတိ နန္ဒိ၊ ဣကာရန္တောယံ နပုံသကလိင်္ဂေါ. ‘‘နန္ဒိသေနော (ဇာ. အဋ္ဌ. ၃.၄.၁) နန္ဒိဝိသာလော’’တိအာဒီသု ဣကာရန္တောယံ ပုလ္လိင်္ဂေါ ဟောတိ၊ ဣဓ ပန မုခံ အပေက္ခိတွာ ဣကာရန္တော နပုံသကလိင်္ဂေါ ဟောတိ. အရုဏုဋ္ဌိတကာလေ ဩဒါတဒိသာမုခတာယ နန္ဒိ မုခံ ဧတိဿံ ရတ္တိယန္တိ နန္ဒိမုခီ၊ ရတ္တိ၊ တာယ နန္ဒိမုခိယာ ရတ္တိယာ၊ တေန ဝုတ္တံ ‘‘အရုဏုဋ္ဌိတကာလေပိ ဟိ နန္ဒီမုခါ ဝိယ ရတ္တိ ခါယတီ’’တိ. အန္တောပူတိန္တိ ဧတ္ထ ကာယဿ အန္တော ကုဏပပူတိန္တိ အတ္ထံ ပဋိပက္ခိပန္တော အာဟ ‘‘အတ္တစိတ္တသန္တာနေ’’တိအာဒိ. ‘‘ကိလေသဝဿနဝသေနာ’’တိ ဣမိနာ ဥဒကဝဿနဝသေနာတိ အတ္ထံ ပဋိက္ခိပတိ. အဝဿုတန္တိ တိန္တံ၊ ကိလိန္နန္တိ အတ္ထော. ကသမ္ဗုဇာတန္တိ ဧတ္ထ ကသမ္ဗူတိ သင်္ကာရော. သော ဟိ သမ္မုဉ္စနိယာ ကသိယမာနေ ဝိလေခိယမာနေ သမ္ဗတိ သဒ္ဒံ ကရောတီတိ ကသမ္ဗု၊ တံ ဝိယ ဇာတန္တိ ကသမ္ဗုဇာတန္တိ အတ္ထော ဒဋ္ဌဗ္ဗော. အဋ္ဌကထာယံ ပန အဓိပ္ပါယဝသေန ‘‘အာကိလိဋ္ဌဇာတ’’န္တိ ဝုတ္တံ၊ အတိဝိယ ကိလိဋ္ဌဇာတန္တိ အတ္ထော. ‘‘အာကိဏ္ဏဒေါသတာယ ကိလိဋ္ဌဇာတ’’န္တိပိ ပါဌော. ‘‘ယာဝ ဗာဟာဂဟဏာပိ နာမာ’’တိ ဣမိနာ ပါဌေန ဒဿေတီတိ သမ္ဗန္ဓော. ဟီတိ ပဒပူရဏမတ္တံ. တေနာတိ မောဃပုရိသေန. ‘‘ယာဝါ’’တိ နိပါတပယောဂတ္တာ ‘‘ဗာဟာဂဟဏာပီ’’တိ ဧတ္ထ ပဉ္စမီဝိဘတ္တိ အဝဓိအတ္ထေ ဟောတိ. နာမ-သဒ္ဒေါ ဂရဟတ္ထဇောတကော၊ တဿ ပယောဂတ္တာ ‘‘အာဂမေဿတီ’’တိ ဧတ္ထ အတီတတ္ထေ အနာဂတဝစနံ (သဒ္ဒနီတိသုတ္တမာလာယ ၈၉၃ သုတ္တေ). အာဂမေဿတိ နာမာတိ ယောဇနာ. အာဂမေဿတီတိ ဤသံ အဓိဝါသေဿတိ. ‘‘အာတော ဂမုဤသမဓိဝါသနေ’’တိ ဟိ ဓာတုပါဌေသု (သဒ္ဒနီတိဓာတုမာလာယံ ၁၈ မကာရန္တဓာတု) ဝုတ္တံ.

၃၈၄. န အာယတကေနေဝ ပပါတောတိ ဧတ္ထ ဒီဃေနေဝ ပပါတောတိ ဒဿေန္တော အာဟ ‘‘န ပဌမမေဝ ဂမ္ဘီရော’’တိ. အာယတသဒ္ဒေါ ဟိ ဒီဃပရိယာယော. ‘‘န အာယတကေန ဂီတဿရေန ဓမ္မော ဂါယိတဗ္ဗော’’တိအာဒီသု (စူဠဝ. ၂၄၉) ဝိယ ပပါတော ဒီဃေန တီရဿ အာဒိမှိ န ဟောတီတိ ဝုတ္တံ ဟောတိ. ပဌမမေဝါတိ တီရဿ အာဒိမှိယေဝ. ‘‘အနုပုဗ္ဗေန ဂမ္ဘီရော’’တိ ဣမိနာ ‘‘န ပဌမမေဝ ဂမ္ဘီရော’’တိ ဝစနဿ အဓိပ္ပါယတ္ထံ ဒဿေတိ. ဌိတဓမ္မောတိ တီရဿ အန္တောယေဝ ဌိတသဘာဝေါ. ဝေလံ နာတိဝတ္တတီတိ ဧတ္ထ ဝေလာသဒ္ဒဿ တီရမရိယာဒတ္ထေသု ပဝတ္တဘာဝံ ဒဿေန္တော အာဟ ‘‘ဩသက္ကနကန္ဒရံ မရိယာဒဝေလ’’န္တိ. တတ္ထ ‘‘ဩသက္ကနကန္ဒရ’’ဣတိ ပဒေန တီရတ္ထံ ဒဿေတိ၊ ‘‘မရိယာဒ’’ ဣတိ ပဒေန မရိယာဒတ္ထံ. ကေန ဥဒကေန ဒရိတဗ္ဗောတိ ကန္ဒရော၊ ဥဒကေန ဩသက္ကနော ကန္ဒရော ဧတ္ထာတိ ဩသက္ကနကန္ဒရံ၊ တီရံ. ဩသက္ကနကန္ဒရဘူတဉ္စ မရိယာဒဘူတဉ္စ ဝေလံ တီရံ နာတိက္ကမတီတိ အတ္ထော. တီရံ ဝါဟေတီတိ ဧတ္ထ ဝဟဓာတုယာ ပါပုဏနတ္ထံ ဒဿေန္တော အာဟ ‘‘တီရံ အပ္ပေတီ’’တိ. တတ္ထ အပ္ပေတီတိ ပါပုဏာပေတိ. ‘‘ဥဿာရေတီ’’တိ ဣမိနာ ပါဠိယံ ‘‘ထလံ ဥဿာရေတီ’’တိ ပဒေန ‘‘တီရံ ဝါဟေတီ’’တိ ပဒဿ အတ္ထံ ဒဿေတီတိ အတ္ထော ဒဿိတော. ဥဿာရေတီတိ ဥဒ္ဓရိတွာ ဂမာပေတိ. အညာပဋိဝေဓောတိ ဧတ္ထ အာဇာနာတိ၊ အာဇာနိတ္ထာတိ ဝါ အညံ အရဟတ္တမဂ္ဂေါ ဝါ အရဟတ္တဖလံ ဝါ၊ တဿ ပဋိဝိဇ္ဈနံ အညာပဋိဝေဓော၊ သုခုစ္စာရဏတ္ထံ မဇ္ဈေ ဒီဃော၊ အညာပဋိဝေဓော နာမ အရဟတ္တုပ္ပတ္တိယေဝ ဟောတိ. တေန ဝုတ္တံ ‘‘အရဟတ္တုပ္ပတ္တီ’’တိ.

၃၈၅. ဆန္နမတိဝဿတီတိ ဥဒါနပါဠိယာ သန္ဓာယဘာသိတပါဠိဘာဝံ ဒဿေန္တော အာဟ ‘‘အာပတ္တိ’’န္တိအာဒိ. တတ္ထ ဣဒန္တိ ‘‘ဆန္နမတိဝဿတီ’’တိ ဝစနံ ဝုတ္တန္တိ သမ္ဗန္ဓော. ဧတန္တိ နဝါပတ္တိအာပဇ္ဇနံ သန္ဓာယာတိ သမ္ဗန္ဓော.

၄. ပါတိမောက္ခသဝနာရဟကထာ

၃၈၆. ပုရေ ဝါ ပစ္ဆာ ဝါတိ ဉတ္တိတော ပုရေ ဝါ ပစ္ဆာ ဝါ. ခေတ္တေတိ ပါတိမောက္ခဋ္ဌပနဿ ခေတ္တေ. ခေတ္တံ ဒဿေန္တော အာဟ ‘‘တသ္မာ’’တိအာဒိ. ရေကာရံ ဘဏတီတိ ဆတ္တိံသတျက္ခရေသု ရေ-ကာရံ ဉတ္တိဋ္ဌပနကော ဘဏတိ. ဣဒန္တိ ပဉ္စတိံသတျက္ခရာနံ ဥစ္စာရဏဋ္ဌာနံ. ဝုတ္တေတိ ဉတ္တိဋ္ဌပနကေန ဝုတ္တေ. ‘‘သုဏာတု မေ’’တိ ဝစနေ အနာရဒ္ဓေယေဝါတိ ယောဇနာ.

၅. ဓမ္မိကာဓမ္မိကပါတိမောက္ခဋ္ဌပနကထာ

၃၈၇. တေန ပုဂ္ဂလေနာတိ တေန စုဒိတကေန ပုဂ္ဂလေန. သာ ဝိပတ္တီတိ သီလဝိပတ္တိအာဒိသင်္ခါတာ သာ ဝိပတ္တိ. သညာအမူလိကဝသေနာတိ ‘‘ကတာ’’ ဣတိ သညာယ အမူလိကဝသေန. ကတဉ္စာတိ ဧကန္တေန ကတဉ္စ. အကတဉ္စာတိ ဧကန္တေန အကတဉ္စ.

ကောပေတုကာမတာယ နေဝ အာဂစ္ဆတီတိ သမ္ဗန္ဓော. တေနာတိ အနာဂမနာဒိကာရဏေန. အာပဇ္ဇတီတိ ပါတိမောက္ခဋ္ဌပနကော အာပဇ္ဇတိ. ဣစ္စဿာပီတိ ဣတိ ဧဝံ အဿ ပါတိမောက္ခဋ္ဌပနကဿာပိ. ပစ္စာဒိယတီတိ ပတိ အာဒိယတိ၊ ‘‘အကတံ ကမ္မံ၊ ပုန ကာတဗ္ဗံ ကမ္မ’’န္တိအာဒိနာ ပုန အာဒီယတိ၊ ပုန အာရဘတီတိ အတ္ထော.

၆. ဓမ္မိကပါတိမောက္ခဋ္ဌပနကထာ

၃၈၈. မဂ္ဂပဋိပါဒနာဒီသူတိ မဂ္ဂသ္မိံ ပဋိပါဒနာဒီသု. အာဒိသဒ္ဒေန ထေယျစိတ္တေန အဝဟာရာဒယော သင်္ဂဏှာတိ. အာကာရာဒိသညာတိ အာကာရသညာ လိင်္ဂသညာ နိမိတ္တသညာ. တန္တိ ပရိသင်္ကံ သန္ဓာယာတိ သမ္ဗန္ဓော.

၇. အတ္တာဒါနအင်္ဂကထာ

၃၉၈. အတ္တာဒါနံ အာဒါတုကာမေနာတိ ဧတ္ထ ကိံ အတ္တာဒါနန္တိ အာဟ ‘‘သာသနံ သောဓေတုကာမော’’တိအာဒိ. ဣမိနာ ပရံ စောဒေတုံ အတ္တနာ အာဒါတဗ္ဗံ အဓိကရဏံ အတ္တာဒါနန္တိ ဝုစ္စတီတိ ဒဿေတိ. အကာလော ဣမံ အတ္တာဒါနံ အာဒါတုန္တိ ဧတ္ထ အကာလံ ဒဿေန္တော အာဟ ‘‘ရာဇဘယ’’န္တိအာဒိ. တတ္ထ ဝဿာရတ္တောတိ ဝဿကာလော. သော ဟိ ဝဿော အတိဝိယ ရဉ္ဇတိ ဧတ္ထ ကာလေတိ ဝဿာရတ္တောတိ ဝုစ္စတိ. ဝဿာရတ္တောပိ အဓိကရဏဝူပသမတ္ထံ လဇ္ဇိပရိသာယ ဒူရတော အာနယနဿ ဒုက္ကရတ္တာ အကာလော နာမ. ဣတီတိ အယံ ရာဇဘယာဒိကာလောတိ အတ္ထော. ဝိပရီတောတိ ရာဇဘယာဒီနံ အဘာဝကာလော.

အဘူတံ ဣဒံ အတ္တာဒါနန္တိ ဧတ္ထ အဘူတသဒ္ဒေါ အဝိဇ္ဇမာနပရိယာယောတိ အာဟ ‘‘အသန္တမိဒ’’န္တိ၊ ဣဒံ အတ္တာဒါနံ အဝိဇ္ဇမာနန္တိ အတ္ထော. မယာ ဂဟိတောတိ သမ္ဗန္ဓော. သီလဝါ ပုဂ္ဂလောတိ ယောဇနာ. ယန္တိ အတ္တာဒါနံ သံဝတ္တတီတိ သမ္ဗန္ဓော. ဣဒန္တိ အတ္တာဒါနံ.

န လဘိဿာမိ သန္ဒိဋ္ဌေ၊ လဘိဿာမိ သန္ဒိဋ္ဌေတိ ဧတ္ထ ‘‘န လဘိဿာမိ၊ လဘိဿာမီ’’တိ ဣဒံ ကိံ သန္ဓာယ ဝုတ္တန္တိ အာဟ ‘‘အပ္ပေကဒါ ဟီ’’တိအာဒိ. တတ္ထ အပ္ပေကဒါတိ အပိ ဧကဒါ. ဟိသဒ္ဒေါ ဝိတ္ထာရဇောတကော. ဧဝရူပါတိ သန္ဒိဋ္ဌသမ္ဘတ္တသဘာဝါ. တန္တိ ဥပတ္ထမ္ဘကဘိက္ခုလဘနံ သန္ဓာယာတိ သမ္ဗန္ဓော. ‘‘န လဘိဿာမီ’’တိ ဣဒံ ဝစနံ ဝုတ္တန္တိ သမ္ဗန္ဓော.

ကောသမ္ဗကာနံ ဘဏ္ဍနာဒိ ဘဝတိ ဝိယ ဘဏ္ဍနာဒိ ဘဝိဿတီတိ ယောဇနာ. ပစ္ဆာပိ အဝိပ္ပဋိသာရကရံ ဘဝိဿတီတိ ဧတ္ထ ကေသံ အဝိပ္ပဋိသာရကရံ ဘဝတိ ဝိယ ပဉ္စင်္ဂသမ္ပန္နာဂတံ အတ္တာဒါနံ အာဒိယတော ပစ္ဆာပိ အဝိပ္ပဋိသာရကရံ ဘဝတီတိ အာဟ ‘‘သုဘဒ္ဒံ ဝုဍ္ဎပဗ္ဗဇိတ’’န္တိအာဒိ. တတ္ထ ပဉ္စသတိကသင်္ဂီတိန္တိ ပဉ္စသတေဟိ မဟာကဿပါဒီဟိ ကတ္တဗ္ဗံ သင်္ဂီတိံ. မဟာကဿပတ္ထေရဿ ပစ္ဆာ သမနုဿရဏကရံ ဟောတိ ဣဝ ဟောတီတိ ယောဇနာ. ဧသေဝ နယော သေသေသုပိ. သမနုဿရဏကရန္တိ သမ္မောဒဝသေန ပုနပ္ပုနံ အနုဿရဏဿ ကရံ. ဣမိနာ ‘‘အဝိပ္ပဋိသာရကရ’’န္တိ ပဒဿ အတ္ထံ ဒဿေတိ. ပစ္ဆာပီတိ ဧတ္ထ ပိသဒ္ဒဿ အဝုတ္တသမ္ပိဏ္ဍနတ္ထံ ဒဿေန္တော အာဟ ‘‘သာသနဿ စာ’’တိအာဒိ. တတ္ထ သာသနဿ စ သဿိရိကတာယာတိ သမ္ဗန္ဓော. ဝိဂတဥပက္ကိလေသစန္ဒိမသူရိယာနံ ဝိယ သာသနဿ စ သဿိရိကတာယ သံဝတ္တတီတိ အဓိပ္ပါယော.

၈. စောဒကေန ပစ္စဝေက္ခိတဗ္ဗဓမ္မကထာ

၃၉၉. ‘‘အစ္ဆိဒ္ဒေန အပ္ပဋိမံသေနာ’’တိအာဒီသု ဧဝမတ္ထော ဝေဒိတဗ္ဗောတိ ယောဇနာ. ဆိဒ္ဒသပ္ပဋိမံသံ ပဌမံ ဒဿေတွာ ဝိပရီတဝသေန အစ္ဆိဒ္ဒအပ္ပဋိမံသံ ဒဿေန္တော အာဟ ‘‘ယေနာ’’တိအာဒိ. တတ္ထ ယေန ကတာနီတိ သမ္ဗန္ဓော. ဆိဇ္ဇတီတိ ဆိဒ္ဒေါ၊ ပဋိ ပုနပ္ပုနံ မသိယတိ အာမသိယတီတိ ပဋိမံသော၊ နိဂ္ဂဟိတာဂမော၊ ဘာဝပ္ပဓာနောယံ ကမ္မနိဒ္ဒေသော. သဟ ပဋိမံသေနာတိ သပ္ပဋိမံသော၊ ကာယသမာစာရော. ဝိပရီတောတိ ဝိပရိဝတ္တဝသေန ဣတော ပဝတ္တော၊ ကာယသမာစာရောတိ အတ္ထော. အမူလကာနုဒ္ဓံသနာဒီဟီတိ အာဒိသဒ္ဒေန ဒုဋ္ဌုလ္လဝါစာဒယော သင်္ဂဏှာတိ.

မေတ္တံ နု ခေါ မေ စိတ္တန္တိ ဧတ္ထ အပ္ပနာဘာဝပ္ပတ္တံ မေတ္တစိတ္တမေဝါဓိပ္ပေတန္တိ ဒဿေန္တော အာဟ ‘‘ပလိဗောဓေ ဆိန္ဒိတွာ’’တိအာဒိ. တတ္ထ ပလိဗောဓေတိ အာဝါသပလိဗောဓာဒိကေ ပလိဗောဓေ. ‘‘ဝိက္ခမ္ဘနဝသေန ဝိဟတာဃာတ’’န္တိ ဣမိနာ အပ္ပနာဘာဝပ္ပတ္တံ မေတ္တစိတ္တမေဝ ဒဿေတိ. ဣဒံ ပနာဝုသော ကတ္ထ ဝုတ္တံ ဘဂဝတာတိ ဧတ္ထ ဣဒံသဒ္ဒကိံသဒ္ဒါနံ ဝိသယံ ဒဿေန္တော အာဟ ‘‘ဣဒံ သိက္ခာပဒံ ကတရသ္မိံ နဂရေ’’တိ.

၉. စောဒကေန ဥပဋ္ဌာပေတဗ္ဗကထာ

၄၀၀. ‘‘ကာလေန ဝက္ခာမီ’’တိအာဒီသု စောဒနာယ ကာလအကာလာဒိံ ဒဿေန္တော အာဟ ‘‘ဧကော ဧက’’န္တိအာဒိ. တတ္ထ ဧကောတိ ဧကကော စောဒကော. ဧကန္တိ ဧကကံ စုဒိတကံ. သံဃမဇ္ဈ။ပေ။ အသနသာလာဒီသု ဝါ ပရိဝါရိတက္ခဏေ ဝါတိ ယောဇနာ. တတ္ထ ‘‘သံဃမဇ္ဈ။ပေ။ အသနသာလာဒီသူ’’တိ ဣမိနာ ဌာနာဘာဝံ ဒဿေတိ၊ ‘‘ဥပဋ္ဌာကေဟိ ပရိဝါရိတက္ခဏေ’’တိ ဣမိနာ ကာလာဘာဝံ ဒဿေတိ. ဣမေဟိ ပဒေဟိ ဌာနမ္ပိ ကာလေန သင်္ဂဟေတွာ ‘‘ကာလေန ဝက္ခာမီ’’တိ ဝုတ္တန္တိ ဒဿေတိ. တစ္ဆေနာတိ သစ္စေန. ဟမ္ဘောတိ နိပါတော ပစ္ဆိမပဒေသု ပစ္စေကံ ယောဇေတဗ္ဗော. ဟမ္ဘော မဟလ္လက၊ ဟမ္ဘော ပရိသာဝစရ၊ ဟမ္ဘော ပံသုကူလိက၊ ဟမ္ဘော ဓမ္မကထိကာတိ ဟိ အတ္ထော. ဣဒန္တိ ကမ္မံ. ကာရဏနိဿိတန္တိ မဟလ္လကဘာဝကာရဏာဒီသု နိဿိတံ. ‘‘ဘန္တေ’’တိ နိပါတောပိ ပစ္စေကံ ယောဇေတဗ္ဗော. ဧတ္ထ စ ‘‘ဟမ္ဘော’’တိ နိပါတေန လောကဝေါဟာရဝသေန အနာဒရဿ ပကာသကတ္တာ ဖရုသေန ဝဒတိ နာမ၊ ‘‘ဘန္တေ’’တိ နိပါတေန သာဒရဿ ပကာသကတ္တာ သဏှေန ဝဒတိ နာမ. ကာရဏနိဿိတံ ကတွာတိ ဣမသ္မိံ ဝီတိက္ကမေ အယံ နာမ ဒေါသောတိ ကာရဏနိဿိတံ ကတွာ. ‘‘မေတ္တစိတ္တံ ဥပဋ္ဌပေတွာ’’တိ ဣမိနာ မေတ္တစိတ္တောတိ ပဒဿ ‘‘ဝက္ခာမီ’’တိ ပဒေ ကိရိယာဝိသေသနဘာဝံ ဒဿေတိ. နော ဒေါသန္တရောတိ ဧတ္ထ အန္တရသဒ္ဒဿ စိတ္တဝါစကဘာဝံ ဒဿေန္တော အာဟ ‘‘န ဒုဋ္ဌစိတ္တော’’တိ. ‘‘ဟုတွာ’’တိ ဣမိနာ ကိရိယာဝိသေသနဘာဝံ ဒဿေတိ.

၁၀. စောဒကစုဒိတကပဋိသံယုတ္တကထာ

၄၀၁. အဇ္ဈတ္တန္တိ ဧတ္ထ အတ္တသဒ္ဒဿ စိတ္တဝါစကဘာဝဉ္စ သတ္တမီဝိဘတ္တိယာပိ အမာဒေသဘာဝဉ္စ ဒဿေန္တော အာဟ ‘‘အတ္တနော စိတ္တေ’’တိ. ဥပ္ပါဒေတွာတိ ဣမိနာ ‘‘မနသိကရိတွာ’’တိ ပဒဿ အဓိပ္ပါယတ္ထံ ဒဿေတိ. ကာရုညတာတိ ဧတ္ထ ဒွီသု ဏျပစ္စယတာပစ္စယေသု ဧကဿေဝ ဘာဝဝါစကတ္တာ ဧကော သွတ္ထောတိ ဒဿေန္တော အာဟ ‘‘ကရုဏဘာဝေါ’’တိ. တတ္ထ ကရုဏဿ ပုဂ္ဂလဿ ဘာဝေါ ကာရုညံ၊ တဒေဝ ကာရုညတာ. အထ ဝါ ကရုဏော ဧဝ ပုဂ္ဂလော ကာရုညံ၊ တဿ ဘာဝေါ ကာရုညတာတိ ဝစနတ္ထော ကာတဗ္ဗော. ဣမိနာတိ ‘‘ကာရုညတာ’’တိ ပဒေန. ကရုဏဉ္စာတိ အပ္ပနာပတ္တံ ကရုဏဉ္စ. ကရုဏာပုဗ္ဗဘာဂဉ္စာတိ အပ္ပနာပတ္တာယ ကရုဏာယ ပုဗ္ဗဘာဂေ ပရိကမ္မူပစာရဝသေန ပဝတ္တံ ကာမာဝစရကရုဏဉ္စ. ဒွီဟိပီတိ ‘‘ဟိတေသိတာ၊ အနုကမ္ပိတာ’’တိ ဒွီဟိပိ ပဒေဟိ. မေတ္တဉ္စာတိ အပ္ပနာပတ္တမေတ္တဉ္စ. မေတ္တာပုဗ္ဗဘာဂဉ္စာတိ အပ္ပနာပတ္တာယ မေတ္တာယ ပုဗ္ဗဘာဂေ ပရိကမ္မူပစာရဝသေန ပဝတ္တံ ကာမာဝစရမေတ္တဉ္စ. သုဒ္ဓန္တေတိ သုဒ္ဓေ ကောဋ္ဌာသေ. ပဋိညံ အာရောပေတွာတိ စုဒိတကံ ပဋိညံ အာရောပေတွာ. ယေ ဧတေတိ ‘‘ကာရုညတာ’’တိအာဒိနာ နယေန ယေ ဧတေ ပဉ္စ ဓမ္မာ ဝုတ္တာတိ ယောဇနာ. ဣမိနာ ဣမေ ပဉ္စ ဓမ္မေတိ ဧတ္ထ ဣမသဒ္ဒဿ အနိယမနိဒ္ဒေသဘာဝံ ဒဿေတိ.

သစ္စေ စ အကုပ္ပေ စာတိ ဧတ္ထ သစ္စသဒ္ဒဿ ဝိရတိသစ္စပရမတ္ထသစ္စာနိ ပဋိက္ခိပန္တော အာဟ ‘‘ဝစီသစ္စေ စာ’’တိ. ‘‘အကုပ္ပနတာယာ’’တိ ဣမိနာ နကုပဿ ဘာဝေါ အကုပ္ပန္တိ ကတွာ ဏျပစ္စယဿ ဘာဝတ္ထံ ဒဿေတိ. ဟီတိ သစ္စံ၊ ဝိတ္ထာရော ဝါ. န ပရော ဃဋ္ဋေတဗ္ဗောတိ န ပရော ကုဇ္ဈာပေတဗ္ဗော. သဗ္ဗတ္ထာတိ သဗ္ဗသ္မိံ ပါတိမောက္ခဋ္ဌပနက္ခန္ဓကေ.

ဣတိ ပါတိမောက္ခဋ္ဌပနက္ခန္ဓကဝဏ္ဏနာယ ယောဇနာ သမတ္တာ.