၁၀. ဘိက္ခုနိက္ခန္ဓကံ

မဟာပဇာပတိဂေါတမီဝတ္ထုကထာ

၄၀၂. ဘိက္ခုနိက္ခန္ဓကေ ကသ္မာ ပဋိက္ခိပတီတိ စောဒနံ ဒဿေတွာ တဿာ အာဘောဂံ ဒဿေန္တော အာဟ ‘‘နနူ’’တိအာဒိ. ‘‘ကာမ’’န္တိအာဒိနာ အဘျူပဂမပရိဟာရဝသေန ဝိဿဇ္ဇေတိ. တတ္ထ ကာမံသဒ္ဒေါ အနုဂ္ဂဟတ္ထော၊ ပန သဒ္ဒေါ ဂရဟတ္ထော၊ ပန တထာပိ ပဋိက္ခိပတီတိ သမ္ဗန္ဓော. တန္တိ မဟာပဇာပတိံ ဂေါတမိံ. ယာစိတေန ဟုတွာ အနုညာတန္တိ ယောဇနာ. အယန္တိ ပဗ္ဗဇ္ဇာ. ဘဒ္ဒကံ ကတွာတိ လဒ္ဓကံ ကတွာ၊ မနာပံ ကတွာတိ အတ္ထော.

၄၀၃. ကုမ္ဘထေနကေဟီတိ ဧတ္ထ ကုမ္ဘေ ဒီပံ ဇာလေတွာ တေနာလောကေန ထေနေန္တီတိ ကုမ္ဘထေနကာတိ ဒဿေန္တော အာဟ ‘‘ကုမ္ဘေ ဒီပံ ဇာလေတွာ’’တိအာဒိ.

နာဠိမဇ္ဈဂတန္တိ သဿနာဠဿ မဇ္ဈေ ဂတံ. ဂဏ္ဌိန္တိ ဖဠုံ. ‘‘ကဏ္ဍ’’န္တိပိ ပါဌော၊ ဒဏ္ဍန္တိ အတ္ထော. ယေနာတိ ပါဏကေန. အယဉှိ ယံသဒ္ဒေါ တံသဒ္ဒါနပေက္ခောတိ ဒဋ္ဌဗ္ဗော.

အန္တောရတ္တဘာဝေါတိ အန္တောလောဟိတဘာဝေါ. ဧတမတ္ထန္တိ ဧတံ ဝက္ခမာနံ အတ္ထံ. အာဠိယာတိ အာဝရဏာယ. အဗဒ္ဓါယပီတိ ပိသဒ္ဒေါ အနုဂ္ဂဟတ္ထော၊ ဗဒ္ဓါယ ပန ပဂေဝါတိ အတ္ထော. ကိဉ္စီတိ အပ္ပမတ္တကံ. ယန္တိ ဥဒကံ. တမ္ပီတိ ဥဒကမ္ပိ. ပိသဒ္ဒေါ အဗဒ္ဓါယ ဌိတံ ကိဉ္စိ ဥဒကံ အပေက္ခတိ. ယေ ဣမေ ဂရုဓမ္မာ ပညတ္တာတိ ယောဇနာ. ပဋိကစ္စေဝါတိ ပဂေဝ၊ ပဌမမေဝါတိ အတ္ထော. တေသူတိ ဂရုဓမ္မေသု. အပညတ္တေသု သန္တေသုပီတိ ယောဇနာ. ပဌမံ ဝုတ္တန္တိအာဒိ ဝုတ္တံ၊ ဝဿသဟဿမေဝ ဌဿတိ ဣတိ ဣမမတ္ထံ ဒဿေတီတိ ယောဇနာ. ‘‘ဝဿသဟဿ’’န္တိ စ ဧတံ ဝစနံ ဝုတ္တန္တိ သမ္ဗန္ဓော. တတောတိ ဝဿသဟဿတော. ပရိယတ္တိဓမ္မောပီတိ ပိသဒ္ဒေါ ပဋိဝေဓသဒ္ဓမ္မံ အပေက္ခတိ. ဒွီသု သဒ္ဓမ္မေသု ဌိတေသု ပဋိပတ္တိသဒ္ဓမ္မော ဌိတောယေဝါတိ ကတွာ န ဝုတ္တံ. တာနိယေဝါတိ ပဉ္စဝဿသဟဿာနိယေဝ. ပရိယတ္တိယာ သတိ ပဋိဝေဓော န ဟောတီတိ နာပိ ဝတ္တဗ္ဗောတိ ယောဇနာ. လိင်္ဂန္တိ သမဏဝေသံ၊ သမဏာကာရန္တိ အတ္ထော.

ဘိက္ခုနီဥပသမ္ပဒါနုဇာနနကထာ

၄၀၄. ဣမာယ အနုပညတ္တိယာတိ မဟာပဇာပတိယာ အဋ္ဌဂရုဓမ္မပဋိဂ္ဂဟဏူပသမ္ပဒံ ဥပနိဓာယ အယံ ပညတ္တိ အနုပညတ္တိ နာမ၊ တာယ အနုပညတ္တိယာ ဥပသမ္ပာဒေတုန္တိ အတ္ထော. မဟာပဇာပတိယာ သဒ္ဓိဝိဟာရိနိယော ကတွာတိ မဟာပဇာပတိံ ဥပဇ္ဈံ ကတွာ ပဉ္စသတာ သာကိယာနိယော တဿာ သဒ္ဓိဝိဟာရိနိယော ကတွာတိ အတ္ထော. ဣတီတိ တသ္မာ အဟေသုန္တိ သမ္ဗန္ဓော. ဣမိနာ ဩဝါဒေနာတိ ဘဂဝတော ဣမိနာ ဩဝါဒေန.

၄၁၀. ဧတိဿာတိ ဧတိဿာ ဘိက္ခုနိယာ. တန္တိ ကမ္မံ. အညသ္မိန္တိ အညသ္မိံ ကမ္မေ. အညန္တိ ရောပိတဗ္ဗကမ္မတော အညံ ကမ္မံ.

၄၁၁. ကဒ္ဒမောဒကေနာတိ ကဒ္ဒမေန အာလုဠိတေန ဥဒကေနေဝ. ကဒ္ဒမာဒီသုပီတိ ပီသဒ္ဒေါ ‘‘ယေန ကေနစီ’’တိ ဧတ္ထ ယောဇေတဗ္ဗော. ယေန ကေနစိပီတိ ဟိ အတ္ထော. သန္နိပတိတွာတိ ဘိက္ခုနိသံဃေန သန္နိပတိတွာ. အပသာဒနီယန္တိ အပသာဒေတဗ္ဗံ ကမ္မံ. ဧတ္တာဝတာတိ ဧတ္တကေန သာဝနမတ္တေန. အဝန္ဒိယောတိ န ဝန္ဒေတဗ္ဗော၊ ဝန္ဒိတုံ န အရဟောတိ အတ္ထော. တတောတိ တိက္ခတ္တုံ သာဝေတဗ္ဗတော. န ဝန္ဒန္တီတိ ဘိက္ခုနိယော န ဝန္ဒန္တိ. ဒိသွာပီတိ တံ ဘိက္ခုံ ဒိသွာပိ. တေန ဘိက္ခုနာတိ အပသာဒနီယံ ဒဿေန္တေန ဘိက္ခုနာ၊ ခမာပေတဗ္ဗန္တိ သမ္ဗန္ဓော. ဝိဟာရေယေဝါတိ ဘိက္ခူနံ ဝိဟာရေယေဝ. တေန ဘိက္ခုနာတိ ဥပသင်္ကမိတဗ္ဗေန ဘိက္ခုနာ၊ ဝတ္တဗ္ဗန္တိ သမ္ဗန္ဓော. တတောတိ ဝတ္တဗ္ဗကာလတော. သောတိ အပသာဒနီယံ ဒဿေန္တော ဘိက္ခု. ဧတ္ထာတိ ဘိက္ခုနိက္ခန္ဓကေ. ကမ္မဝိဘင်္ဂေတိ ပရိဝါရာဝသာနေ ကမ္မာနံ ဝိဘင်္ဂဋ္ဌာနေ (ပရိ. အဋ္ဌ. ၄၉၅-၄၉၆).

ဩဘာသန္တီတိ အဝ ဟီနေန ဘာသန္တီတိ ဒဿေန္တော အာဟ ‘‘အသဒ္ဓမ္မေန ဩဘာသန္တီ’’တိ. ‘‘ဘိက္ခုနီဟိ သဒ္ဓိံ သမ္ပယောဇေန္တီ’’တိ ဧတ္ထ ကမ္မကရဏေ ဒဿေန္တော အာဟ ‘‘ပုရိသေ အသဒ္ဓမ္မေနာ’’တိ. ဧတ္ထ ‘‘ပုရိသေ’’တိ ဣမိနာ ကမ္မံ ဒဿေတိ၊ ‘‘အသဒ္ဓမ္မေနာ’’တိ ဣမိနာ ကရဏံ. ဝိဟာရပ္ပဝေသနေတိ ဘိက္ခူနံ ဝိဟာရပ္ပဝေသနေ. ဩဝါဒံ ဌပေတုန္တိ ဧတ္ထ ဩဝါဒဋ္ဌပနာကာရံ ဒဿေန္တော အာဟ ‘‘န ဘိက္ခုနုပဿယ’’န္တိအာဒိ. ဩဝါဒတ္ထာယာတိ ဩဝါဒပဋိဂ္ဂဟဏတ္ထာယ. မာ ကရိတ္ထာတိ မာ ကရေယျာထ.

၄၁၆. ဂိဟိဒါရိကာယောတိ ဂိဟိဘူတာ ဒါရိကာယော ဗန္ဓန္တိ ဝိယာတိ ယောဇနာ. ဃနပဋ္ဋကေနာတိ ဃနဘူတေန ပဋ္ဋေန နိယုတ္တေန. ဧကပရိယကန္တိ ဧတ္ထ ဧကဝါရံ ကဋိယံ ပရိက္ခိပိတွာ ကတံ ကာယဗန္ဓနံ ဧကပရိယကန္တိ ဒဿေန္တော အာဟ ‘‘ဧကဝါရံ ပရိက္ခိပနက’’န္တိ. တတ္ထ ပရိက္ခိပနကန္တိ ကဋိယံ ပရိက္ခိပနာရဟံ.

ဝိလီဝေနာတိ ဧတ္ထ ဗဟုတ္ထေ ဧကဝစနန္တိ အာဟ ‘‘သဏှေဟိ ဝိလီဝေဟီ’’တိ. ‘‘ကတပဋ္ဋေနာ’’တိ ဣမိနာ ပါဠိယံ ‘‘ကတေနာ’’တိ ပါဌသေသံ ဒဿေတိ. သေတဝတ္ထပဋ္ဋေနာတိ သေတဝတ္ထေန ကတေန ပဋ္ဋေန. ကတဝေဏိယာတိ ကတာယ ဝေဏိယာ. ဣမိနာ ဒုဿေန ကတာ ဝေဏိ ဒုဿဝေဏီတိ ဝစနတ္ထံ ဒဿေတိ. ဧသေဝ နယော ပုရိမပစ္ဆိမပဒေသုပိ. စောဠကာသာဝန္တိ စောဠမေဝ ကသာဝေန ရတ္တတ္တာ စောဠကာသာဝံ.

အဋ္ဌိလ္လေနာတိ အဒ္ဒေန အဋ္ဌိနာ. ‘‘ဂေါဇင်္ဃဋ္ဌိကေ’’တိ ဣမိနာ အဋ္ဌိနော သမ္ဗန္ဓံ ဒဿေတိ. ဟတ္ထံ ကောဋ္ဋာပေန္တီတိ ဧတ္ထ ဟတ္ထံ နာမ အဂ္ဂဗာဟမေဝါဓိပ္ပေတံ၊ န ကပ္ပရတော ပဋ္ဌာယာတိ ဒဿေန္တော အာဟ ‘‘အဂ္ဂဗာဟ’’န္တိ. ပိဋ္ဌိဟတ္ထန္တိ ဟတ္ထပိဋ္ဌိံ. ပိဋ္ဌိပါဒန္တိ ပါဒပိဋ္ဌိံ.

၄၁၇. ဝုတ္တနယာနေဝါတိ ဆဗ္ဗဂ္ဂိယာနံ မုခလိမ္ပနာဒီသု (စူဠဝ. အဋ္ဌ. ၂၄၇) ဝုတ္တနယာနေဝ. အင်္ဂဒေသေတိ သရီရပ္ပဒေသေ. ဂဏ္ဍပ္ပဒေသေတိ ကပေါလပ္ပဒေသေ. သာလောကေ တိဋ္ဌန္တီတိ ဧတ္ထ သံဝိဇ္ဇတိ အာလောကော ဧတ္ထာတိ သာလောကန္တိ ကတွာ ဒွါရံ ဂဟေတဗ္ဗံ. တေန ဝုတ္တံ ‘‘ဒွါရံ ဝိဝရိတွာ’’တိ. ဝုဋ္ဌာပေန္တီတိ ဥပသမ္ပာဒေန္တိ. သူနံ ဌပေန္တီတိ ဧတ္ထ သူနာသဒ္ဒေါ မံသပရိယာယောတိ အာဟ ‘‘မံသံ ဝိက္ကိဏန္တီ’’တိ. တေနာတိ ဒါသေန. ဣဒံ ပဒံ ‘‘ကာရေန္တီ’’တိ ပဒေ ကာရိတကမ္မံ. ‘‘ဟရိတကဉ္စေဝ ပက္ကဉ္စာ’’တိ ဣမိနာ ဟရိတကပက္ကိကန္တိ ပဒဿ ဒွန္ဒဝါကျံ ဒဿေတိ. တတ္ထ ဟရိတကန္တိ ဟရိတမေဝ ပဏ္ဏံ. ပက္ကန္တိ သေဒိတံ ပဏ္ဏံ.

၄၁၈. ကထိတာယေဝါတိ စီဝရက္ခန္ဓကေ ကထိတာယေဝ.

၄၁၉. ပါဠိမုတ္တကဝိနိစ္ဆယောတိ ပါဠိယံ ဝုတ္တဝိနိစ္ဆယတော မုတ္တော ဝိနိစ္ဆယော. ပါဠိမုတ္တကဝိနိစ္ဆယံ ဝိတ္ထာရေန္တော အာဟ ‘‘သစေ ဟီ’’တိအာဒိ. ယော ကောစိ ကာလံ ကရောန္တော ဝဒတီတိ သမ္ဗန္ဓော. မမစ္စယေနာတိ မမ အတိက္ကမေန. အညဿာတိ ဝုတ္တေဟိ ဥပဇ္ဈာယာဒီဟိ အညဿ. တေသန္တိ ဥပဇ္ဈာယာဒီနံ. န ဟောတီတိ ပရိက္ခာရော န ဟောတိ. ဟီတိ သစ္စံ၊ ယသ္မာ ဝါ. အစ္စယဒါနန္တိ အစ္စယေန ဟောတူတိ ဒါနံ. န ရုဟတီတိ ပဉ္စန္နံ သဟဓမ္မိကာနံ ပဗ္ဗဇိတဿ ဝါ ဂဟဋ္ဌဿ ဝါ ယဿ ကဿစိ အစ္စယဒါနံ တေသံ န ရုဟတိ၊ သံဃဿေဝ ရုဟတီတိ အဓိပ္ပါယော. ဂိဟီနံ ပန အစ္စယဒါနန္တိ သမ္ဗန္ဓော. ရုဟတီတိ ဂိဟီနံ ပဗ္ဗဇိတဿ ဝါ ဂဟဋ္ဌဿ ဝါ ယဿ ကဿစိ အစ္စယဒါနံ တေသံ ရုဟတိ၊ တေသံယေဝ သန္တကော ဟောတီတိ အဓိပ္ပါယော.

၄၂၀. ပုရာဏမလ္လီတိ ဧတ္ထ မလ္လဿ ဘရိယာ မလ္လီ၊ ပုရာဏေ မလ္လီ ပုရာဏမလ္လီတိ ဒဿေန္တော အာဟ ‘‘ပုရာဏေ’’တိအာဒိ. ‘‘ဂိဟိကာလေ’’တိ ဣမိနာ ‘‘ပုရာဏေ’’တိ ဧတ္ထ ဏပစ္စယဿ သရူပံ ဒဿေတိ. မလ္လဿာတိ မုဋ္ဌိမလ္လဿ. ပုရိသဗျဉ္ဇနန္တိ ဧတ္ထ ဗျဉ္ဇနသဒ္ဒေါ နိမိတ္တပရိယာယောတိ အာဟ ‘‘ပုရိသနိမိတ္တ’’န္တိ. စိတ္တန္တိ ရာဂစိတ္တံ.

၄၂၁. ယန္တိ ယံ ဝတ္ထု၊ အဂ္ဂန္တိ ပဌမဘာဂံ. အသပ္ပါယန္တိ အတ္တနော အသပ္ပါယံ.

ဟိယျောတိ အတီတာနန္တရာဟနိ. အညသ္မိန္တိ ဘိက္ခုနီဟိ အညသ္မိံ. ‘‘ဘိက္ခုနီဟီ’’တိ ပဒံ ‘‘ပဋိဂ္ဂါဟာပေတွာ’’တိ ပဒေ ကာရိတကမ္မံ. ဟီတိ သစ္စံ၊ ယသ္မာ ဝါ.

၄၂၆. ‘‘ဘောဇနကာလ’’န္တိ ဣမိနာ ‘‘ကာလံ ဝီတိနာမေသု’’န္တိ ဧတ္ထ ကာလဝိသေသံ ဒဿေတိ.

ပုရေတိ အာဒိမှိ. တာသန္တိ အဋ္ဌန္နံ ဘိက္ခုနီနံ. အဗ္ဘန္တရိမာတိ အဗ္ဘန္တရေ ပရိယာပန္နာ. အညာတိ အဋ္ဌဟိ ဘိက္ခုနီဟိ အညာ. နဝကတရာ ဟောတီတိ သမ္ဗန္ဓော. ‘‘ဌပေတွာ ဘတ္တဂ္ဂ’’န္တိ ဣမိနာ အညတ္ထ သဗ္ဗတ္ထ ယထာဝုဍ္ဎံ န ပဋိဗာဟိတဗ္ဗန္တိ ဧတ္ထ အညသဒ္ဒဿ အပါဒါနံ ဒဿေတိ. အညသ္မိန္တိ ဧတ္ထ သ္မိံဝစနေန တ္ထပစ္စယဿ အတ္ထံ ဒဿေတိ. ‘‘စတုပစ္စယဘာဇနီယဋ္ဌာနေ’’တိ ဣမိနာ သရူပံ ဒဿေတိ.

၄၃၀. ဒူတေနပိ ဥပသမ္ပာဒေတုန္တိ ဧတ္ထ ကိံ သဗ္ဗထာ ဒူတေန ဥပသမ္ပဒါ ဝဋ္ဋတီတိ အာဟ ‘‘ဒူတေန။ပေ။ ဝဋ္ဋတီ’’တိ. ယေန ကေနစိ အန္တရာယေနာတိ သမ္ဗန္ဓော၊ အသတိ အန္တရာယေ န ဝဋ္ဋတီတိ အဓိပ္ပါယော. ကမ္မဝါစာပရိယောသာနေ ဥပသမ္ပန္နာဝ ဟောတီတိ သမ္ဗန္ဓော. တာဝဒေဝါတိ ဥပသမ္ပန္နက္ခဏေယေဝ.

၄၃၁. နဝကမ္မမ္ပီတိ ပိသဒ္ဒေါ ဥဒေါသိတဥပဿယေ အပေက္ခတိ.

၄၃၂. တဿာတိ တဿာ ဣတ္ထိယာ. ယာဝ သော ဒါရကော ဝိညုတံ ပါပုဏာတီတိ ဧတ္ထ ကထံ ဝိညုဘာဝေါ ဂဟေတဗ္ဗောတိ အာဟ ‘‘ယာဝ ခါဒိတု’’န္တိအာဒိ.

ဌပေတွာ သာဂါရန္တိ ဧတ္ထ သကာရော သဟသဒ္ဒကာရိယော၊ အဂါရန္တိ စ သေယျာဂါရန္တိ ဒဿေန္တော အာဟ ‘‘သဟာဂါရသေယျမတ္တံ ဌပေတွာ’’တိ. ယထာ အညသ္မိံ ပုရိသေ ပဋိပဇ္ဇိတဗ္ဗံ၊ ဧဝံ တထာတိ ယောဇနာ. ‘‘အညသ္မိ’’န္တိ ဣမိနာ ပါဠိယံ အညေ ပုရိသေတိ ဧတ္ထ သ္မိံဝစနဿ သဗ္ဗနာမတော ဧကာရာဒေသော ဒဿိတော၊ တံဒဿနေန စ ကစ္စာယနေ (ကစ္စာယနေ ၁၁၀ သုတ္တေ) သဗ္ဗနာမတော သ္မိံဝစနဿ ဧကာရာဒေသနိသေဓနံ အနိစ္စန္တိ ဒဿေတိ.

၄၃၄. ‘‘ယဒေဝ သာ ဝိဗ္ဘန္တာ’’တိ ဣမိနာ ဒဿေတီတိ သမ္ဗန္ဓော. ‘‘ယသ္မာ’’တိ ဣမိနာ ယဒေဝါတိ ဧတ္ထ ယံသဒ္ဒဿ ကာရဏတ္ထံ ဒဿေတိ. ဩဒါတာနိ ဝတ္ထာနိ နိဝတ္ထာတိ သမ္ဗန္ဓော. ‘‘တသ္မာယေဝါ’’တိ ဣမိနာ တဒေဝါတိ ပဒဿ ကာရဏတ္ထမေဝ ဒဿေတိ. ‘‘န သိက္ခာပစ္စက္ခာနေနာ’’တိ ဣမိနာ ဧဝတ္ထဖလံ ဒဿေတိ. သာ ပုန ဥပသမ္ပဒံ န လဘတီတိ သာ ဝိဗ္ဘန္တာ ဘိက္ခုနီ ပုန ဥပသမ္ပဒံ န လဘတိ.

ပဗ္ဗဇ္ဇမ္ပိ န လဘတီတိ တိတ္ထာယတနသင်္ကန္တာ ဘိက္ခုနီ ပဗ္ဗဇ္ဇမ္ပိ န လဘတိ၊ ပဂေဝ ဥပသမ္ပဒံ.

ပါဒေ သမ္ဗာဟန္တာတိ ဘိက္ခုနီနံ ပါဒေ သမ္ဗာဟန္တာ. ကေသေတိ ဘိက္ခုနီနံ ကေသေ. တတြာတိ ‘‘ကုက္ကုစ္စယန္တာ န သာဒိယန္တီ’’တိ ဝစနေ. ဧကေ အာစရိယာ ဝဒန္တီတိ သမ္ဗန္ဓော. သာရတ္တာ ဟောန္တီတိ ယောဇနာ. ဧတ္ထာတိ ပုရိသာနံ အဘိဝါဒနာဒီသု. ဣဒန္တိ ပုရိသာနံ အဘိဝါဒနာဒိ၊ ‘‘အနုညာတ’’န္တိ ပဒေ ဝုတ္တကမ္မံ ‘‘ဝဋ္ဋတီ’’တိ ပဒေ ဝုတ္တကတ္တာ. အထ ဝါ ဩဒိဿ အနုညာတံ ဣဒံ ပုရိသာနံ အဘိဝါဒနာဒိ ဝဋ္ဋတီတိ ယောဇနာ. ဧဝဉှိ သတိ ‘‘ဩဒိဿ အနုညာတ’’န္တိ ပဒံ ဟေတုအန္တောဂဓဝိသေသနံ၊ ဩဒိဿ အနုညာတတ္တာ ဝဋ္ဋတီတိ အဓိပ္ပါယော. တန္တိ အဋ္ဌကထာသု ဝုတ္တဝစနံ. ဟီတိ သစ္စံ၊ ယသ္မာ ဝါ.

၄၃၅. ပလ္လင်္ကေန နိသီဒန္တီတိ ဧတ္ထ အာသနပလ္လင်္ကံ ပဋိက္ခိပန္တော အာဟ ‘‘ပလ္လင်္ကံ အာဘုဇိတွာ နိသီဒန္တီ’’တိ. တတ္ထ အာဘုဇိတွာတိ အာဗန္ဓိတွာ. ကူပေါတိ ဝစ္စကူပေါ. ဥပရီတိ ကူပတော ဥပရိ. ‘‘သဗ္ဗဒိသာသု ပညာယတီ’’တိ ဣမိနာ ပဋိစ္ဆန္နမေဝ အတ္ထိ၊ န ဥပရိ ဆန္နန္တိ ဒဿေတိ.

၄၃၆. ကုဏ္ဍကန္တိ ကဏံ. ဧတ္ထာတိ ဘိက္ခုနိက္ခန္ဓကေ.

ဣတိ ဘိက္ခုနိက္ခန္ဓကဝဏ္ဏနာယ ယောဇနာ သမတ္တာ.