၁၁. ပဉ္စသတိကက္ခန္ဓကံ

၁. ခုဒ္ဒါနုခုဒ္ဒကသိက္ခာပဒကထာ

၄၄၁. ပဉ္စသတိကက္ခန္ဓကေ ‘‘စတ္တာရိ။ပေ။ ခုဒ္ဒကာနီ’’တိ ဧဝမာဒိ ဝုတ္တန္တိ သမ္ဗန္ဓော. ပရိယာယေနာတိ ကာရဏေန. ဓူမကာလိကန္တိ ဧတ္ထ ဓူမဿ ကာလော ဓူမကာလော၊ ဓူမဿ ဥဋ္ဌိတကာလောတိ အတ္ထော. သော ဧတဿတ္ထီတိ ဓူမကာလိကံ၊ သိက္ခာပဒပညတ္တံ. ဣတိ ဣမမတ္ထံ ဒဿေန္တော အာဟ ‘‘ယာဝါ’’တိအာဒိ.

၄၄၃. ဣဒန္တိ ‘‘ကတမာနိ ပန ဘန္တေ ခုဒ္ဒါနုခုဒ္ဒကာနိ သိက္ခာပဒါနီ’’တိ အပုစ္ဆနံ. ‘‘တယာ’’တိ ဣမိနာ ဣဒံ တေတိ ဧတ္ထ တေသဒ္ဒဿ ‘‘တုယှံ၊ တဝါ’’တိ အတ္ထေ ပဋိက္ခိပတိ. အာပတ္တိန္တိ ဒုက္ကဋာပတ္တိံ. ဟီတိ သစ္စံ၊ ယသ္မာ ဝါ. တေတိ ထေရာ. ‘‘သံဃော။ပေ။ န သမုစ္ဆိန္ဒတီ’’တိ ဧတံ ဝစနံ အနုဿာဝိတန္တိ ယောဇနာ. ‘‘ဒေသေဟိ တံ အာဝုသော ဒုက္ကဋ’’န္တိ ဣဒမ္ပိ စ ဝုတ္တန္တိ သမ္ဗန္ဓော. ထေရော ပနာတိ အာနန္ဒတ္ထေရော ပန အာဟာတိ သမ္ဗန္ဓော. တတ္ထာတိ အပုစ္ဆနေ. ယထာတိ ယေနာကာရေန. စတူသု ဌာနေသူတိ ‘‘ဘဂဝတော ဝဿိကသာဋိကံ အက္ကမိတွာ သိဗ္ဗေသီ’’တိအာဒီသု စတူသု ဌာနေသု. ဧတ္ထာတိ ပဉ္စသတိကက္ခန္ဓကေ.

ဣတိ ပဉ္စသတိကက္ခန္ဓကဝဏ္ဏနာယ ယောဇနာ သမတ္တာ.