၆. ပိဏ္ဍစာရိကဝတ္တကထာ

၃၆၆. ပိဏ္ဍစာရိကဝတ္တေ ဧဝံ ဝိနိစ္ဆယော ဝေဒိတဗ္ဗောတိ ယောဇနာ. ကပ္ပါသံ ဝါ ဂဟေတွာတိ သမ္ဗန္ဓော. ယဉ္စာတိ ယဉ္စ ကိဉ္စိ ဝတ္ထုံ၊ ဂဟေတွာတိ သမ္ဗန္ဓော. ကရောန္တီ ဌိတာ ဝါတိ ကရောန္တီ ဟုတွာ ဌိတာ ဝါ. တန္တိ ကမ္မံ. န စ ဘိက္ခာဒါယိကာယာတိ ဣတ္ထိလိင်္ဂဝသေန ဝုတ္တတ္တာ ဣတ္ထိယာ ဧဝ မုခံ န ဥလ္လောကေတဗ္ဗန္တိ အတ္ထံ ပဋိက္ခိပန္တော အာဟ ‘‘ဣတ္ထီ ဝါ ဟောတူ’’တိအာဒိ. ‘‘ဘိက္ခာဒါနသမယေ’’တိ ဣမိနာ အညသ္မိံ သမယေ ဩလောကေန္တောပိ နတ္ထိ ဒေါသောတိ ဒဿေတိ. ဧကသ္မိံ ကာလေ ဘိက္ခာယ ဒဒမာနာယ သဗ္ဗကာလမ္ပိ န ဩလောကေတဗ္ဗန္တိ အနိစ္ဆိတတ္ထံ ပဋိက္ခိပတိ.