၂၁၈. အတိရေကစီဝရာဒိကထာ

၃၄၈. အစ္ဆုပေယျန္တိ ဧတ္ထ အစ္ဆိ ဝုစ္စတိ နေတ္တမဏ္ဍလံ၊ တံ ဝိယာတိ အစ္ဆိ ဆိဒ္ဒေါ၊ တသ္မိံ ဥပဂန္တဗ္ဗံ ဥပနေတဗ္ဗန္တိ အစ္ဆုပေယျံ. ‘‘လဂ္ဂါပေယျ’’န္တိ ဣမိနာ အဓိပ္ပါယတ္ထံ ဒဿေတိ. ဧတ္ထာတိ ပံသုကူလေ. သဗ္ဗမိဒန္တိ ‘‘ဒိဂုဏံ သင်္ဃာဋိ’’န္တိအာဒိကံ သဗ္ဗံ ဣဒံ ဝစနံ. ဥဒ္ဓရိတွာတိ အပနေတွာ. သံသိဗ္ဗိတန္တိ အညမညံ သမ္ဗန္ဓိတွာ သိဗ္ဗိတံ.

၃၅၁. သောဝဂ္ဂိကန္တိ ဧတ္ထ သုန္ဒရာနိ အဂ္ဂါနိ ရူပါဒီနိ ဧတ္ထာတိ သဂ္ဂေါ၊ ပုဗ္ဗပဒေ ဥကာရဿ လောပေါ၊ ဥကာရဿ ဥဝါဒေသေ ‘‘သုဝဂ္ဂေါ’’တိ သိဇ္ဈတိ. သုဝဂ္ဂပ္ပတ္တဟေတုကံ သောဝဂ္ဂိကံ၊ ဒါနံ၊ တမတ္ထံ ဒဿေန္တော အာဟ ‘‘သဂ္ဂပ္ပတ္တဟေတုက’’န္တိ. ‘‘အပနေတီ’’တိ ဣမိနာ နုဒဓာတုယာ အပနယနတ္ထံ ဒဿေတိ. အနာမယာတိ ဧတ္ထ အာမယသဒ္ဒေါ ရောဂပရိယာယောတိ အာဟ ‘‘အရောဂါ’’တိ. နတ္ထိ အာမယော ဧတိဿာတိ အနာမယာ.

၃၅၃. ဈာနလာဘိနောတိ ဈာနလာဘီနံ ပုထုဇ္ဇနာနံ ကာမစ္ဆန္ဒနီဝရဏဿ ဝိက္ခမ္ဘနတ္တာ ဝုတ္တံ.

၃၅၆. သမောဓာနဝသေန ဒဿိယိတ္ထာတိ သန္ဒိဋ္ဌော. သမောဓာနဝသေန ဘဇိယိတ္ထာတိ သမ္ဘတ္တော. အဘိမုခံ လပိတ္ထာတိ အာလပိတော. ဣမေဟီတိ ဣမေဟိ ဒွီဟိ.