၂၂၁. ပစ္ဆိမဝိကပ္ပနုပဂစီဝရာဒိကထာ

၃၅၉. ကတပံသုကူလောတိ ကတော ပံသုကူလော. ဣမိနာ ‘‘ပံသုကူလတော’’တိ ပဒဿ ဝိသေသနပရပဒတ္တံ ဒဿေတိ. အဂ္ဂဠာရောပနေနာတိ အဂ္ဂဠဿ အာရောပနေန. ‘‘သုတ္တေနေဝါ’’တိ ဧတ္ထ ဧဝသဒ္ဒေန ပိလောတိကံ နိဝတ္တေတိ. အဉ္ဆိတွာ အဉ္ဆိတွာတိ အာကဍ္ဎိတွာ အာကဍ္ဎိတွာ. အဘိဓာတု ဟိ အာကဍ္ဎနတ္ထော. ‘‘သင်္ဃာဋိကောဏော ဒီဃော’’တိ ဣမိနာ ဝိကဏ္ဏောတိ ဧတ္ထ ဝိသမော ကဏ္ဏော ဝိကဏ္ဏောတိ ကတွာ ကဏ္ဏသဒ္ဒဿ ကောဏတ္ထံ ဒဿေတိ. တတောတိ ဂဠနတော. လုဇ္ဇန္တီတိ ဝလိံ ဂဏှန္တိ. အဋ္ဌပဒကန္တိ ပဒဿ အဋ္ဌပဒေန သိဗ္ဗိတံ အဋ္ဌပဒကန္တိ ဝစနတ္ထံ ဒဿေန္တော အာဟ ‘‘အဋ္ဌပဒကစ္ဆိန္နေန ပတ္တမုခံ သိဗ္ဗိတု’’န္တိ. တတ္ထ အဋ္ဌပဒကစ္ဆိန္နေန ပတ္တမုခံ သိဗ္ဗိတုန္တိ အဋ္ဌပဒလိခနေန တတ္ထ တတ္ထ ဂဗ္ဘံ ဒဿေတွာ ပတ္တမုခံ သိဗ္ဗိတုံ. ‘‘အဋ္ဌပဒကစ္ဆန္နေနာ’’တိပိ ပါဌော၊ အဋ္ဌဖလကာကာရေနာတိ အတ္ထော.

၃၆၀. ‘‘အာဂန္တုကပတ္တမ္ပိ ဒါတု’’န္တိ ဣမိနာ အနွာဒိကန္တိ ပဒဿ အနုပစ္ဆာ အာဂန္တုကဘာဝေန ဒီယတီတိ အနွာဒိကန္တိ ဝစနတ္ထံ ဒဿေတိ. စတုတ္ထက္ခရေနပိ ပါဌော၊ အနုပစ္ဆာ အာဂန္တုကဘာဝေန ဓီယတိ ဌပီယတီတိ အနွာဓိကန္တိ ကာတဗ္ဗော. ဣဒံ ပနာတိ အနွာဓိကံ ပန.

၃၆၁. သေသဉာတီနန္တိ မာတာပိတူဟိ သေသဉာတီနံ. ဝိနိပါတေတိယေဝါတိ ဝိနဿန္တော နိပါတေတိယေဝ.

၃၆၂. ‘‘ဝဿိကော’’တိ သင်္ကေတီယတိ ဂဏှီယတီတိ ဝဿိကသင်္ကေတန္တိ ဝုတ္တေ စတ္တာရော မာသာတိ အာဟ ‘‘စတ္တာရော မာသေ’’တိ. ဟီတိ သစ္စံ၊ ယသ္မာ ဝါ. အာရညကဿ ဘိက္ခုနောတိ သမ္ဗန္ဓော. တေနာတိ အာရညကေန ဘိက္ခုနာ.