၂၀၅. ရာဇဂဟသေဋ္ဌိဝတ္ထုကထာ

၃၃၂. ဣရိယာပထသမ္ပရိဝတ္တနေနာတိ ဣရိယာပထဿ ပုနပ္ပုနံ ပရိဝတ္တနေန. တီဟိ သတ္တာဟေဟိ နိစ္စလဿ နိပန္နဿ အဿ သေဋ္ဌိဿ မတ္ထလုင်္ဂန္တိ ယောဇနာ. အပ္ပေဝ နိပဇ္ဇေယျာတိ ယောဇနာ. နန္တိ သေဋ္ဌိံ. တေနေဝါတိ တေနေဝ ကာရဏေန. သီသံ ဆာဒေတီတိ သီသစ္ဆဝီတိ ဝုတ္တေ သီသပဋိစ္ဆာဒနစမ္မန္တိ အာဟ ‘‘သီသစမ္မ’’န္တိ. တဿာတိ သေဋ္ဌိဿ. တီဟိ သတ္တာဟေနာတိ ဧတ္ထ ပုဗ္ဗပဒေန ပစ္ဆိမပဒံ ဂုဏိတွာ ဂဟေတဗ္ဗန္တိ အာဟ ‘‘တီဟိ ပဿေဟိ ဧကေနေကေန သတ္တာဟေနာ’’တိ.

၃၃၃. ဇနံ နီဟရာပေတွာတိ ဇနံ အပက္ကမာပေတွာ.