၂၀၇. ပဇ္ဇောတရာဇဝတ္ထုကထာ

၃၃၄. ဝိစ္ဆိကဿ ဇာတောတိ ဝိစ္ဆိကဿ ကာရဏာ ဇာတော၊ ဝိစ္ဆိကံ ပဋိစ္စ ဇာတောတိ အတ္ထော. သဗ္ဗိ စ ဘေသဇ္ဇံ ဝိစ္ဆိကာနံ ပဋိကူလံ ဟောတီတိ ယောဇနာ. ပညာသယောဇနိကာတိ ဧတ္ထ ဏိကပစ္စယဿ ဂန္တုံ သမတ္ထတ္ထေ ပဝတ္တဘာဝံ ဒဿေန္တော အာဟ ‘‘ဂန္တုံ သမတ္ထော ဟောတီ’’တိ. အဿ ရညောတိ စန္ဒပဇ္ဇောတနာမကဿ အဿ ရညော. ဟတ္ထိနီယေဝါတိ ဘဒ္ဒဝတိကာ နာမ ဟတ္ထိနီယေဝ. ဝီသယောဇနသတန္တိ ဝီသာဓိကံ ယောဇနသတံ.

ဘုဉ္ဇိတုံ နိသိန္နဿ ဧကဿ ကုလပုတ္တဿ ဒွါရေတိ ယောဇနာ. တဿာတိ ကုလပုတ္တဿ၊ အာရောစေသီတိ သမ္ဗန္ဓော. သောတိ ကုလပုတ္တော၊ ‘‘အာဟရာ’’တိ အာဏာပေသီတိ သမ္ဗန္ဓော. ဣတရောတိ ပုရိသော. တန္တိ ပတ္တံ. ယတ္ထ ယတ္ထာတိ ယသ္မိံ ယသ္မိံ ဘဝေ. တတ္ထ တတ္ထ ဝါဟနသမ္ပန္နော ဟောမီတိ ယောဇနာ. သောတိ ပုရိသော. ပဇ္ဇောတော နာမ အယံ ရာဇာ ဇာတောတိ ယောဇနာ.

သဗ္ဗိံ ပါယေတွာတိ ဣဒံ ဥပလက္ခဏမတ္တန္တိ ဒဿေန္တော အာဟ ‘‘သဗ္ဗိဉ္စ ပါယေတွာ’’တိအာဒိ. သဗ္ဗိဉ္စ ပါယေတွာ၊ ပရိစာရကာနံ အာဟာရာစာရေ ဝိဓိဉ္စ အာစိက္ခိတွာတိ အတ္ထော. ဩလုမ္ပေတွာတိ လုပိဓာတု ဩဒဟနတ္ထောတိ အာဟ ‘‘ဩဒဟိတွာ’’တိ. ဝိရေစေသီတိ ဥဒ္ဓဉ္စ အဓော စ ဝိရေစေသိ.