၁၀၅. ဝဇ္ဇနီယပုဂ္ဂလသန္ဒဿနကထာ

၁၈၃. ဟတ္ထပါသူပဂမနမေဝါတိ ဥပေါသထသံဃာဒီနံ ဟတ္ထပါသဿ ဥပဂမနမေဝ. ဣဒံ ပါရိဝါသိယပါရိသုဒ္ဓိဒါနံ နာမ န ဝဋ္ဋတီတိ ယောဇနာ. တဿာတိ ပါရိဝါသိယပါရိသုဒ္ဓိဒါနဿ. အနုပေါသထေတိ ဧတ္ထ အကာရဿ အညတ္ထံ ဒဿေန္တော အာဟ ‘‘အညသ္မိံ ဒိဝသေ’’တိ. တတ္ထ အညသ္မိန္တိ ဒွီဟိ ဥပေါသထေဟိ အညသ္မိံ. ယာ သံဃသာမဂ္ဂီ ကရိယတိ၊ တထာရူပိန္တိ ယောဇနာ. ကောသမ္ဗကဘိက္ခူနန္တိ ကောသမ္ဗိယံ နိဝါသီနံ ဘိက္ခူနံ. သာမဂ္ဂီ ဝိယ ယာ သာမဂ္ဂီတိ ယောဇနာ. ‘‘ဌပေတွာ’’တိ ဣမိနာ အညတြာတိ နိပါတဿ အတ္ထံ ဒဿေတိ. ယေ ပနာတိ ဘိက္ခူ ပန သမဂ္ဂါ ဟောန္တီတိ သမ္ဗန္ဓော. ဥပေါသထေယေဝါတိ ဥပေါသထဒိဝသေယေဝ.

ဣတိ ဥပေါသထက္ခန္ဓကဝဏ္ဏနာယ ယောဇနာ သမတ္တာ.