၆၄. စတ္တာရောနိဿယာဒိကထာ

၁၂၈. ဥပသမ္ပန္နသမနန္တရမေဝါတိ ဥပသမ္ပန္နော ဟုတွာ သမနန္တရမေဝ၊ န ကာလန္တရေတိ အတ္ထော. ဧကပေါရိသာတိ ဧတ္ထ ပေါရိသသဒ္ဒေါ ဥပရိ ဝိတ္ထတေ ဘုဇပမာဏေ စ ပေါသပမာဏေ စ ဝတ္တတိ. ပုရိသဿ ပမာဏာ ပေါရိသာ၊ ပမာဏတ္ထေ ဏပစ္စယော. ဆာယာတိ အာတပါဘာဝေါ. မေတဗ္ဗာတိ ပမေတဗ္ဗာ. ‘‘ဝဿာနော’’တိအာဒိ ‘‘ဥတုပမာဏံ အာစိက္ခိတဗ္ဗ’’န္တိ ဧတ္ထ အာစိက္ခဏာကာရဒဿနံ. ဥတုနော ပမာဏန္တိ အတ္ထံ နိဝါရေန္တော အာဟ ‘‘ဧတ္ထ စာ’’တိအာဒိ. အရတိ ပုနပ္ပုနံ ဂစ္ဆတီတိ ဥတု၊ ပမိယတိ သံဝစ္ဆရော ပရိစ္ဆိဇ္ဇိယတိ အနေနာတိ ပမာဏံ. ယတ္တကေဟိ ဒိဝသေဟိ အပရိပုဏ္ဏောတိ သမ္ဗန္ဓော. ယဿာတိ ဒိဝသဘာဂဿ. ယော ဥတု အပရိပုဏ္ဏော၊ တဿ ဥတုနောတိ ပါဌသေသော ယောဇေတဗ္ဗော. ‘‘ဥတုပမာဏံ အာစိက္ခိတဗ္ဗံ၊ ဒိဝသဘာဂေါ အာစိက္ခိတဗ္ဗော’’တိ ပဒါနံ အပရမ္ပိ အတ္ထဝိကပ္ပံ ဒဿေန္တော အာဟ ‘‘အထ ဝါ’’တိအာဒိ. တတ္ထ အယံ နာမ ဥတူတိ အယံ ဥတု ဝဿာနော နာမာတိ ဝါ ဟေမန္တော နာမာတိ ဝါ ဂိမှော နာမာတိ ဝါ. ပုဗ္ဗနှောတိ အဟဿ ပုဗ္ဗော ပုဗ္ဗနှော. တတ္ထ ပစ္ဆိမနယောဝ ပါသံသတရော. ကသ္မာ? ပုရိမနယေ ဥတုပရိပုဏ္ဏေ ဒိဝသဘာဂါစိက္ခဏဿ အဘာဝါ၊ ပစ္ဆိမနယေ ပန ပရိပုဏ္ဏံ ဝါ အပရိပုဏ္ဏံ ဝါ ဥတုပမာဏံ အာစိက္ခိတဗ္ဗံ. ဥပသမ္ပန္နဒိဝသဘာဂေါဝ ‘‘ပုဗ္ဗနှော’’တိ ဝါ ‘‘သာယနှော’’တိ ဝါ အာစိက္ခိတဗ္ဗော. သံဂီတီတိ ဧတ္ထ သံ ဧကတော ကတွာ ဂါယိတဗ္ဗာ ကထေတဗ္ဗာတိ သံဂီတီတိ ဝစနတ္ထံ ဒဿေန္တော အာဟ ‘‘ဣဒမေဝ သဗ္ဗံ ဧကတော ကတွာ’’တိအာဒိ. တတ္ထ ကိန္တိ ကိံ ဥတုံ. ဣဒံ နာမာတိ ဣဒံ နာမ ဥတုံ. ဝဒေယျာသီတိ အာဂန္တုကာနံ ဝုဍ္ဎနဝကဘာဝါဒိဉာပနတ္ထံ ကထေယျာသိ.

၁၂၉. ဒုတိယန္တိ သဟာယံ ဘိက္ခုံ ဝါ သာမဏေရံ ဝါ ပုရိသံ ဝါ. အကရဏီယာနီတိ ဥပသမ္ပန္နေဟိ အကတ္တဗ္ဗာနိ. ပဏ္ဍုပလာသောတိ ဧတ္ထ ပဏ္ဍူတိ သေတပီတမိဿော ဝဏ္ဏော၊ ပလာသသဒ္ဒေါ ပဏ္ဏဝါစကော၊ န ဟရိတဝါစကော၊ နာပိ ကိံသုကဒုမဝါစကောတိ ဒဿေန္တော အာဟ ‘‘ပဏ္ဍုဝဏ္ဏော ပဏ္ဏော’’တိ. ပဏ္ဍုပလာသောတိ သမာသောပိ ဗျာသောပိ ယုတ္တောယေဝ. သမာသကာလေ ပဏ္ဍု ယဿတ္ထီတိ ပဏ္ဍု၊ သောယေဝ ပလာသော ပဏ္ဍုပလာသောတိ ကာတဗ္ဗော. ပုပ္ဖဖလာဒိံ ဗန္ဓတီတိ ဗန္ဓနန္တိ ဝစနတ္ထေန ဗန္ဓနသဒ္ဒေါ ဝဏ္ဋပရိယာယောတိ အာဟ ‘‘ဝဏ္ဋတော’’တိ. ပုထုသိလာတိ (မ. နိ. အဋ္ဌ. ၃.၆၀) ဧတ္ထ ပုထုသဒ္ဒေါ မဟန္တပရိယာယောတိ အာဟ ‘‘မဟာသိလာ’’တိ.

၁၃၀. တဿာတိ ဥက္ခေပနီယကမ္မာရဟဿ ဘိက္ခုနော. သာမဂ္ဂီတိ သံဃသာမဂ္ဂီ. တေနာတိ ဥက္ခေပနီယကမ္မာရဟေန ဘိက္ခုနာ. သမ္ဘောဂေတိ အာမိသေန စ ဓမ္မေန စ သမ္ဘောဂဟေတု. ဧတ္ထ သဟသေယျာပိ သင်္ဂဟိတာ အာပတ္တိဘာဝတော. အနာပတ္တီတိ အနုက္ခိတ္တကဘာဝတော ပါစိတ္တိယာပတ္တိယာ အနာပတ္တိ၊ အလဇ္ဇိလက္ခဏာဘာဝတော ဒုက္ကဋေန အနာပတ္တီတိ ဒဋ္ဌဗ္ဗံ.

ဣတိ သမန္တပါသာဒိကာယ ဝိနယသံဝဏ္ဏနာယ

ဒွါသတ္တတိအဓိကဝတ္ထုသတပဋိမဏ္ဍိတဿ မဟာခန္ဓကဿ

အတ္ထဝဏ္ဏနာယ ယောဇနာ သမတ္တာ.