၅၈. အလဇ္ဇီနိဿယဝတ္ထုကထာ

၁၂၀. ‘‘အလဇ္ဇီနံ ဩဝါဒ’’န္တိ ပါဌသေသေန ယောဇိတေ သာမျတ္ထေ သာမိဝစနမ္ပိ ယုဇ္ဇတေဝ. တံ နယံ အဒဿေတွာ ‘‘ဥပယောဂတ္ထေ သာမိဝစန’’န္တိ ဝုတ္တံ. ‘‘ဘိက္ခူဟိ သဘာဂတ’’န္တိ ဣမိနာ ဘိက္ခူဟိ သမာနော သီလာဒိဂုဏသင်္ခါတော ဘာဂေါ ဣမဿာတိ ဘိက္ခုသဘာဂေါ၊ တဿ ဘာဝေါ ဘိက္ခုသဘာဂတန္တိ ဝစနတ္ထံ ဒဿေတိ. ‘‘လဇ္ဇိဘာဝ’’န္တိ ဣမိနာ ဘာဝပစ္စယဿ သရူပံ ဒဿေတိ. နဝဋ္ဌာနန္တိ အဘိနဝဋ္ဌာနံ. ဂတေန ဘိက္ခုနာတိ သမ္ဗန္ဓော.

ထေရောတိ နိဿယဒါယကော ထေရော. ဂဟေတုကာမောတိ နိဿယံ ဂဟေတုကာမော. အာစာရန္တိ နိဿယပဋိပန္နဿ အာစာရံ. တဒဟေဝါတိ တသ္မိံ ဂတအဟနိ ဧဝ. အာဘောဂဿ ကတတ္တာ၊ အရုဏုဂ္ဂမနဿ စ အဇာနနတ္တာ ဝုတ္တံ ‘‘အနာပတ္တီ’’တိ. အရုဏုဂ္ဂမနံ အဇာနန္တောပိ အာဘောဂဿ အကတတ္တာ ဝုတ္တံ ‘‘အရုဏုဂ္ဂမနေ ဒုက္ကဋ’’န္တိ. ‘‘ဒွေ တီဏိ ဒိဝသာနီ’’တိ ပဒေန စတု ပဉ္စ ဆ ဒိဝသာနိပိ ဂဟေတဗ္ဗာနိ လက္ခဏဟာရနယေန အနိဿိတေန ဝသိတဗ္ဗဘာဝေန သမာနဖလတ္တာ. တေနာဟ ‘‘သတ္တာဟံ ဝသိဿာမီ’’တိ. လဒ္ဓပရိဟာရောတိ လဒ္ဓေါ ပရိဟာရော အာပတ္တိအပနယနံ ယေနာတိ လဒ္ဓပရိဟာရော.