၅၉. ဂမိကာဒိနိဿယဝတ္ထုကထာ

၁၂၁. ‘‘ကရဏီယနိဿယော’’တိ ဣမိနာ နိဿယဂဟဏံ နိဿယော ဥတ္တရပဒလောပဝသေန၊ သော ကရဏီယော ဣမဿာတိ နိဿယကရဏီယောတိ ဝိသေသနပရနိပါတဘာဝံ ဒဿေတိ. နိဿယံ အလဘမာနေနာတိ ဧတ္ထ ကိံ နိဿယဿ အလဘနံ နာမာတိ အာဟ ‘‘အတ္တနာ’’တိအာဒိ. ဝုတ္ထပုဗ္ဗန္တိ ဝသိတပုဗ္ဗံ. ဧကရတ္တံ ဝသန္တေနာပီတိ ပိသဒ္ဒေါ ဒွိရတ္တာဒိကေ ကာ နာမ ကထာတိ ဒဿေတိ. ဝိဿမန္တော ဝါ သတ္ထံ ပရိယေသန္တော ဝါ ဟုတွာတိ ယောဇနာ. နာဝါယ ဂစ္ဆန္တဿာတိ နာဝါယ အဒ္ဓါနမဂ္ဂံ ပဋိပန္နဿ.

ယာစိယမာနေနာတိ ဧတ္ထ ဗဟုကတ္တုပသင်္ဂတ္တာ ဝုတ္တံ ‘‘တေန ဂိလာနေနာ’’တိ. ‘‘မာနေနာ’’တိ ဣမိနာ ယာစိတုမသက္ကုဏေယျတာဒီနိ နိဝတ္တေတိ.

ဖာသု ဟောတီတိ ဧတ္ထ အာဝါသသပ္ပါယာဒိဝသေန ဖာသု ဟောတီတိ အာသင်္ကာ ဘဝေယျာတိ အာဟ ‘‘သမထဝိပဿနာနံ ပဋိလာဘဝသေနာ’’တိ. ဟီတိ သစ္စံ. ဣမံ ပရိဟာရန္တိ ဣမံ ဖာသုဝိဟာရပရိဟာရံ. ထာမဂတာယ ဝိပဿနာယာတိ ယောဇနာ. သမထော ဝါ တရုဏော ဟောတီတိ ယောဇနာ. ဧတဿေဝါတိ တရုဏသမထဝိပဿနိကဿေဝ ဘိက္ခုနော. တဿ နိဿာယာတိ ဧတ္ထ တဿ ဩဝါဒံ နိဿာယာတိ ယောဇနာ. အထ ဝါ ဥပယောဂတ္ထေ သာမိဝစနံ. တံ နိဿယဒါယကံ နိဿာယာတိ ဟိ အတ္ထော. ယတ္တကော ကာလော အာသဠှီပုဏ္ဏမာ အတ္ထိ၊ တတ္တကံ ကာလန္တိ ယောဇနာ. ‘‘အာသဠှီပုဏ္ဏမာ’’တိ ဧတ္ထ ‘‘ယာဝါ’’တိ နိပါတပယောဂတ္တာ အဘိဝိဓိအဝဈတ္ထေ နိဿက္ကဝစနံ ဒဋ္ဌဗ္ဗံ. ယတ္ထာတိ ယသ္မိံ ဌာနေ.

၁၂၂. ပါဠိယံ ဂေါတ္တေနပီတိ ဧတ္ထ ပိသဒ္ဒေန န ကေဝလံ နာမေနေဝ၊ အထ ခေါ ဂေါတ္တေနပိ သာဝေတုန္တိ ဒဿေတိ. တသ္မာ ‘‘အာယသ္မတော ပိပ္ပလိဿာ’’တိ နာမံ သာဝေတွာတိပိ ‘‘အာယသ္မတော မဟာကဿပဿာ’’တိ ဂေါတ္တံ သာဝေတွာပိ အနုသာဝေတဗ္ဗံ. တေန ဝုတ္တံ ‘‘မဟာကဿပဿာ’’တိအာဒိ. ဣမိနာ ‘‘ကောနာမော တေ ဥပဇ္ဈာယော? ဥပဇ္ဈာယော မေ ဘန္တေ အာယသ္မာ မဟာကဿပေါ နာမာ’’တိအာဒီသု ဂေါတ္တမ္ပိ နာမေနေဝ သင်္ဂဟိတန္တိ သိဒ္ဓံ ဟောတိ.

၁၂၃. ဧကာနုသာဝနေတိ ပဒဿ သမာနာဓိကရဏဗာဟိရတ္ထသမာသဘာဝံ နိဝတ္တေန္တော အာဟ ‘‘ဧကတော အနုသာဝနေ’’တိ. တတ္ထ ဧကတောတိ ဧကက္ခဏေ၊ ဧကပဟာရေန ဝါ. ဝက္ခတိ ဟိ ‘‘ဧကက္ခဏေ’’တိ စ ‘‘ဧကပဟာရေနေဝါ’’တိ စ. ဣမိနာ ဧကတော အနုသာဝနမေတေသန္တိ ဧကာနုသာဝနာတိ အသမာနာဓိကရဏဗာဟိရတ္ထသမာသံ ဒဿေတိ. ဧကေနာတိ ဧကေန အနုသာဝနာစရိယေန. ဧကဿာတိ ဧကဿ ဥပသမ္ပဒါပေက္ခဿ. ‘‘ဧကက္ခဏေ’’တိ ဣမိနာ ‘‘ဧကတော’’တိ ပဒဿ အတ္ထံ ဒဿေတိ. ‘‘ဥပသမ္ပာဒေတု’’န္တိ ဒွိန္နံ ဥပသမ္ပဒါပေက္ခာနံ ဥပသမ္ပာဒေတုံ.

ပုရိမနယေနေဝါတိ ‘‘ဧကေန ဧကဿ၊ အညေန ဣတရဿာ’’တိအာဒိနာ ပုဗ္ဗေ ဝုတ္တနယေနေဝ. ဧကတော အနုသာဝနေ ကာတုန္တိ ‘‘ဧကေန ဧကဿ၊ အညေန အညဿ၊ ဣတရေန ဣတရဿာ’’တိ ဧဝံ တီဟိ အာစရိယေဟိ တိဏ္ဏံ ဥပသမ္ပဒါပေက္ခာနံ ဧကက္ခဏေ အနုသာဝနေ ကာတုံ. တဉ္စ ခေါတိ ဧတ္ထ တသဒ္ဒဿ ‘‘အနုသာဝနေ ကာတု’’န္တိ ပဒဿေဝ အတ္ထဝိသယတံ ဒဿေတုံ ဝုတ္တံ ‘‘အနုသာဝနကိရိယ’’န္တိ. ဒွေ ဝါ တယော ဝါတိ ဧတ္ထ ဝါသဒ္ဒေါ အနိယမဝိကပ္ပတ္ထော. သစေ ဧကေနာစရိယေန ဒွေ အနုသာဝေတိ၊ ‘‘အယံ ဗုဒ္ဓရက္ခိတော စ အယံ ဓမ္မရက္ခိတော စာ’’တိ အနုသာဝေတဗ္ဗာ. သစေ တယော အနုသာဝေတိ၊ ‘‘အယံ ဗုဒ္ဓရက္ခိတော စ အယံ ဓမ္မရက္ခိတော စ အယံ သင်္ဃရက္ခိတော စာ’’တိ အနုသာဝေတဗ္ဗာ. ယထာ ဧကေနာစရိယေန ဒွေ ဝါ တယော ဝါ ဧကတော အနုသာဝေတဗ္ဗာ၊ ဧဝံ ဒွီဟိ ဝါ တီဟိ ဝါ အာစရိယေဟိ ဧကော အနုသာဝေတဗ္ဗောတိပိ ဝဒန္တိ. ဧကေန ဥပဇ္ဈာယေန ကရဏဘူတေန၊ ဧကော ဥပဇ္ဈာယော ဟုတွာတိ ဝါ အတ္ထော. ‘‘ဧကပဟာရေနေဝါ’’တိ ဣမိနာ ‘‘ဧကတော’’တိ ပဒဿ အတ္ထံ ဒဿေတိ. ဒွေ တိဿော ကမ္မဝါစာတိ ဒွီဟိ အာစရိယေဟိ ဒွေ၊ တီဟိ အာစရိယေဟိ တိဿော ကမ္မဝါစာ. ဧကေန ဥပဇ္ဈာယေန အနုသာဝနေ ဧကော ဝါ ဒွေ ဝါ တယော ဝါ အာစရိယာ ဝဋ္ဋန္တိ၊ နာနုပဇ္ဈာယေန အနုသာဝနေ ပန နာနာစရိယာ ဧဝ ဝဋ္ဋန္တီတိ ဒဿေန္တော အာဟ ‘‘သစေ ပနာ’’တိအာဒိ. တိဿတ္ထေရောတိ ကမ္မဝါစာစရိယဘူတော တိဿတ္ထေရော. သုမနတ္ထေရဿာတိ ဥပဇ္ဈာယဘူတဿ သုမနတ္ထေရဿ. ဣဒန္တိ နာနုပဇ္ဈာယေန ဧကဿာစရိယဿာနုသာဝနံ. ဧသ ပဋိက္ခေပေါတိ ‘‘န တွေဝ နာနုပဇ္ဈာယေနာ’’တိ ဧသော ပဋိက္ခေပေါ.