၅၇. ဟတ္ထစ္ဆိန္နာဒိဝတ္ထုကထာ

၁၁၉. ဟတ္ထစ္ဆိန္နာဒိဝတ္ထူသု ဟတ္ထာ ဆိန္နာ ယဿာတိ ဟတ္ထစ္ဆိန္နောတိအာဒိဝစနတ္ထံ ဒဿေန္တော အာဟ ‘‘ယဿာ’’တိအာဒိ. မဏိဗန္ဓေတိ ပကောဋ္ဌန္တေ. သော ဟိ ယသ္မာ ဧတ္ထ မဏိသင်္ခါတံ အလင်္ကာရဝိကတိံ ဗန္ဓတိ၊ တသ္မာ မဏိဗန္ဓောတိ ဝုစ္စတိ. ကပ္ပရေတိ ကပေါဏိယံ. သာ ဟိ ပရေသံ ပိဋ္ဌီသု ကပတိ ဟိံသတိ အနေနာတိ ‘‘ကပ္ပရော’’တိ ဝုစ္စတိ. ယဿ ဟတ္ထာ ဆိန္နာ ဟောန္တိ၊ အယံ ဟတ္ထစ္ဆိန္နော နာမာတိ ယောဇနာ. ဧသေဝ နယော သေသေသုပိ. ဧကော ဝါ ပါဒေါတိ ယောဇနာ. ဟေဋ္ဌာ ‘‘ဧကော ဝါ ဒွေ ဝါ ဟတ္ထာ’’တိ ဧတ္ထာပိ ဧသေဝ နယော. စတူသု ဟတ္ထပါဒေသု ဒွေ ဝါတိ ဧကော ဟတ္ထော၊ ဧကော ပါဒေါတိ ဒွေ ဝါ. ကဏ္ဏာတိ သဒ္ဒဂ္ဂဟာ. တေ ဟိ ကဏ္ဏတိ သဝတိ ဧတေဟီတိ ကဏ္ဏာတိ ဝုစ္စန္တိ. ကဏ္ဏာဗဒ္ဓေတိ ကဏ္ဏစ္ဆိဒ္ဒဿ အာဗဒ္ဓေ. သင်္ဃာဋေတုန္တိ သင်္ဃဋနံ ကာတုံ၊ အာဗန္ဓနံ ကာတုန္တိ အတ္ထော. အဇပဒကေတိ အဇပဒသဏ္ဌာနေ ဌာနေ. နာသာတိ ဃာနာနိ. တာနိ ဟိ နာသတိ အဗျတ္တသဒ္ဒံ ကရောတိ ဧတာဟီတိ နာသာတိ ဝုစ္စန္တိ. နာသိကာတိ နာသာယေဝ. သဏ္ဌာပေတုန္တိ သုဋ္ဌု ဌပေတုံ၊ ပကတိယာ ဌပေတုန္တိ အတ္ထော. နခသေသန္တိ နခေါယေဝ သေသော ဆိန္နင်္ဂုလိတောတိ နခသေသော၊ တံ. အဂ္ဂေ ပုရေ ဥဋ္ဌဟတီတိ အင်္ဂုဋ္ဌော. ‘‘ဝုတ္တနယေနေဝါ’’တိ ဣမိနာ ‘‘နခသေသံ အဒဿေတွာ’’တိ ဝစနံ အတိဒိသတိ. ကဏ္ဍရနာမကာတိ မဟာသိရနာမကာ. တေ ဟိ ကံ သရီရံ ဓာရေန္တီတိ ကဏ္ဍရာတိ ဝုစ္စန္တိ ဓကာရဿ ဍကာရံ ကတွာ. ယေသူတိ ကဏ္ဍရေသု၊ နိဒ္ဓါရဏေ ဘုမ္မံ.

ယဿ ဝဂ္ဂုလိပက္ခကာ ဝိယ အင်္ဂုလိယော သမ္ဗန္ဓော ဟောန္တိ၊ အယံ ဖဏဟတ္ထကော နာမာတိ ယောဇနာ. ဧတန္တိ ဖဏဟတ္ထကံ. ဆဠင်္ဂုလာဒယောပိ ဖဏဟတ္ထကေယေဝ သင်္ဂဟေတဗ္ဗာတိ အာဟ ‘‘ယဿပိ ဆ အင်္ဂုလိယော’’တိအာဒိ. ယဿပိ ဆ အင်္ဂုလိယော ဟောန္တိ၊ အယမ္ပိ ဖဏဟတ္ထကော နာမ ဥပစာရေန.

ခုဇ္ဇောတိ ဧတ္ထ ခုဇ္ဇော သရီရော ယဿတ္ထီတိ ခုဇ္ဇောတိ ဝစနတ္ထံ ဒဿေန္တော အာဟ ‘‘ခုဇ္ဇသရီရော’’တိ. ကသ္မာ ခုဇ္ဇောတိ အာဟ ‘‘ဥရဿ ဝါ’’တိအာဒိ. ယဿ ပန ဝင်္ကံ၊ အယမ္ပိ ခုဇ္ဇော နာမာတိ ယောဇနာ. ဝင်္ကန္တိ စ ကုဋိလံ. ဟီတိ သစ္စံ၊ ယသ္မာ ဝါ. ဗြဟ္မုဇုဂတ္တောတိ ဥဇုံ ဂတ္တံ ဥဇုဂတ္တံ၊ ဗြဟ္မုနော ဥဇုဂတ္တံ ဝိယ ဥဇုဂတ္တံ ဣမဿ မဟာပုရိသဿာတိ ဗြဟ္မုဇုဂတ္တော၊ မဟာပုရိသော.

သံခေပေန ဝုတ္တမတ္ထံ ဝိတ္ထာရေန ဒဿေန္တော အာဟ ‘‘ဇင်္ဃဝါမနဿ ဟီ’’တိအာဒိ. ယေသန္တိ ဥဘိန္နံ ကာယာနံ. ဘူတာနန္တိ အမနုဿာနံ ပိသာစကပေတာနံ. အတ္တဘာဝေါ ဟောတိ ဝိယာတိ ယောဇနာ. ပရိဝဋုမောတိ ပရိသမန္တတော ဝဋ္ဋုလသရီရော.

ဂလဂဏ္ဍီတိ ဧတ္ထ ဂလေ ဂဏ္ဍော ယဿတ္ထီတိ ဂလဂဏ္ဍီတိ ဝစနတ္ထံ ဒဿေန္တော အာဟ ‘‘ယဿာ’’တိအာဒိ. ဧတန္တိ ‘‘ဂလဂဏ္ဍီ’’တိ ဧတံ ဝစနံ. တတ္ထာတိ ဂလဂဏ္ဍိပဗ္ဗာဇနေ. ယန္တိ ဝစနံ.

သိပဒီတိ ဧတ္ထ သိထိလံ ပဒံ ဣမဿာတိ သိပဒီတိ ဝုတ္တေ ဘာရပါဒေါယေဝ ဂဟေတဗ္ဗောတိ အာဟ ‘‘ဘာရပါဒေါ ဝုစ္စတီ’’တိ. ဘာရံ ပါဒံ ယဿာတိ ဘာရပါဒေါ. ဧတေ ဒွေ ထူလပါဒရောဂီသု ဝတ္တန္တီတိ ဒဋ္ဌဗ္ဗံ. သဉ္ဇာတပိဠကောတိ သဉ္ဇာတဖောဋော. ဥပနာဟန္တိ ဘုသံ ဗန္ဓနံ. ဥဒကအာဝါဋေတိ ဥဒကေန ပုဏ္ဏာယံ ကာသုယံ. ဥဒကဝါလိကာယာတိ ဥဒကတိန္တေန မရုနာ. ယထာ သိရာ ပညာယန္တိ၊ ဧဝံ မိလာပေတုန္တိ ယောဇနာ. ဤဒိသန္တိ သိရာပညာယနဇင်္ဃတေလနာဠိကသဘာဝံ. တထာတိ ယထာ ပဗ္ဗဇ္ဇာကာလေ ကရောတိ၊ တထာ ကတွာတိ အတ္ထော.

ပါပရောဂီတိ ဧတ္ထ ပါပရောဂဿ သရူပံ ဒဿေန္တော အာဟ ‘‘အရိသ’’ဣတိအာဒိ. တတ္ထ အရိသော စ ဘဂန္ဒရော စ ပိတ္တဉ္စ သေမှော စ ကာသော စ သောသော စာတိ ဒွန္ဒော၊ တေ အာဒယော ယေသံ တေတိ အရိသ။ပေ။ သောသာဒယော. အာဒိသဒ္ဒေန ဟေဋ္ဌာ ဝုတ္တေ အာဗာဓေ သင်္ဂဏှာတိ. တတ္ထ ပိတ္တသေမှသဒ္ဒေဟိ တံသမုဋ္ဌာနော ရောဂေါ ဂဟေတဗ္ဗော. ‘‘နိစ္စာတုရော’’တိ ဣမိနာ ပါပရောဂီတိ ဧတ္ထ မန္တုတ္ထေ ပဝတ္တဿ ဤပစ္စယဿ နိစ္စယောဂတ္ထံ ဒဿေတိ.

ပရိသဒူသနောတိ ဧတ္ထ ဣတိသဒ္ဒေါ နာမပရိယာယော၊ ပရိသဒူသနော နာမာတိ ဟိ အတ္ထော. ယော အတ္တနော ဝိရူပတာယ ပရိသံ ဒူသေတိ၊ အယံ ပရိသဒူသနော နာမာတိ ယောဇနာ. ဆသရီရဒေါသံ အာဒိံ ကတွာ ပရိသဒူသနဘာဝံ ဝိတ္ထာရေန္တော အာဟ ‘‘အတိဒီဃော ဝါ’’တိအာဒိ. အတိဒီဃော ဝါတိ ဧတ္ထ န ကေဝလံ ပရေသံ ဒွင်္ဂုလာဒိမတ္တဒီဃော၊ အထ ခေါ ဒိဂုဏာဒိဒီဃောဝါဓိပ္ပေတောတိ အာဟ ‘‘အညေသ’’န္တိအာဒိ. နာဘိပဒေသောတိ အတ္တနော နာဘိပဒေသော. ယထာ ဟိ အတိဒီဃေ ပရဝစနေန အတိဒီဃဿ သရူပံ ဝေဒိတဗ္ဗံ၊ တထာ အတိရဿာဒီသုပိ အတိရဿသရူပန္တိ ဒဋ္ဌဗ္ဗံ. မဟောဒရောတိ မဟာဥဒရော. ကပ္ပသီသော ဝါတိ ဟတ္ထိသီသော ဝိယ ယုဂသီသော ဝါ. ကပ္ပသဒ္ဒေါ ဟေတ္ထ ယုဂတ္ထဝါစကော. ကဏ္ဏိကကေသော ဝါတိ ကဏ္ဏိကသဒိသေဟိ ကေသေဟိ သမန္နာဂတော. ‘‘ဇာတိပလိတေဟီ’’တိ ဣမိနာ ဇရာဝါတေန ပဟတံ ပလိတံ နိဝတ္တေတိ. ပကတိတမ္ဗကေသောတိ ဧတ္ထ ပကတိသဒ္ဒေန ကေနစိ ပယောဂေန တမ္ဗကေသံ နိဝတ္တေတိ. အာဝဋ္ဋသီသောတိ ပုနပ္ပုနံ ဝဋ္ဋတီတိ အာဝဋ္ဋော၊ ကေသာဝဋ္ဋော၊ သော ဧတဿ သီသေ အတ္ထီတိ အာဝဋ္ဋသီသော. ဥဒ္ဓဂ္ဂေဟီတိ ဥဒ္ဓံ ကောဋီဟိ. ဇာလဗဒ္ဓေန ဝိယာတိ ဇာလေန ဗဒ္ဓေန ဣဝ.

သမ္ဗဒ္ဓဘမုကော ဝါတိ အညမညသမ္ဗဒ္ဓဘမုကော ဝါ. မက္ကဋဘမုကောတိ မက္ကဋဿ ဘမု ဝိယ ဘမု ဧတဿာတိ မက္ကဋဘမုကော. ဝါသိကောဏေနာတိ တစ္ဆနီကောဋိယာ. ဝိသမစက္ကလောတိ ဧတ္ထ စက္ကာကာရေန လာတိ ပဝတ္တတိ၊ စက္ကာကာရံ ဝါ လာတိ ဂဏှာတီတိ စက္ကလော. ကေကရောတိ ဝလိရော. သော ဟိ ကုစ္ဆိတံ ကရောတီတိ ကေကရောတိ ဝုစ္စတိ. ကက္ကဋဿေဝါတိ ကက္ကဋဿ ဣဝ. မူသိကကဏ္ဏောတိ အာခုကဏ္ဏော. ဇဋုကကဏ္ဏောတိ ဝဂ္ဂုလိကဏ္ဏော. အဝိဒ္ဓကဏ္ဏောတိ အစ္ဆိဒ္ဒကဏ္ဏော. ဟီတိ သစ္စံ၊ ယသ္မာ ဝါ. သောတိ အဝိဒ္ဓကဏ္ဏော. ကဏ္ဏေ ဘဂန္ဒရော ဧတဿာတိ ကဏ္ဏဘဂန္ဒရော၊ သောယေဝ ကဏ္ဏဘဂန္ဒရိကော. ဂဏ္ဍော ကဏ္ဏေ ဧတဿာတိ ဂဏ္ဍကဏ္ဏော. ပဂ္ဃရိတပုဗ္ဗေနာတိ ပဂ္ဃရိတပူယေန. ဋင်္ကိတော ကဏ္ဏော ယဿာတိ ဋင်္ကိတကဏ္ဏော. ဂေါဘတ္တနာဠိကာယာတိ ဂုန္နံ ဘတ္တပါနတ္ထံ ကတာယ နာဠိကာယ. ဗိဠာရက္ခိ ဝိယ အတိပိင်္ဂလံ အက္ခိ ဧတဿာတိ အတိပိင်္ဂလက္ခိ. မဓုဝဏ္ဏော ဝိယ ပိင်္ဂလံ အက္ခိ ဧတဿာတိ မဓုပိင်္ဂလက္ခိ. နိပ္ပခုမက္ခီတိ ဧတ္ထ ပခုမံ ဝုစ္စတိ အက္ခမှိ ဇာတံ လောမံ. တဉှိ အက္ခိနော ပက္ခဒွယေ ဇာတတ္တာ ပခုမန္တိ ဝုစ္စတိ. နတ္ထိ ပခုမံ အက္ခိမှိ ဧတဿာတိ နိပ္ပခုမက္ခိ. အဿုပဂ္ဃရဏံ အက္ခိမှာ ဧတဿာတိ အဿုပဂ္ဃရဏက္ခိ. ပုပ္ဖံ သဉ္ဇာတံ ယဿ အက္ခိနောတိ ပုပ္ဖိတံ. ပုပ္ဖိတံ အက္ခိ ယဿာတိ ပုပ္ဖိတက္ခိ. အက္ခိပါကေနာတိ အက္ခိနော ဒလပရိယန္တေသု ပစ္စနကေန ရောဂေန.

စိပိဋနာသိကောတိ အနုန္နတနာသိကော. သုကတုဏ္ဍသဒိသာယာတိ သုဝါနံ မုခေန သဒိသာယ.

ပဋင်္ဂမဏ္ဍူကဿေဝါတိ ပဋင်္ဂနာမကဿ မဏ္ဍူကဿ မုခနိမိတ္တံ ဣဝ မုခနိမိတ္တံယေဝါတိ ယောဇနာ. ဥက္ခလိမုခဝဋ္ဋိသဒိသေဟီတိ ဥက္ခလိယာ မုခဝဋ္ဋိနာ သဒိသေဟိ. ဘေရိစမ္မသဒိသေဟီတိ ဘေရိယာ မုခေ နဟိတစမ္မေန သဒိသေဟိ. ဧဠမုခေါတိ ဧဠာယ နိစ္စပဂ္ဃရိတံ မုခမေတဿေတိ ဧဠမုခေါ. ဥပ္ပက္ကမုခေါတိ ဥပ္ပက္ကံ ကုထိကံ မုခမေတဿာတိ ဥပ္ပက္ကမုခေါ. သင်္ခတုဏ္ဍကောတိ သင်္ခဿ တုဏ္ဍေန သဒိသော ဩဋ္ဌော ဧတဿာတိ သင်္ခတုဏ္ဍကော.

အဋ္ဌကဒန္တသဒိသေဟီတိ အဋ္ဌကနာမကဿ နင်္ဂလဿ ဒန္တေဟိ သဒိသေဟိ. ဒန္တေ ပိဒဟိတုန္တိ သမ္ဗန္ဓော. ဒန္တန္တရေတိ ဒန္တဝိဝရေ၊ ဒန္တမဇ္ဈေ ဝါ. ကလန္ဒကဒန္တော ဝိယာတိ ကာဠကာနံ ဒန္တော ဝိယ.

မဟာဟနုကောတိ မဟန္တော ဟနု ဧတဿာတိ မဟာဟနုကော. စိပိဋဟနုကောတိ အနုန္နတဟနုကော. နိမ္မဿုဒါဌိကောတိ နတ္ထိ မဿု စ ဒါဌိ စ ဧတဿာတိ နိမ္မဿုဒါဌိကော. ဘဋ္ဌအံသကူဋောတိ ဘဋ္ဌော ပတိတော အံသကူဋော ဣမဿာတိ ဘဋ္ဌအံသကူဋော. ဂေါဓာဂတ္တောတိ ဂေါဓာယ ဂတ္တံ ဝိယ ဂတ္တံ ဣမဿာတိ ဂေါဓာဂတ္တော. သဗ္ဗံပေတန္တိ သဗ္ဗမ္ပိ ဧတံ ‘‘ကစ္ဆုဂတ္တော’’တိအာဒိဝစနံ. ဧတ္ထာတိ ‘‘ကစ္ဆုဂတ္တော’’တိအာဒိဝစနေ. ဝိနိစ္ဆယော ဝေဒိတဗ္ဗောတိ ယောဇနာ.

ဘဋ္ဌကဋိကောတိ ဘဋ္ဌာ ပန္နာ ကဋိ ဧတဿာတိ ဘဋ္ဌကဋိကော. အစ္စုဂ္ဂတေဟိ အာနိသဒမံသေဟီတိ သမ္ဗန္ဓော. ဝါတဏ္ဍိကောတိ ဝါတေန ပူရိတော အဏ္ဍကောသော ဧတဿာတိ ဝါတဏ္ဍိကော. သင်္ဃဋ္ဋနဇာဏုကောတိ အန္တော နတတ္တာ အညမညံ သင်္ဃဋ္ဋနံ ဇာဏု ဧတဿာတိ သင်္ဃဋ္ဋနဇာဏုကော. ဝိကဋောတိ တိရိယဂမနပါဒေါ. ဥပဍ္ဎပိဏ္ဍိကဿ အတ္ထံ သဟ ဘေဒေန ဒဿေန္တော အာဟ ‘‘သော ဒုဝိဓော’’တိအာဒိ. တတ္ထ ဒုဝိဓော သော ဥပဍ္ဎပိဏ္ဍိကော သမန္နာဂတောတိ ယောဇနာ. အထ ဝါ သော ဥပဍ္ဎပိဏ္ဍိကော ဟေဋ္ဌာ ဩရူဠှာဟိ မဟန္တီဟိ ဇင်္ဃပိဏ္ဍိကာဟိ သမန္နာဂတော ဝါ ဥပရိ အာရူဠှာဟိ မဟန္တီဟိ ဇင်္ဃပိဏ္ဍိကာဟိ သမန္နာဂတော ဝါတိ ဒုဝိဓောတိ ယောဇနာ. ပိဋ္ဌိကပါဒေါတိ ပိဋ္ဌိယံ ဥဋ္ဌိတော ပါဒေါ ဧတဿာတိ ပိဋ္ဌိကပါဒေါ. ဂဏ္ဍိကင်္ဂုလိ ဝါတိ ဂဏ္ဍေန ဥဋ္ဌိတော အင်္ဂုလိ ဧတဿာတိ ဂဏ္ဍိကင်္ဂုလိ. သဗ္ဗောပေသာတိ ဧသ သဗ္ဗောပိ ဇနော. ပရိသံ ဒူသေတီတိ ပရိသဒူသနော.

ပုဗ္ဗာဒီဟီတိအာဒိသဒ္ဒေန စက္ခုပသာဒဿ အန္တရာယကရာနိ အညာနိပိ ဝတ္ထူနိ ဂဟေတဗ္ဗာနိ. ဒွီဟိ ဝါ အက္ခီဟိ၊ ဧကေန ဝါ အက္ခိနာတိ ယောဇနာ. ဥဘယမ္ပီတိ ဒွိန္နံ အဋ္ဌကထာစရိယာနံ ဥဘယမ္ပိ ဝစနံ. ပါဠိယံ ‘‘အန္ဓံ ပဗ္ဗာဇေန္တီ’’တိ အဝတွာ ‘‘ကာဏံ ပဗ္ဗာဇေန္တီ’’တိ ဝုတ္တတ္တာ ‘‘ပရိယာယေနာ’’တိ ဝုတ္တံ. မဟာအဋ္ဌကထာယဉှိ ‘‘ဇစ္စန္ဓော’’တိ ဣမိနာ ဒွေအက္ခိကာဏံ သန္ဓာယ ဝုတ္တံ. ကုဏီတိ ကုဏနံ သံကောစနံ ကုဏံ၊ တမေတဿတ္ထီတိ ကုဏီ. ခဉ္ဇောတိ ခဉ္ဇတိ ဂတိဝေကလ္လဘာဝေန ပဝတ္တတီတိ ခဉ္ဇော. ကုဏ္ဍပါဒကောတိ ဧတ္ထ ကုဏ္ဍောတိ ခဉ္ဇဿေဝ နာမံ. ခဉ္ဇော ဟိ ကုဍတိ ဂမနံ ပဋိဟနတီတိ ကုဏ္ဍောတိ ဝုစ္စတိ. ကသ္မာ ကုဏ္ဍပါဒကော? ကသ္မာ ပိဋ္ဌိပါဒမဇ္ဈေန စင်္ကမန္တောတိ အာဟ ‘‘မဇ္ဈေ သံကုဋိတပါဒတ္တာ’’တိ. ဣမိနာ ဟိ ကုဏ္ဍပါဒဿ စ ပိဋ္ဌိပါဒမဇ္ဈေန စင်္ကမနဿ စ ဟေတုံ ဒဿေတိ. ဧသေဝ နယော အနန္တရဝါကျေပိ. သဗ္ဗောပေသာတိ ဧသ သဗ္ဗောပိ ဇနော.

ပက္ခဟတောတိ ဧတ္ထ ဧကော ပက္ခော ဟတော ဝိနာသော ဧတဿာတိ ပက္ခဟတောတိ အတ္ထံ ဒဿေန္တော အာဟ ‘‘ဧကော ဟတ္ထော ဝါ’’တိအာဒိ. ‘‘ပက္ခပါတော’’တိပိ ပါဌော၊ သော အပါဌောယေဝ. ပက္ခသဒ္ဒေါ ဟိ ကောဋ္ဌာသဝါစကော၊ န ပင်္ဂုလပရိယာယော၊ ပီဌသဗ္ဗီ ဝုစ္စတီတိ ပီဌေန သဗ္ဗတိ ဂစ္ဆတိ သီလေနာတိ ပီဌသဗ္ဗီ ဝုစ္စတိ. ‘‘ဇိဏ္ဏဘာဝေန ဒုဗ္ဗလော’’တိ ဣမိနာ ဇီရဏံ ဇရာ၊ တာယ ဒုဗ္ဗလော ဇရာဒုဗ္ဗလောတိ ဝစနတ္ထံ ဒဿေတိ. ဗလဝါ ဟောတီတိ အာဂန္တုကရောဂါနမဘာဝေန ဗလဝါ ဟောတိ၊ ‘‘ဝစီဘေဒေါ နပ္ပဝတ္တတီ’’တိ ဣမိနာ မုခမတ္တမေဝ ဂစ္ဆတိ ပဝတ္တတိ၊ န ဝစီဘေဒေါ ဧတ္ထ ဇနေတိ မူဂေါတိ ဒဿေတိ. ယဿ ဝစီဘေဒေါ န ပဝတ္တတိ၊ အယံ မူဂေါ နာမာတိ ယောဇနာ. မမ္မနန္တိ ခလိတဝစနံ. ယော ဧကမေဝ အက္ခရံ စတုပဉ္စက္ခတ္တုံ ဝဒတိ၊ တဿေတမဓိဝစနံ.

ဗဓီရောတိ သုတိဟီနော. သော ဟိ ဟနနံ သောတပသာဒဿ နာသနံ ဝဓော၊ တံ ဤရတိ ဂစ္ဆတီတိ ဗဓီရောတိ ဝုစ္စတိ. ယော သဗ္ဗေန သဗ္ဗံ န သုဏာတိ၊ အယံ ဗဓီရော နာမာတိ ယောဇနာ. ဣမိနာ နဋ္ဌပသာဒတံ ဒဿေတိ. ဥဘယဒေါသဝသေနာတိ ဥပလက္ခဏဝသေန ဝုတ္တံ အန္ဓမူဂဗဓိရပဗ္ဗာဇနေ တိဒေါသဝသေနပိ ဝုတ္တတ္တာ. တေတိ ဟတ္ထစ္ဆိန္နာဒယော ဒွတ္တိံသဇနေ. ဩသာရဏံ အပတ္တော ပုဂ္ဂလော အတ္ထိ၊ တံ ပုဂ္ဂလံ သံဃော ဩသာရေတိ စေတိ ယောဇနာ. ဩသာရေတီတိ သံဃေ ပဝေသေတိ.