၅၆. အပတ္တကာဒိဝတ္ထုကထာ

၁၁၈. ယော ပိဏ္ဍော ဟတ္ထေသု လဗ္ဘတီတိ ယောဇနာ. တဒတ္ထာယာတိ တဿ ပိဏ္ဍဿ အတ္ထာယ. သေယျထာပိ တိတ္ထိယာတိ ဧတ္ထ သေယျထာပိသဒ္ဒေါ ဥပမတ္ထော၊ တိတ္ထိယသဒ္ဒေါ အာဇီဝကနာမကေ တိတ္ထိယေ ဟောတီတိ ဒဿေန္တော အာဟ ‘‘ယထာပိ အာဇီဝကနာမကာ တိတ္ထိယာ’’တိ. တသ္မာ အာဇီဝကသင်္ခါတေ တိတ္ထိယေ ဥပမံ ကတွာ ဥဇ္ဈာယန္တီတိ အာဟ ‘‘သူပဗျဉ္ဇနေဟီ’’တိအာဒိ. ဟီတိ သစ္စံ၊ ယသ္မာ ဝါ. တေတိ အာဇီဝကာ. ကမ္မံ ပန န ကုပ္ပတီတိ ပတ္တစီဝရေသု အသန္တေသုပိ ကမ္မဝါစာယ ‘‘ပရိပုဏ္ဏဿ ပတ္တစီဝရ’’န္တိ ပရိကိတ္တိတတ္တာ ကမ္မံ န ကုပ္ပတီတိ အဓိပ္ပါယော.

ယာစိတကေနာတိ ဧတ္ထ ယာစိတော ဟုတွာ ဂဟိတော ယာစိတကောတိ ဒဿေန္တော အာဟ ‘‘ယာစိတွာ ဂဟိတေနာ’’တိ. ‘‘ဤဒိသေန ဟီ’’တိအာဒိနာ ဒေါသံ ဒဿေတိ. တသ္မာတိ ယသ္မာ အာပတ္တိ ဟောတိ၊ တသ္မာ. တဿာတိ ဥပသမ္ပဒါပေက္ခဿ. နိရပေက္ခေဟိ အာစရိယုပဇ္ဈာယာဒီဟီတိ ယောဇနာ. နိဿဇ္ဇိတွာတိ ဗြဟ္မဒေယျေန နိဿဇ္ဇိတွာ. အနဓိဋ္ဌာနုပဂါနံ ပတ္တစီဝရာနံ အပတ္တစီဝရတ္တာ ဝုတ္တံ ‘‘အဓိဋ္ဌာနုပဂံ ပတ္တစီဝရ’’န္တိ. ပဏ္ဍုပလာသန္တိ သမဏုဒ္ဒေသဘာဝါပေက္ခံ. သော ဟိ ရူဠှိဝသေန ပဏ္ဍုပလာသောတိ ဝုစ္စတိ. အထ ဝါ ယထာ ပဏ္ဍုပလာသော န ဟရိတော၊ နာပိ သုက္ခော ဟောတိ၊ ဧဝံ သောပိ ပဗ္ဗဇာပေက္ခော န ဂိဟီ ဟောတိ၊ နာပိ သာမဏေရော၊ တသ္မာ သမဏုဒ္ဒေသဘာဝါပေက္ခော ‘‘ပဏ္ဍုပလာသော’’တိ ဝုစ္စတိ.

ဝသန္တဿ ပဏ္ဍုပလာသဿာတိ သမ္ဗန္ဓော. အနာမဋ္ဌပိဏ္ဍပါတန္တိ ဘိက္ခူဟိ အနာမသိတဗ္ဗဂ္ဂံ ပိဏ္ဍပါတံ. သာမဏေရဘာဂသမကောတိ သာမဏေရေဟိ လဒ္ဓေန ဘာဂေန သမံ ပဝတ္တော. အဿာတိ ပဏ္ဍုပလာသဿ. သာမဏေရဿ သဗ္ဗံ ပဋိဇဂ္ဂနကမ္မံ ကာတုံ ဝဋ္ဋတိ ဝိယ၊ အဿ ကာတုံ ဝဋ္ဋတီတိ ယောဇနာ.