၅၅. အနုပဇ္ဈာယကာဒိဝတ္ထုကထာ

၁၁၇. တေန ခေါ ပန သမယေနာတိ ဧတ္ထ တသဒ္ဒဿ အနိယမနိဒ္ဒေသဘာဝံ ဒဿေန္တော အာဟ ‘‘ယေန သမယေနာ’’တိ. သိက္ခာပဒံ အပညတ္တံ ဟောတီတိ ‘‘န ဘိက္ခဝေ အနုပဇ္ဈာယကော ဥပသမ္ပာဒေတဗ္ဗော’’တိ သိက္ခာပဒံ အပညတ္တံ ဟောတိ. ‘‘ဥပဇ္ဈာယဝိရဟိတ’’န္တိ ဣမိနာ အနုပဇ္ဈာယကန္တိ ဧတ္ထ အကာရဿ ဝိရဟတ္ထံ ဒဿေတိ. ဥပဇ္ဈာယဝိရဟိတံ ဥပသမ္ပဒါပေက္ခန္တိ သမ္ဗန္ဓော. ‘‘ဧဝ’’န္တိအာဒိနာ ဒေါသံ ဒဿေတိ. ဥပဇ္ဈံ အဂါဟာပေတွာတိ ‘‘ဥပဇ္ဈာယော မေ ဘန္တေ ဟောဟီ’’တိ (မဟာဝ. ၆၅၊ မဟာဝ. အဋ္ဌ. ၆၄) ဥပဇ္ဈံ အဂါဟာပေတွာ. ဥပသမ္ပာဒေန္တဿ ကာရကသံဃဿာတိ ယောဇနာ. ကမ္မံ ပနာတိ ဥပသမ္ပဒကမ္မံ ပန. ‘‘ဧသေဝ နယော’’တိ ဣမိနာ ဥပသမ္ပာဒေန္တဿ အာပတ္တိ၊ ကမ္မံ ပန န ကုပ္ပတီတိ ဝစနံ အတိဒိသတိ.