၅၄. ဥဘတောဗျဉ္ဇနကဝတ္ထုကထာ

၁၁၆. ဥဘတောဗျဉ္ဇနကောတိ ဧတ္ထ ဗာဟိရတ္ထသမာသံ ဒဿေန္တော အာဟ ‘‘ဣတ္ထိနိမိတ္တုပ္ပါဒနကမ္မတော စာ’’တိအာဒိ. တတ္ထ ‘‘ဣတ္ထိ။ပေ။ ကမ္မတော စာ’’တိ ဣမိနာ ဥဘယသရူပံ ဒဿေတိ. ဥဘတော ကမ္မတော ပဝတ္တန္တိ ပါဌသေသော ယောဇေတဗ္ဗော. ဗျဉ္ဇနန္တိ နိမိတ္တံ. အဿာတိ ဇနဿ. ကရောတိပိ ကာရေတိပီတိ ဧတ္ထ ကရဓာတုယာ သုဒ္ဓကမ္မကာရိတကမ္မာနိ ဒဿေန္တော အာဟ ‘‘ပုရိသနိမိတ္တေနာ’’တိအာဒိ. တတ္ထ ‘‘ဝီတိက္ကမ’’န္တိ ဣမိနာ သုဒ္ဓကမ္မံ ဒဿေတိ၊ ‘‘ပရ’’န္တိ ဣမိနာ ကာရိတကမ္မံ ဒဿေတိ. သမာဒပေတွာတိ ဥယျောဇေတွာ. တဿ ဒုဝိဓဘာဝံ ဒဿေန္တော အာဟ ‘‘ဒုဝိဓော’’တိအာဒိ. တတ္ထ ဣတ္ထိဘာဝေန လက္ခိတော ဥဘတောဗျဉ္ဇနကော ဣတ္ထိဥဘတောဗျဉ္ဇနကော. ဧသ နယော ဣတရတ္ထာပိ.

တတ္ထာတိ ဒုဝိဓေသု ဥဘတောဗျဉ္ဇနကေသု. ဣတ္ထိနိမိတ္တန္တိ ဣတ္ထိယာ အင်္ဂဇာတံ. ဧသေဝ နယော ‘‘ပုရိသနိမိတ္တ’’န္တိ ဧတ္ထာပိ. ပါကဋံ ပဋိစ္ဆန္နန္တိ သဘာဝတော ပါကဋံ ပဋိစ္ဆန္နံ. ပုန ပဋိစ္ဆန္နံ ပါကဋန္တိ ရာဂဝသေန ပဋိစ္ဆန္နံ ပါကဋံ. ပရံ ဂဏှာပေတီတိ ပရမေဝ ဂဏှာပေတီတိ အတ္ထော. ဣဒန္တိ ကာရဏံ. ဧတေသန္တိ ဒွိန္နံ ဥဘတောဗျဉ္ဇနကာနံ. ကုရုန္ဒိယံ ပန ဝုတ္တံ၊ ကိံ ဝုတ္တန္တိ ယောဇနာ. တတ္ထာတိ ဥဘတောဗျဉ္ဇနကေ. ဝိစာရဏက္ကမောတိ ဝီမံသနာနုက္ကမော. ‘‘တတ္ထ ဝိစာရက္ကမော’’တိပိ ပါဌော. ဝိစာရဏက္ကမော ဓမ္မသင်္ဂဟဋ္ဌကထာယ ဝေဒိတဗ္ဗော၊ ဣဓ ပန ကိံ ဝေဒိတဗ္ဗန္တိ အာဟ ‘‘ဣဒမိဓ ဝေဒိတဗ္ဗ’’န္တိ. တတ္ထ ဣဒန္တိ နပဗ္ဗဇ္ဇူပသမ္ပဒကာရဏံ. ဣဓာတိ ဣမိဿံ ဝိနယဋ္ဌကထာယံ.