၅၀. မာတုဃာတကာဒိဝတ္ထုကထာ

၁၁၂. နိက္ခန္တိန္တိ ဧတ္ထ ‘‘ဣမဿ ပါပကမ္မဿာ’’တိ ဆဋ္ဌီယောဂတ္တာ ဘာဝတ္ထေ တိပစ္စယောတိ အာဟ ‘‘နိက္ခမန’’န္တိ. အပဝါဟနန္တိ အပါယပဋိသန္ဓိဝဟနတော အပဂမနံ. ယေနာတိ မနုဿဘူတေန ယေန ဇီဝိတာ ဝေါရောပိတာတိ သမ္ဗန္ဓော. မနုဿိတ္ထိဘူတာတိ မနုဿိတ္ထီ ဟုတွာ ဘူတာ၊ မနုဿိတ္ထီဘာဝံ ဝါ ဘူတာ ပတ္တာ. ဣမိနာ တိရစ္ဆာနဂတိတ္ထိအာဒယော နိဝတ္တေတိ. ‘‘ဇနိကာ’’တိ ဣမိနာ ပေါသာဝနိကမာတာဒယော နိဝတ္တေတိ. သယမ္ပီတိ ဧတ္ထ ပိသဒ္ဒေါ န ကေဝလံ မာတာယေဝ၊ အထ ခေါ ပုတ္တေနာပီတိ ဒဿေတိ. သတာတိ သန္တေန. မနုဿဇာတိကေနေဝ သတာ မနုဿဇာတိကော ဧဝ ဟုတွာ ဝေါရောပိတာတိ ယောဇနာ. အနန္တရေ ဘဝေ ဖလံ နိဗ္ဗတ္တေတီတိ အာနန္တရိယံ၊ မာတုဃာတကကမ္မံ၊ တေန ဇာတိသာမညမ္ပိ အဇနိကံ ဃာတေန္တော စ ဇနိကမ္ပိ ဇာတိဘေဒံ ဃာတေန္တော စ န အနန္တရိကော ဟောတိ၊ တဿ ပဗ္ဗဇ္ဇာ စ ဥပသမ္ပဒါ စ န ဝါရိတာတိ ဒဿေန္တော အာဟ ‘‘ယေန ပနာ’’တိအာဒိ. တတ္ထ ပေါသေတိ ဝဒ္ဓေတီတိ ပေါသာပနိယာ၊ သာ ဧဝ ပေါသာဝနိကာ ပကာရဿ ဝကာရံ၊ ယကာရဿ စ ကကာရံ ကတွာ၊ ပေါသာဝနိကာ စ သာ မာတာ စေတိ ပေါသာဝနိကမာတာ. အဿာတိ ပုတ္တဿ. ဣဒံ ပဒံ ပုဗ္ဗာပရာပေက္ခံ. တတ္ထ ပုဗ္ဗပဒေ ဘာဝသမ္ဗန္ဓော၊ ပစ္ဆိမပဒေ သာမိသမ္ဗန္ဓော. သဗ္ဗထာ ဧသေဝ နယော ဟောတီတိ အာဟ ‘‘သစေပီ’’တိအာဒိ. ဝေသိယာတိ ဥပလက္ခဏဝသေန ဝုတ္တံ. ယာယ ကာယစိ ဣတ္ထိယာ ပုတ္တဿာပိ ဂဟေတဗ္ဗတ္တာ. ‘‘အယံ မေ ပိတာ’’တိ အဇာနနမေဝ ဟိ ပမာဏံ. အနေနာတိ ဣမိနာ ပုတ္တေန. ‘‘ပိတုဃာတကောတွေဝ သင်္ချံ ဂစ္ဆတီ’’တိ ဣမိနာ မာတုဃာတကေပိ ‘‘အယံ မေ မာတာ’’တိ အဇာနိတွာ ဃာတေန္တောပိ မာတုဃာတကောတွေဝ သင်္ချံ ဂစ္ဆတီတိ ဒဿေတိ.

၁၁၄. သင်္ခေပေန ဝုတ္တမတ္ထံ ဝိတ္ထာရေန ဒဿေန္တော အာဟ ‘‘မနုဿဇာတိယံ ဟီ’’တိအာဒိ. အပဗ္ဗဇိတန္တိ ဂိဟိဘူတံ. ပဗ္ဗဇ္ဇာ စဿာတိ ဧတ္ထ စသဒ္ဒေန ဥပသမ္ပဒါပိ ဝါရိတာတိ ဒဿေတိ. အဿာတိ အရဟန္တဃာတကဿ. အဝသေသန္တိ အရဟန္တတော အဝသေသံ. အဿာတိ အရိယဃာတကဿ. အာနန္တရိယော န ဟောတိ တိရစ္ဆာနဂတတ္တာ ပနဿ ပဗ္ဗဇ္ဇာ ဝါရိတာတိ အတ္ထော နေတဗ္ဗော. ဧတ္ထာတိ မာတုဃာတကာဒိကမ္မေသု. ဝဓာယာတိ တဒတ္ထေ စတုတ္ထီတိ အာဟ ‘‘ဝဓတ္ထာယာ’’တိ. ‘‘မာရေတု’’န္တိ ဣမိနာ ‘‘ဝဓတ္ထာယာ’’တိ ဧတ္ထ ဟနဓာတု ဟိံသနတ္ထောတိ ဒဿေတိ. ‘‘နီယန္တီ’’တိ ဣမိနာ ဩနီယန္တီတိ ဧတ္ထ ဩတျူပသဂ္ဂေါ ဓာတွတ္ထာနုဝတ္တကောတိ ဒဿေတိ. ယံ ပန ဝစနံ ဝုတ္တန္တိ သမ္ဗန္ဓော. တဿ ဝစနဿ အတ္ထောတိ ယောဇနာ. ‘‘သစာ စ ဣတိ အယံ နိပါတော ဝုတ္တော’’တိ ဣမိနာ ဘယပီဠိတတ္တာ စ နိရုတ္တီသု အကုသလတ္တာ စ ဒဝါဘဏနေန ရဝါဘဏနေန အယံ နိပါတော စောရေဟိ ဝုတ္တောတိ ဒဿေတိ. ‘‘သစေ စ ဣစ္စေဝ ဝါ ပါဌော’’တိ ဣမိနာ တေဟိ တထာ ဝုတ္တေပိ သင်္ဂီတိကာလေ ဝါ ပေါတ္ထကာရူဠှကာလေ ဝါ ယထာဘူတံ သင်္ဂီတတ္တာ၊ ပေါတ္ထကာရူဠှတ္တာ စ ယထာဘူတော ပါဌော အတ္ထီတိ ဒဿေတိ. တတ္ထာတိ တေသု ပဒေသု. နိဒ္ဓါရဏေ ဘုမ္မံ. တဿာတိ ‘‘သစဇ္ဇ မယ’’န္တိ ပါဌဿ. ‘‘သစေ အဇ္ဇ မယ’’န္တိ ဣမိနာ ဧကာရလောပသန္ဓိံ ဒဿေတိ. ‘‘သစေဇ္ဇ မယ’’န္တိ အကာရလောပသန္ဓိနာပိ ပါဌော အတ္ထိ.

၁၁၅. ပကတတ္တန္တိ ပကတိယာ သီလသင်္ခါတော အတ္တာ သဘာဝေါ ဧတိဿာတိ ပကတတ္တာ၊ တံ. ကာယသံသဂ္ဂေန ဘိက္ခုနီနံ ပါရာဇိကတ္တာ ဝုတ္တံ ‘‘သီလဝိနာသံ ပါပေတီ’’တိ. အနိစ္ဆမာနံယေဝ ဘိက္ခုနိန္တိ သမ္ဗန္ဓော.

ဣစ္ဆမာနန္တိ ဩဒါတဝတ္ထဝသနံ ဣစ္ဆမာနံ. ယသ္မာ အဘိက္ခုနီ ဟောတိ၊ တသ္မာ ဘိက္ခုနီဒူသကော န ဟောတီတိ ယောဇနာ. သီလဝိပန္နံ ဘိက္ခုနိန္တိ သမ္ဗန္ဓော.

ယော ဒေဝဒတ္တော သံဃံ ဘိန္ဒတိ ဝိယ၊ ဘိန္ဒတီတိ ယောဇနာ. ဥဒ္ဓမ္မန္တိ ဓမ္မတော ဝိရဟိတံ. ဥဗ္ဗိနယန္တိ ဝိနယတော ဝိရဟိတံ. စတုန္နံ ကမ္မာနန္တိ အပလောကနာဒီနံ စတုန္နံ ကမ္မာနံ.

ယော ဒေဝဒတ္တော လောဟိတံ ဥပ္ပါဒေတိ ဝိယ၊ ဥပ္ပါဒေတီတိ ယောဇနာ. ဒုဋ္ဌစိတ္တေနာတိ ဧတ္ထ န ယံကိဉ္စိ ဒုဋ္ဌစိတ္တံ ဒုဋ္ဌစိတ္တံ နာမ၊ အထ ခေါ ဝဓကစိတ္တန္တိ အာဟ ‘‘ဝဓကစိတ္တေနာ’’တိ. သရီရေတိ သရီရဗ္ဘန္တရေ. တထာဂတဿ ဟိ အဘေဇ္ဇကာယတ္တာ ပရူပက္ကမေန စမ္မစ္ဆေဒံ ကတွာ လောဟိတဿ ဥပ္ပါဒနံ နာမ နတ္ထိ. ယော ပန ဇီဝကော ဖာသုံ ကရောတိ ဝိယ၊ ဖာသုံ ကရောတီတိ ယောဇနာ. လောဟိတဉ္စာတိ ပူတိလောဟိတဉ္စ.